Read Ndebele-IBhayibhili Elingcwele 2006 Uhezekiyeli 23 Bible Online

Uhezekiyeli 23 - Ndebele-IBhayibhili Elingcwele 2006 bible

Uhezekiyeli 23

²Ndodana yomuntu, kwakukhona abesifazana ababili, amadodakazi omfazi munye.

³Bawula eGibhithe, bawula ebutsheni babo, babanjwa amabele abo lamathangazi abo.

⁴Omdala wayethiwa nguOhola, lomnawakhe wayethiwa nguOholiba. Baba ngabami, bangizalela amadodana lamadodakazi. UOhola uyiSamariya, loOholiba uyiJerusalema.

⁵UOhola wawula esesengowami, wakhanuka izithandwa zakhe amaAsiriya,

⁶amabutho agqoke okuluhlaza okwesibhakabhaka, lababusi lenduna zebutho, bonke bengamajaha athandekayo, labakwaziyo ukugada amabhiza.

⁷Wawula labo, ikhethelo labantu beAsiriya; wazingcolisa ngazo zonke izithombe zabo bonke ayebakhanuka.

⁸Kakuyekelanga ukuwula kwakhe akwenza kusukela ensukwini zakhe eGibhithe, ngoba ebutsheni bakhe amadoda alala laye, abamba amathangazi akhe, akholisisa ukukhanuka kwawo kuye.

⁹Ngalokho-ke ngamnikela ezandleni zezithandwa zakhe, ezandleni zamaAsiriya awakhanukayo.

¹⁰Wona amnqunulisa, abamba amadodana lamadodakazi akhe, ambulala ngenkemba; waba yisiga phakathi kwabesifazana emva kokwenza isigwebo phezu kwakhe.

¹¹Umnawakhe uOholiba wakubona lokhu, yena wayemubi kulaye ekukhanukeni kwakhe lekuwuleni kwakhe, okwakusedlula okukadadewabo.

¹²Wakhanuka amaAsiriya, ababusi lenduna zebutho, lamabutho agqoke izigqoko zensimbi, labagadi bamabhiza abagadileyo, bonke bengamajaha abukekayo.

¹³Ngabona ukuthi ungcolisiwe; bobabili babehamba unyawo lunye.

¹⁴Kodwa yena wengezelela ekuwuleni kwakhe. Wabona abesilisa befanekisiwe emdulini, izithombe zamaKhaladiya zifanekisiwe ngokubomvu,

¹⁵zibotshwe ngamabhanti ezinkalweni zazo, zilamaqhiye alengayo emakhanda azo, zonke zikhangeleka njengezinduna, kungumfanekiso wamaBhabhiloni azalelwa eKhaladiya.

¹⁶Lapho ebabona, wabakhanuka, wathuma izithunywa kubo eKhaladiya.

¹⁷AmaBhabhiloni afika, alala laye, amngcolisa ngenkanuko zawo; emva kokungcoliswa kwakhe wawatshiya esenengiwe yiwo.

¹⁸Lapho ewula ngokusobala, echaya ubunqunu bakhe, ngamtshiya senginengwe nguye njengalokhu ngamtshiya udadewabo.

¹⁹Kodwa wandisa ukuwula kwakhe, wakhumbula insuku zobutsha bakhe ezokuwula kwakhe elizweni leGibhithe,

²⁰ekhanuka izithandwa zakhe khona, ezilenyama efanana lenyama yabobabhemi, lenzalo yazo ifanana leyamabhiza.

²¹Ngakho wena Oholiba watshisekela amanyala obutsha bakho lapho amaGibhithe ayebamba amathangazi akho lamabele akho.

²²Ngalokho-ke, wena Oholiba, iNkosi uJehova ithi: Khangela, ngizakuvusela izithandwa zakho owazitshiya usunengwa yizo, ngizilethe kuwe zivela inhlangothi zonke,

²³amaBhabhiloni lamaKhaladiya wonke, amadoda ePekodi leShowa leKowa, lawo wonke amaAsiriya, amajaha abukekayo, ababusi lenduna zamabutho, bonke ngoluthi lwabo, izinduna lamabutho, bonke begade amabhiza.

²⁴Bazakuza kuwe bevela ngenyakatho belezinqola lezinqola zokuthwala impahla, lexuku labantu, bakuhanqe indawo zonke belamahawu lezihlangu ezinkulu lamakhowa; ngizabeka isigwebo phambi kwabo, bazakugweba njengezigwebo zabo.

