Read Ndebele-IBhayibhili Elingcwele 2006 Uhezekiyeli 20 Bible Online

Uhezekiyeli 20 - Ndebele-IBhayibhili Elingcwele 2006 bible

Uhezekiyeli 20

¹Kwathi ngomnyaka wesikhombisa, ngosuku lwetshumi enyangeni yesihlanu, abadala abathile bakoIsrayeli beza ukubuza e Nkosi ni, bahlala phambi kwami.

²Ilizwi le Nkosi lafika kimi lathi:

³Ndodana yomuntu, khuluma kwabadala bakoIsrayeli, uthi kibo: INkosi uJehova ithi: Kambe lizile ukubuza kimi yini? Ngiyazifunga, kutsho iNkosi uJehova, kangiyikubuzwa yini.

⁴Uzabahlulela, ndodana yomuntu, uzabahlulela yini? Ngakho batshele amanyala aboyise,

⁵uthi kibo: INkosi uJehova ithi: Ngosuku engakhetha ngalo uIsrayeli, ngaphakamisa isandla sami kuyo inzalo kaJakobe, ngazibonakalisa kibo elizweni leGibhithe, ngaphakamisa isandla sami kibo ngathi: Mina ngiyiNkosi uJehova wenu.

⁶Ngalolosuku ngafunga kibo ukuthi ngibakhuphe elizweni leGibhithe, ngibese elizweni engabadingela lona, ilizwe eligeleza uchago loluju, ilizwe elihle kulawo wonke amazwe.

⁷Ngathi kibo: Lahlani izinto ezenyanyekayo elizibukayo lina lonke, lingazingcolisi ngezithombe zeGibhithe. Ngiyi Nkosi uNkulunkulu wenu.

⁸Kodwa bangihlamuka, kabaze bangilalela. Bonke kabazilahlanga izinto ezenyanyekayo ababezibuka, kabazitshiyanga lezithombe zeGibhithe. Ngasengisithi ngizakwehlisa ukuthukuthela kwami phezu kwabo, ngibaqede ngolaka lwami phakathi kwelizwe leGibhithe.

⁹Kodwa kangikwenzanga ngenxa yebizo lami ukuze lingangcoliswa phambi kwezizwe ababehlala phakathi kwazo, engaziveza kibo phambi kwazo ukuze ngibakhuphe elizweni leGibhithe.

¹⁰Ngakho-ke ngabakhupha elizweni leGibhithe, ngabasa enkangala.

¹¹Ngabanika izimiso zami, ngabatshengisa lemithetho yami, umuntu azaphila ngayo uba eyenza.

¹²Futhi ngabanika amasabatha ami ukuze abe yisibonakaliso phakathi kwami labo, ukuze bazi ukuthi mina Nkosi ngiyabenza babe ngcwele.

¹³Kodwa abakoIsrayeli bangihlamuka enkangala, kabahambanga ngezimiso zami, bala imithetho yami, umuntu azaphila ngayo uba eyenza, lamasabatha ami bawangcolisa kakhulu. Ngasengisithi ngizakwehlisela ukuthukuthela kwami phezu kwabo enkangala, ngibaqede nya.

¹⁴Kodwa kangikwenzanga ngenxa yebizo lami ukuze lingangcoliswa phambi kwezizwe engabakhupha phambi kwazo.

¹⁵Futhi ngafunga kibo enkangala ukuthi kangiyikubaletha elizweni engangilinike bona, ilizwe eligeleza uchago loluju, ilizwe elihle kulawo wonke amazwe,

¹⁶ngoba bala imithetho yami, kabahambanga ngezimiso zami, bangcolisa amasabatha ami, ngoba inhliziyo zabo zathanda izithombe zabo.

¹⁷Kanti ngabahawukela, kangibabhubhisanga ngabaqeda nya enkangala.

¹⁸Ngatsho kubantwana babo enkangala ngathi: Lingahambi ngezimiso zaboyihlo, lingagcini imithetho yabo, lingazingcolisi ngezithombe zabo.

¹⁹Mina Nkosi nginguNkulunkulu wenu. Hambani ngezimiso zami, liqaphelise ukugcina imithetho yami,

²⁰lihloniphe amasabatha ami ukuze abe yisibonakaliso phakathi kwami lani, ukuze lazi ukuthi ngiyi Nkosi uNkulunkulu wenu.

²¹Kodwa labantwana bangihlamuka, kabaze bahamba ngezimiso zami, kabaqaphelisanga ukugcina imithetho yami, umuntu azaphila ngayo uba eyenza; bawangcolisa amasabatha ami. Ngasengisithi ngizakwehlisela ukuthukuthela kwami phezu kwabo, ngibaqede ngolaka lwami enkangala.

²²Kodwa ngazinqanda ngenxa yebizo lami, ukuze lingangcoliswa phambi kwezizwe engangibakhuphe phambi kwazo.

²³Ngafunga kibo futhi enkangala ukuthi ngizabachithachitha phakathi kwezizwe, ngibahlakazele emazweni wonke,

²⁴ngoba bengayenzanga imithetho yami, bezalile izimiso zami, bangcolisa amasabatha ami, bathanda ukukhonza izithombe zaboyise.

