Read Ndebele-IBhayibhili Elingcwele 2006 Uhezekiyeli 24 Bible Online

Uhezekiyeli 24 - Ndebele-IBhayibhili Elingcwele 2006 bible

Uhezekiyeli 24

¹Ngomnyaka wesificamunwemunye, ngosuku lwetshumi enyangeni yetshumi, ilizwi le Nkosi lafika kimi lathi:

²Ndodana yomuntu, bhala ibizo lalolusuku, lona lolusuku kanye, ngoba inkosi yeBhabhiloni isivimbezele iJerusalema ngalona lolusuku.

³Utsho umfanekiso ebantwini abahlamukayo uthi: INkosi uJehova ithi: Beka imbiza eziko, ibeke, uthele lamanzi futhi,

⁴uqobele inyama kiyo, wonke amaqatha amahle, ithebe lesiphanga, uyigcwalise ngamathambo amahle.

⁵Thatha okuhle emhlanjini, ubuthelele inkuni ngaphansi kwayo, ukuze imbiza ibile iphuphume, kuze kuvuthwe lamathambo.

⁶Ngakho-ke iNkosi uJehova ithi: Maye kuwo umuzi ogcwele igazi, kuyo imbiza ethombileyo, ukuthomba kwayo okungelakususwa! Khupha kiyo iqatha ngeqatha, ungakhethi.

⁷Ngoba igazi umuzi olichithileyo lisekhona kuwo, ulithululele phezu kwedwala, kawulichithelanga phansi ukuligqibela ngenhlabathi.

⁸Ukuze kuvuswe ukuthukuthela kwami, ukuze kuphindisele, ngichithele phezu kwedwala igazi olichithileyo ukuze lingagqitshelwa.

⁹Ngakho iNkosi uJehova ithi: Maye kuwo umuzi ogcwele igazi! Lami ngizabasa umlilo omkhulu.

¹⁰Faka izigodo, uwuphembe umlilo, uyipheke kuhle inyama, uthulule isinongo, uyekele amathambo atshe.

¹¹Ubusuyibeka phezu kwamalahle ingelalutho, ukuze itshise, kutshe ithusi layo, kuncibilike ingcekeza yayo, kuphele lokuthomba kwayo.

¹²Ngizidinise ngeze, ukuthomba kwayo okunengi kakusasuki ngomlilo.

¹³Ukuthomba kwayo kungamanyala enu angcolileyo. Ngoba bengithanda ukulihlambulula, kodwa kalihlambulukanga ekungcoleni kwenu, kalisayikuhlanjululwa ngize ngikholisise ukuthukuthela kwami phezu kwenu.

¹⁴Mina Nkosi ngikhulumile. Kuzakwenzeka, ngizakwenza. Kangiyikukuyekela, kangiyikuba lesihawu, kangiyikuphenduka. Ngizakugweba ngokufanele indlela zakho lezenzo zakho, kutsho iNkosi uJehova.

¹⁵Ilizwi le Nkosi lafika futhi kimi lathi:

¹⁶Ndodana yomuntu, khangela, sengizasusa othandekayo kuwe ngokuphangisa; kodwa ungalili, ungakhali inyembezi, ungehlisi inyembezi.

¹⁷Bubula, ungakhali, ungalileli abafileyo. Thwala iqhiye yakho, ufake amanyathela enyaweni zakho, ungagubuzeli umlomo wakho, ungadli ukudla kwabalilayo.

¹⁸Ngakho ngakhuluma labantu ekuseni, kusihlwa umkami wafa. Kwathi kusasa ngenza njengokulaywa kwami.

¹⁹Abantu bathi kimi: Kawuyikusitshela yini ukuthi lezizinto zitshoni kithi ukuthi wenze nje?

²⁰Ngasengisithi kibo: Ilizwi le Nkosi lafika kimi,

²¹lathi: Tshono kuIsrayeli ukuthi iNkosi uJehova ithi: Khangela, ngizangcolisa indlu yami engcwele, eligugu lamandla enu, ethandekayo emehlweni enu, efiswa ngumoya wenu. Amadodana enu lamadodakazi enu eliwatshiyileyo azakuwa ngenkemba.

²²Lizakwenza njengami, kaliyikugubuzela imilomo yenu, lidle ukudla kwabakhalayo.

²³Lizathwala amaqhiye enu, lifake amanyathela enu enyaweni zenu, lingalili likhale inyembezi, kodwa lizaphela amandla ezonweni zenu, libubule omunye komunye.

²⁴Ngalokho uHezekeli uzakuba yisibonakaliso kini, lizakwenza njengokwenza kwakhe. Lapho sekufika lokhu, lizakwazi ukuthi ngiyiNkosi uJehova.

²⁵Ndodana yomuntu, ngizasusa kibo ithempeli labo eliyinqaba yabo, eliyintokozo yabo lodumo lwabo, lelithandekayo emehlweni abo, lelifiswe zinhliziyo zabo, ngisuse amadodana abo lamadodakazi abo.

²⁶Ngalolosuku kuzafika kuwe ophunyukileyo ukwenza indlebe zakho zikuzwe.

²⁷Ngalolosuku umlomo wakho uzavuleka kophunyukileyo, ukhulume laye, ungabe usaba yisimungulu, ube yisibonakaliso ebantwini; bazakwazi ukuthi ngiyi Nkosi.