²⁵Ngizakwenzela umona ukuze bakuphathe ngolaka. Bazaquma impumulo yakho lendlebe zakho, labaseleyo emzini wakho babulawe. Bazathumba amadodana lamadodakazi akho, labaseleyo emzini wakho batshiswe ngomlilo.

²⁶Bazakukhulula lawe izigqoko zakho, bathathe iziceco zakho ezinhle.

²⁷Ngokunjalo ngizaqeda amanyala akho lokuwula kwakho owasuka lakho elizweni leGibhithe, ukuze ungabe usakhanuka amaGibhithe futhi, uwakhumbule.

²⁸INkosi uJehova ithi: Khangela, ngizakunikela ezandleni zalabo obazondayo, ezandleni zalabo owabatshiya usunengiwe yibo.

²⁹Bazakuzonda, bakuphathe kubi, bakuthathele zonke izithelo zomsebenzi wakho, usale unqunu uze, lokuwula kwakho kuvele obala.

³⁰Amanyala akho lokuwula kwakho kukwehlisele lokho, ngoba uwulile lezizwe, wazingcolisa ngezithombe zazo.

³¹Ulandele indlela kadadewenu; ngalokho ngizakunika inkezo yakhe yokujeziswa.

³²INkosi uJehova ithi: Uzanatha inkezo kadadewenu ezikileyo lebanzi; uzahlekwa ube yinhlekisa, ngoba igcwele okunengi;

³³uzadakwa ube losizi. Inkezo kadadewenu iSamariya iyinkezo yokwesaba lokuchitheka.

³⁴Uzayinatha uyibhije, uyiphahlaze ibe yizicucu, udabule amabele akho. Sengikhulumile, kutsho iNkosi uJehova.

³⁵Ngalokho iNkosi uJehova ithi: Ngoba ungikhohliwe, wangilahla nyovane, thwala umvuzo wamanyala akho lokuwula kwakho.

³⁶I Nkosi yathi kimi: Ndodana yomuntu, uzagweba uOhola loOholiba yini? Batshele-ke izenzo zabo ezingamanyala.

³⁷Ngoba bafebile, lezandla zabo zigcwele igazi. Bafebile lezithombe zabo, benza amadodana abo abangizalele wona ukuthi badabule baye kizo.

³⁸Futhi benze lokho kimi, bangcolisa indlu yami engcwele, bona lamasabatha ami.

³⁹Ngoba ekubulaleni abantwana babo ukuze babe ngumhlatshelo wezithombe zabo, bangena endlini yami engcwele bayingcolise. Khangela, yikho lokho abakwenza endlini yami.

⁴⁰Babiza abantu ukuthi beze bevela khatshana, okwathunyelwa kibo isithunywa, khangela, labo beza. Wabagezela, wacomba amehlo akho, wagqiza iziceco zakho.

⁴¹Wahlala ethaleni elihle eliletafula phambi kwalo, owabeka kulo impepha yami lamafutha ami.

⁴²Wawumkhulu umsindo wexuku elithokozayo; kanye labantukazana kwakukhona labeShebha ababevela enkangala, befake amasongo ezandleni zabesifazana lemiqhele emihle emakhanda abo.

⁴³Ngasengisithi: Yeka lo owesifazana osejwayele ukufeba! Sebezafeba laye, bafebe laye yena lo.

⁴⁴Ngoba baye kuye njengoba kuyiwa ewuleni. Ngokunjalo baya kuOhola lakuOholiba ukwenza amanyala.

⁴⁵Kodwa abantu abalungileyo bazabagweba, babagwebe ngesigwebo esifanele isifebekazi, langesigwebo esifanele abesifazana abachitha igazi; ngoba beyizifebekazi, lezandla zabo zigcwele igazi.

⁴⁶INkosi uJehova ithi: Baletheleni ixuku, libenze into eyesabekayo lempango.

⁴⁷Ixuku lizabakhanda ngamatshe, libaqedisele ngenkemba zalo, lizabulala amadodana lamadodakazi abo, litshise lezindlu zabo.

⁴⁸Ngokunjalo ngizaqeda amanyala elizweni ukuze bonke abesifazana baxwayiseke, bangenzi amanyala njengani.

⁴⁹Amanyala enu azaphindiselwa phezu kwenu, lithwale umvuzo wokuwula kwenu okubi. Lizakwazi ukuthi ngiyiNkosi uJehova.