Read Ndebele-IBhayibhili Elingcwele 2006 Uhezekiyeli 19 Bible Online

Uhezekiyeli 19 - Ndebele-IBhayibhili Elingcwele 2006 bible

Uhezekiyeli 19

¹Khala isililo ngezikhulu zakoIsrayeli,

²uthi: Yeka isilwanekazi esasingunyoko! Salala phakathi kwezilwane, sondla imidlwane yaso phakathi kwamabhongo ezilwane.

³Sakhulisa omunye wemidlwane yaso, waba libhongo lesilwane, wafunda ukubamba impango, wadla abantu.

⁴Izizwe zahlabelana umkhosi ngawo, wawela emgodini wazo, zawukhupha ngezingwegwe, zawusa elizweni leGibhithe.

⁵Nxa sibona ukuthi sehlulekile, lokuthi ithemba laso liphelile, sathatha omunye wemidlwane yaso, sawenza waba libhongo lesilwane.

⁶Wahambahamba phakathi kwezilwane, waba libhongo lesilwane, wafunda ukubamba impango, wadla abantu.

⁷Wabhidliza inqaba zabo, wachitha imizi yabo. Ilizwe lamangala labo bonke ababekilo ngenxa yokubhonga kwawo.

⁸Izizwe zaseziwuhlasela zivela emazweni awuzingelezeleyo; zaphosela amambule azo phezu kwawo, wawela emgodini wazo.

⁹Zawufaka endlwaneni ngezingwegwe, zawusa enkosini yeBhabhiloni, zawuvalela enqabeni ukuze ilizwi lawo lingabe lisazwakala futhi phezu kwentaba zakoIsrayeli.

¹⁰Unyoko wayenjengesihlahla sevini esivinini esigxunyekwe emanzini, esilezithelo lamahlamvu amanengi ngenxa yamanzi amanengi.

¹¹Isigodo saso esiqinileyo saba yintonga yombusi; isihlahla sasiside siphakeme phakathi kwengatsha eziqatha, sibonakala ngobude baso langobunengi bengatsha zaso.

¹²Kodwa isihlahla sevini sasitshunwa ngokuthukuthela saphoselwa phansi, lomoya wempumalanga wasomisa, lezithelo zaso zaphephuka, isigodo saso esiqinileyo soma, umlilo wasitshisa.

¹³Khathesi sesigxunyekwe enkangala, elizweni elitshisayo lelomileyo.

¹⁴Umlilo ulumethe esigodweni saso, watshisa ingatsha zaso lezithelo zaso, ukuze kungasali isigodo esiqinileyo sokwenza intonga yombusi. Lesi yisililo esesisetshenziswa.