Read Ndebele-IBhayibhili Elingcwele 2006 Uhezekiyeli 22 Bible Online

Uhezekiyeli 22 - Ndebele-IBhayibhili Elingcwele 2006 bible

Uhezekiyeli 22

¹Ilizwi le Nkosi lafika kimi lathi:

²Wena ndodana yomuntu, uzawahlulela, uwahlulele umuzi ogcwele igazi yini? Wazise zonke izenzo zawo ezenyanyekayo.

³Uzakuthi kuwo: INkosi uJehova ithi: Maye kumuzi ochitha igazi phakathi kwawo ukuze isikhathi sawo sifike, owenza izithombe ukuzingcolisa.

⁴Wena ulecala ngegazi olichithileyo, usungcoliswe yizithombe ozenzileyo, ulusondezile eduze usuku lwakho, lesikhathi esimisiweyo seminyaka yakho sifikile. Ngalokho ngikwenzile waba lihlazo ezizweni lenhlekisa emazweni wonke.

⁵Abaseduze labakhatshana lawe bazahleka, wena omubi ogcwele isiphithiphithi.

⁶Khangela, zonke iziphathamandla zakoIsrayeli ezikuwe zisebenzisa amandla azo ukuchitha igazi.

⁷Phakathi kwakho abazali benziwa inhlekisa, owezizweni uyacindezela phakathi kwakho, koniwe intandane lomfelokazi.

⁸Udelele izinto zami ezingcwele, wangcolisa amasabatha ami.

⁹Kukhona kuwe abantu abahlebayo ukuze bachithe igazi, labadlela phezu kwezintaba emathempelini, labawulayo.

¹⁰Phakathi kwakho abantu bayanqunulisa oyise, bone abesifazana abangcole ngokwehlukaniswa.

¹¹Omunye wenza amanyala lomfazi womakhelwane wakhe, lomunye awule lomalokazana wakhe, omunye angcolise udadewabo, indodakazi kayise.

¹²Phakathi kwakho abantu bazuza imivuzo yokuthengwa ngokuchitha igazi; uyazinothisa ngokuthatha inzuzo lomvuzo kubomakhelwane bakho ngobuqili. Usungikhohliwe, kutsho iNkosi uJehova.

¹³Khangela-ke ngiyatshaya isandla sami ngenzuzo yakho yenkohliso oyenzileyo, langegazi ebeliphakathi kwakho.

¹⁴Isibindi sakho sizakuma yini, lezandla zakho ziqine, ensukwini engizaphathana lawe kuzo yini? Mina Nkosi ngikhulumile, ngizakwenza.

¹⁵Ngizakuchithachitha phakathi kwezizwe, ngikuhlakazele emazweni, ngiqede ukungcola kwakho konke kuwe.

¹⁶Uzangcoliswa phakathi kwezizwe; uzakwazi ukuthi ngiyi Nkosi.

¹⁷Ilizwi le Nkosi lafika kimi lathi:

¹⁸Ndodana yomuntu, uIsrayeli wonke usenjengamanyele kimi, wonke ngoluthi lwakhe, unjengamanyele esiliva lethusi lensimbi lomnuso phakathi kwesithando.

¹⁹Ngakho-ke iNkosi uJehova ithi: Ngoba lonke selinjengamanyele, khangelani, ngizalibuthelela phakathi kweJerusalema.

²⁰Njengoba abantu bebuthelela isiliva lethusi lensimbi lomnuso esithandweni somlilo ukuze kufuthwe ngomlilo ukuze kuncibilike, ngokunjalo-ke ngizalibuthelela ekuthukutheleni kwami lasolakeni lwami, ngilifake phakathi. ngilincibilikise.

²¹Ngizalibuthelela, ngilifuthe ngomlilo wokuthukuthela kwami, lincibilike phakathi komuzi.

²²Njengesiliva sincibilikiswa esithandweni somlilo, ngokunjalo lizancibilikiswa phakathi kwawo. Lizakwazi ukuthi mina Nkosi ngehlisele ulaka lwami phezu kwenu.

²³Ilizwi le Nkosi lafika kimi lathi:

²⁴Ndodana yomuntu, tshono kiyo iJerusalema uthi: Wena uyilizwe elingahlanjululwanga lelinganethwanga ngosuku lwentukuthelo.

²⁵Iziphathamandla eziphakathi kwalo zifanana lezilwane ezibhongayo leziphangayo; zibadlile abantu; zathatha inotho lezinto eziligugu; zenza abanengi baba ngabafelokazi phakathi kwalo.

²⁶Abapristi bayo bawephule umlayo wami, bangcolisa izinto zami ezingcwele; kabenzanga umehluko phakathi kwezinto ezingcwele lezingangcwele; futhi kabawufundisanga umehluko phakathi kwezinto ezingcolileyo lezihlambulukileyo, badelile amasabatha ami; ngangcoliswa phakathi kwabo.

²⁷Iziphathamandla eziphakathi kwayo zifanana lempisi eziphangayo, ezichitha igazi zibulala abantu, ukuze zizuze umvuzo ngobuqili.

²⁸Abaprofethi bayo bayacomba izenzo zazo ngekalaga, babona imibono yamanga, bavumise amanga, besithi: Nanti ilizwi leNkosi uJehova; yona i Nkosi ingakhulumanga.

²⁹Abantu belizwe bayaqilibezela, baphange abanye, bahluphe abayanga labaswelayo, bacindezele kakhulu abezizweni.

³⁰Ngadinga umuntu phakathi kwabo ongakha umduli, avimbe esikhaleni phambi kwami, avikele ilizwe ukuze ngingalichithi, kodwa kangitholanga muntu,

³¹Ngalokho ngehlisele ukuthukuthela kwami phezu kwabo, ngabaqeda ngomlilo wolaka lwami, ngaphindisela indlela yabo kibo, kutsho iNkosi uJehova.