Read Ndebele-IBhayibhili Elingcwele 2006 Uhezekiyeli 25 Bible Online

Uhezekiyeli 25 - Ndebele-IBhayibhili Elingcwele 2006 bible

Uhezekiyeli 25

¹Ilizwi le Nkosi lafika kimi lathi:

²Ndodana yomuntu, khangela kumaAmoni, utshumayele ngawo.

³Uthi kuwo: Zwanini ilizwi leNkosi uJehova; ithi: Ngoba lathi: Iya! nxa libona indlu yami engcwele ingcoliswa, lelizwe lakoIsrayeli lichitheka, loJuda ethunjwa,

⁴ngalokho khangelani, ngizalinikela ebantwini bempumalanga ukuze balibuse; bazamisa inkamba zabo phakathi kwenu, benze imizi yabo phakathi kwenu; bazakudla izithelo zenu, banathe lochago lwenu.

⁵Ngizakwenza iRaba libe lidlelo lamakamela, lemizi yamaAmoni ibe yisibaya semihlambi. Khona lizakwazi ukuthi ngiyi Nkosi.

⁶INkosi uJehova ithi: Ngoba uqakezile izandla zakho, wagida ngenyawo zakho, wathokoza ugcwele umona ngelizwe lakoIsrayeli,

⁷ngalokho khangela, ngizakuphakamisela isandla sami, ngikunikele ube yimpango yezizwe, ngikuqume usuke ezizweni, ngikuqede kuwo wonke amazwe, ngikuchithe nya. Khona uzakwazi ukuthi ngiyi Nkosi.

⁸INkosi uJehova ithi: Ngoba uMowabi wathi: Khangela, uJuda uyafanana nje lazo zonke ezinye izizwe;

⁹ngalokho khangela, ngizachaya umngcele wakoMowabi ukuze imizi esemngceleni eligugu lelizwe inqotshwe, iBeti-Jeshimothi, leBhali-Meyoni, leKiriyathayimi.

¹⁰Ngizanikela uMowabi lamaAmoni ebantwini bempumalanga ukuwabusa, ukuze amaAmoni angabe esakhunjulwa futhi phakathi kwezizwe,

¹¹ngenze izigwebo phezu kukaMowabi. Khona bazakwazi ukuthi ngiyi Nkosi.

¹²INkosi uJehova ithi: Ngoba iEdoma liphindisele koJuda, lonile kakhulu ngokuphindisela kwalo,

¹³ngalokho iNkosi uJehova ithi: Ngizaphakamisela isandla sami ngakilo iEdoma, ngiqume ngisuse kilo abantu lezinyamazana, ngilenze libe yinkangala; kusukela eThemani kuze kufike eDedani bazakuwa ngenkemba.

¹⁴Ngizaphindisela kulo iEdoma ngesandla sabantu bami uIsrayeli, benze kilo okufanele ukuthukuthela kwami lolaka lwami; bazakwazi impindiselo yami, kutsho iNkosi uJehova.

¹⁵INkosi uJehova ithi: Ngoba amaFilisti ephindisele, aphindisela ezitheni ngolunya langenzondo elaphakade, bazama ngamandla wonke ukuzichitha,

¹⁶ngalokho, kutsho iNkosi uJehova, khangela, ngizaphakamisela isandla sami ngakuwo amaFilisti, ngichithe abeKerethi, ngibhubhise insali yokhumbi lolwandle.

¹⁷Ngizabaphindisela ngokwesabekayo. ngibatshaye ekuthukutheleni kwami, lapho sengiphindisela, bazakwazi ukuthi ngiyi Nkosi.