²⁵Futhi ngabanika izimiso ezazingalunganga lemithetho ababengeke baphile ngayo;

²⁶ngabayekela ukuze bazingcolise ngeminikelo yabo uqobo, ngoba babenza konke okuvula isizalo kudabule emlilweni ukuze ngibesabise. Ngakwenza lokho ukuze bazi ukuthi ngiyi Nkosi.

²⁷Ngalokho, ndodana yomuntu, khuluma kundlu kaIsrayeli, uthi kibo: INkosi uJehova ithi: Lakulokho futhi oyihlo bangihlambaza ngokungikhohlisa.

²⁸Ngoba ngathi sengibalethile elizweni engangifunge ukubanika lona, kwathi lapho bebona lonke uqaqa oluphakemeyo lezihlahla ezilamahlamvu amanengi, banikela imihlatshelo yabo lapho, kanye leminikelo eyangithukuthelisayo; banikela lapho iminikelo elephunga elihle, leminikelo yokunathwayo.

²⁹Ngathi kibo: Iyini indawo ephakemeyo yokukhonzela eliya kiyo? Ngakho ibizo layo lithiwa yiNdawo ephakemeyo yokukhonzela kuze kube lamuhla.

³⁰Ngalokho-ke tshono kundlu kaIsrayeli uthi: INkosi uJehova ithi: Lisazingcolisa njengoyihlo, lilandele izinto zabo ezenyanyekayo yini?

³¹Lapho linikela iminikelo yenu, lisenza abantwana benu badabule emlilweni, liyazingcolisa ngezithombe zenu zonke kuze kube lamuhla. Ngizabuzwa yini, Israyeli yini? Ngiyazifunga, kutsho iNkosi uJehova, kangiyikubuzwa yini.

³²Umcabango elilawo kawuyikwenzeka othi: Asifanane lezizwe, labantu bamanye amazwe abakhonza isigodo lelitshe.

³³Ngiyazifunga, kutsho iNkosi uJehova, isibili ngizalibusa ngesandla esilamandla lengalo eqinileyo langolaka lwami;

³⁴ngilikhuphe phakathi kwezizwe, ngiliqoqe lemazweni lapho elichithachithelwe khona ngesandla esilamandla langengalo eqinileyo langolaka lwami,

³⁵ngililethe enkangala yezizwe, ngiligwebe lapho sikhangelene ubuso lobuso.

³⁶Njengalokhu ngabahlulela laboyihlo enkangala yelizwe leGibhithe, ngokunjalo ngizalahlulela lani, kutsho iNkosi uJehova.

³⁷Ngizalidlulisa ngaphansi kwentonga, ngilingenise esivumelwaneni,

³⁸ngikhuphe phakathi kwenu abahlamukayo labo bonke abonayo kimi, ngibakhuphe elizweni abahlala kilo, kodwa kabayikungena elizweni lakoIsrayeli. Khona lizakwazi ukuthi ngiyi Nkosi.

³⁹Lina-ke, Israyeli, kutsho iNkosi uJehova, hambani lonke liyekhonza izithombe zenu! Kodwa ngithi lizangilalela ekucineni; lizayekela ukungcolisa ibizo lami elingcwele ngeminikelo yenu langezithombe zenu.

⁴⁰Ngoba entabeni engcwele, entabeni ende yakoIsrayeli, kutsho iNkosi uJehova, lapho indlu yonke kaIsrayeli, bonke ngoluthi lwabo, bazangikhonza elizweni; ngizabemukela khona, ngibize khona iminikelo yenu, lezipho zenu ezinhle, lakho konke okungcwele kwenu.

⁴¹Ngizalemukela njengephunga elimnandi nxa ngilikhupha ezizweni, ngiliqoqa emazweni lapho ebelichithachithelwe khona; ngizabonakalisa ubungcwele bami phakathi kwenu phambi kwezizwe.

⁴²Lizakwazi ukuthi ngiyi Nkosi lapho sengilibuyise elizweni lakoIsrayeli, ilizwe engafunga ukulinika oyihlo.

⁴³Lapho-ke lizakhumbula indlela zenu lezenzo zenu zonke elazingcolisa ngazo; lizazizonda ngenxa yazo zonke izinto ezimbi elazenzayo.

⁴⁴Lizakwazi ukuthi ngiyi Nkosi nxa ngiliphatha ngenxa yebizo lami, ngingaliphathi ngokwendlela zenu ezimbi langokwezenzo zenu ezimbi, lina ndlu kaIsrayeli, kutsho iNkosi uJehova.

⁴⁵Ilizwi le Nkosi lafika kimi lathi:

⁴⁶Ndodana yomuntu. Khangelisa ubuso bakho ngeningizimu, uprofethe ngeningizimu, uprofethe ngelizwe lamaGusu eliseningizimu.

⁴⁷Uthi kilo igusu leningizimu: Zwana ilizwi le Nkosi. INkosi uJehova ithi: Khangela, ngizaphemba umlilo phakathi kwakho ozatshisa zonke izihlahla eziluhlaza ezikuwe lezihlahla ezomileyo; ilangabi elivuthayo kaliyikucitsheka, lizatshisa konke kusukela eningizimu kuze kufike enyakatho.

⁴⁸Yonke inyama izabona ukuthi mina Nkosi ngiwuphembile, kawuyikucitsheka.

⁴⁹Ngasengisithi: Hawu, Nkosi Jehova! sebesithi ngami: Yena kasumqambi wemifanekiso yini?