Read Ndebele-IBhayibhili Elingcwele 2006 Uhezekiyeli 21 Bible Online

Uhezekiyeli 21 - Ndebele-IBhayibhili Elingcwele 2006 bible

Uhezekiyeli 21

¹Ilizwi le Nkosi lafika kimi lathi:

²Ndodana yomuntu, khangela eJerusalema, uprofethe ngezindawo zakhona ezingcwele, uprofethe ngelizwe lakoIsrayeli,

³uthi kiyo: I Nkosi ithi: Khangela, ngimelene lawe, ngizahwatsha inkemba yami esikhwameni sayo, ngiqume ngisuse kuwe abalungileyo lababi.

⁴Ngoba ngizaquma ngisuse kuwe abalungileyo lababi, inkemba yami izahwatshelwa yonke inyama, kusukela eningizimu kuze kufike enyakatho.

⁵Yonke inyama izakwazi ukuthi mina Nkosi ngiyihwatshile inkemba yami esikhwameni sayo, kayisayikubuyiselwa kuso futhi.

⁶Bubula, ndodana yomuntu, ngokudabuka kokhalo, langokubaba phambi kwabo.

⁷Nxa besithi kuwe: Ububulelani? wena uthi: Kungenxa yezindaba ezizayo. Lapho sezifikile, zonke inhliziyo zizagcwala ukwesaba, lezandla zibe buthakathaka, lemimoya yonke ihlupheke, lamadolo wonke atshayane. Khangela, sezifikile, zizagcwaliseka, kutsho iNkosi uJehova.

⁸Ilizwi le Nkosi lafika kimi lathi:

⁹Ndodana yomuntu, profetha amazwi eNkosi, uthi: Inkemba, inkemba iloliwe, yabuya yalolongwa,

¹⁰ilolelwe ukubulala, yalolongelwa ukuphazima njengombane. Intonga iyagwetshwa, ndodana yami, ukudelela zonke izithombe zesigodo.

¹¹Inkemba inikelwe ukulolongwa ukuze iphathwe, iyalolwa ilolongwe ukunikelwa esandleni sombulali.

¹²Khala ulile, ndodana yomuntu, ngoba linkemba ngeyokumelana labantu bami, ngeyokumelana lazo zonke iziphathamandla zakoIsrayeli; zinikelwe kuyo kanye labantu bami. Ngakho tshaya isifuba sakho ngenxa yosizi,

¹³ngoba kuyikuhlolwa, pho-ke, kuzakuba njani uba kungesiyo sibili intonga yokudelela? kutsho iNkosi uJehova.

¹⁴Profetha, wena ndodana yomuntu, utshaye isandla esandleni, ngoba inkemba izagwaza kabili lakathathu, iyinkemba yokubulala, inkemba yokubulawa kwabakhulu ebahanqayo,

¹⁵ukuze inhliziyo zabo zincibilike. Sengibasongela ngenkemba emasangweni abo wonke, inkemba ekhazimulayo njengombane, yalolongelwa ukubulala.

¹⁶Wena nkemba, gwaza ngakwesokunene langakwesokhohlo, lalapho ongaqonda khona.

¹⁷Lami ngizatshaya isandla sami esandleni sami, ngiphelelise ukufutheka kwami. Mina Nkosi, sengikhulumile.

¹⁸Ilizwi le Nkosi lafika kimi futhi lathi:

¹⁹Ndodana yomuntu, dweba indlela ezimbili zokufika kwenkosi yeBhabhiloni, ilenkemba yayo, zombili zisuke elizweni linye. Umise isiqondiso sendlela, usimise ekuhlanganeni kwezindlela.

²⁰Dweba indlela yokufika kwayo eRaba elakoAmoni lakoJuda leJerusalema ebiyelwe ngomthangala.

²¹Ngoba inkosi yeBhabhiloni isimi ekwehlukaneni kwendlela, ekuhlanganeni kwendlela ezimbili, ukuvumisa khona; ikhahlazisa imitshoko, ibuza izithombe ezithiwa ngamatherafi, ihlole izibindi zomhlatshelo.

²²Umtshoko wokuvumisa obhalwe ukuthi iJerusalema iwele ngakwesokunene sayo; kulapho okufanele imemeze khona, ihlabe umkhosi wempi, imise izigodo zokudiliza amasango, lamadundulu okuvimbezela, yakhe lezinqaba.

²³Ebantwini kuzakhanya kuyikuvumisa kwamanga, kanti kuzangikhumbuza izenzo zabo ezimbi, bazawela ezandleni zezitha zabo.

²⁴Ngakho-ke iNkosi uJehova ithi: Ngoba lingikhumbuze ukona kwenu ngokubeka obala iziphambeko zenu, ukuze kuvele izono zenu ekwenzeni kwenu konke, langoba selikhunjulwa, lizatshaywa ngenxa yazo.

²⁵Wena-ke, sikhulu sakoIsrayeli oyisixhwali esibi, usuku lwakho selufikile, isikhathi sokutshaywa kwakho kokucina.

²⁶INkosi uJehova ithi: Susa iqhiye yakho, wethule umqhele; izinto kaziyikuhlala zinjalo. Phakamisa labo abehliselwe phansi, wehlisele phansi abaphakanyisiweyo.

²⁷Ukuchitheka, ukuchitheka, ngizaletha ukuchitheka emzini okungazanga kube khona ngaphambili, kuze kufike umuntu onguye okhethiweyo ukuze awahlulele.

²⁸Wena, ndodana yomuntu, profetha uthi: INkosi uJehova ithi ngamaAmoni ahleka uIsrayeli: Inkemba, inkemba isihwatshelwe ukubulala, yalolongwa ukuze ikhazimule, iphazime njengombane.

²⁹Usabona imibono yamanga, uvumise amanga ubekwe ezintanyeni zezixhwali ezimbi, ezilensuku esezifikile, isikhathi sokutshaywa kwazo kokucina.

³⁰Ubuyisele endaweni yawo. Endaweni lapha wadalelwa khona, elizweni owadabuka kilo, ngizakwahlulela khona;

³¹ngehlisele ukuthukuthela kwami phezu kwakho, ngikuthungele ngomlilo wolaka lwami, ngikunikele ezandleni zabantu abalolunya, abakwaziyo ukubulala.

³²Uzakuba zinkuni zomlilo, le lakho lichithekele phakathi kwezizwe, ungabe usakhunjulwa; ngoba mina Nkosi ngikhulumile.