Read Ndebele-IBhayibhili Elingcwele 2006 Uhezekiyeli 26 Bible Online

Uhezekiyeli 26 - Ndebele-IBhayibhili Elingcwele 2006 bible

Uhezekiyeli 26

¹Kwathi ngomnyaka wetshumi lanye, esukwini lokuqala lwenyanga yokuqala, ilizwi le Nkosi lafika kimi lathi:

²Ndodana yomuntu, iTire litshilo ngeJerusalema ukuthi: Iya! isango lezizwe selidilikile, langivulekela, sengizanotha lokhu selichithekile.

³Ngalokho-ke iNkosi uJehova ithi: Khangela, ngimelene lawe, wena Tire, ngizakulethela izizwe ezinengi njengolwandle luletha amagagasi alo.

⁴Zizadiliza imiduli yeTire, zibhidlizele phansi inqaba zayo. Ngizakhukhula inhlabathi yayo, ngiyenze ibe lidwala elingelalutho.

⁵Lizakuba yindawo yokuchayela amambule phakathi kolwandle, ngoba ngikhulumile, kutsho iNkosi uJehova. Lizakuba yimpango yezizwe,

⁶lamadodakazi alo phakathi kwelizwe azabulawa ngenkemba. Khona-ke bazakwazi ukuthi ngiyi Nkosi.

⁷INkosi uJehova ithi: Khangela, ngizaletha eTire uNebukadinezari inkosi yeBhabhiloni, ivela enyakatho, eyinkosi yamakhosi, elamabhiza lezinqola, labagadi bamabhiza, lexuku elikhulu lamabutho.

⁸Yena uzabulala amadodakazi akho phakathi kwelizwe ngenkemba, akumisele umduli wokuvimbezela, akwakhele idundulu, akuphakamisele izihlangu ezinkulu ezinengi.

⁹Uzaqondisa izigodo zakhe zokudiliza emidulini yakho, adilizele phansi inqaba zakho ngamahloka akhe.

¹⁰Ngenxa yobunengi bamabhiza akhe uthuli lwawo luzakusibekela, lemiduli yakho izanyikinywa ngumsindo wabagadi bamabhiza lowezinqola, nxa engena emasangweni akho njengomuntu ofohlela emzini.

¹¹Uzanyathela indlela zakho ngamasondo amabhiza akhe, abulale abantu bakho ngenkemba, lensika zakho eziqinileyo ziwele phansi.

¹²Bazaphanga inotho yakho, bathathe impahla yakho ethengiswayo. badilizele phansi imiduli yakho, babhidlize izindlu zakho ezinhle, baphosele emanzini amatshe akho, lezigodo zakho lenhlabathi yakho.

¹³Ngizaqeda ukuhlatshelwa kwengoma zakho, lokukhala kwamachacho akho kakusayikuzwakala futhi.

¹⁴Ngizakwenza ube lidwala elingelalutho, indawo yokuchaya amambule, ungaphindi wakhiwe futhi; ngoba mina Nkosi ngikhulumile, kutsho iNkosi uJehova.

¹⁵INkosi uJehova ithi kuyo iTire: Kaziyikuthuthumela yini izihlenge ngomdumo wokuwa kwakho, lapho abagwaziweyo bebubula labafayo besifa phakathi kwakho?

¹⁶Khona-ke zonke iziphathamandla zolwandle zizakwehla ezihlalweni zazo zobukhosi, zikhulule izigqoko zazo, zikhuphe amabhatshi azo ezicecisiweyo; zigcwale ukuthuthumela, zihlale phansi zithuthumele isikhathi sonke, zimangale zonke.

¹⁷Zizakulilela zithi: Yeka ukunyamalala kwakho olwandle, wena muzi odumileyo, owawulamandla olwandle, wena labakhileyo kuwe, owenza ukuthi wesatshwe yilo lonke ilizwe.

¹⁸Khathesi izihlenge ziyathuthumela esukwini lokuwa kwakho, yebo, izihlenge eziselwandle ziyamangala ngokuphela kwakho.

¹⁹INkosi uJehova ithi: Lapho ngikwenza ube ngumuzi ochithekileyo ongaselabantu, nxa ngiletha ulwandle phezu kwakho lamanzi amanengi akusibekele,

²⁰khona ngizakuphosela phansi kanye lalabo abehlela egodini, ebantwini basendulo, ngikwenze uhlale, elizweni elingaphansi, emanxiweni asendulo, kanye lalabo abehlela egodini, ukuze kungahlali muntu kuwe, ungabi landawo elizweni labaphilayo.

²¹Ngizakuchitha ngendlela eyesabekayo, ungabi khona futhi; lanxa udingwa, ungatholakali futhi, kutsho iNkosi uJehova.