Read Ndebele-IBhayibhili Elingcwele 2006 Uhezekiyeli 27 Bible Online

Uhezekiyeli 27 - Ndebele-IBhayibhili Elingcwele 2006 bible

Uhezekiyeli 27

¹Ilizwi le Nkosi lafika kimi lathi:

²Wena ndodana yomuntu, khala isililo ngeTire,

³uthi kiyo iTire emi ekungeneni kolwandle, ethengisayo ebantwini emazweni amanengi angasolwandle, iNkosi uJehova ithi: Wena Tire, utshilo ukuthi: Ngiphelele ngobuhle.

⁴Imingcele yakho iphakathi kolwandle, labakhi bakho benza ubuhle bakho buphelele.

⁵Benza wonke amapulanka akho ngezihlahla zefiri ezivela eSeniri; bathatha umsedari ovela eLebhanoni ukukwenzela insika.

⁶Langezihlahla zamaokhi* zeBashani bakwenzela amaphini okugwedla; benza izitezi zakho ngezihlahla zomnundu ezivela ezinkunjini zeKuprosi, bazendlala ngempondo zendlovu.

⁷Isayili lakho lenziwa ngelembu elicolekileyo kakhulu, lelicecisiweyo elivela eGibhithe, elaba luphawu lwakho, lethente lakho lenziwa ngelembu eliluhlaza okwesibhakabhaka leliyibubende elivela ezihlengeni zeElisha.

⁸Abakhileyo eSidoni leArvadi babengabagwedli bakho; izihlakaniphi ezazikuwe, wena Tire, zaba ngabaqondisi bakho.

⁹Abadala beGebali lezihlakaniphi zayo zakhona, zinameka izimfa zakho; imikhumbi yonke yolwandle labatshayeli bayo yeza kuwe ukuthenga impahla yakho.

¹⁰Amadoda ePerisiya laweLudi lawePuti ayesebuthweni yakho elibutho lakho; aphanyeka izihlangu zawo lengowane zawo kuwe, akunika udumo.

¹¹Amadoda eArvadi leKilikhiya ayephezu kwemiduli yakho ekuhanqile, lamadoda eGamadi ayesezinqabeni zakho; aphanyeka izihlangu zawo emidulini yakho inhlangothi zonke, enza ubuhle bakho buphelele.

¹²ITarshishi lathengiselana lawe ngenxa yobunengi benotho yakho yenhlobo zonke, benana impahla yakho ngesiliva langensimbi langomnuso.

¹³IJavani leTubali leMesheki zathengiselana lawe, zenana impahla yakho ngabantu uqobo, langezitsha zethusi.

¹⁴IBeti-Togarima yenana impahla yakho ngamabhiza, langamabhiza empi, langezimbongolo.

¹⁵Abantu beRodesi bathengiselana lawe, lezihlenge ezinengi zazingezithengiswa ezandla zakho; bakuhlawula ngempondo zendlovu, langesihlahla esithiwa yi-eboni.

¹⁶ISiriya yathengiselana lawe ngenxa yempahla zakho ezinengi benana impahla zakho ngamatshe athiwa ngama-emeraldi*, langokuyibubende, langomsebenzi ocecisiweyo, langelembu elicolekileyo kakhulu, langamatshe athiwa yikorali* le-agate*.

¹⁷UJuda lelizwe lakoIsrayeli bathengiselana lawe, benana impahla zakho ngengqoloyi yeMinithi, langempuphu, langoluju, langamafutha, langamakha.

¹⁸IDamaseko lathengiselana lawe ngenxa yobunengi bempahla zakho langenxa yenotho yakho enkulu yenhlobo zonke, benana impahla zakho ngewayini leHeliboni langoboya obumhlophe,

¹⁹langewayini elivela eUzali, langensimbi ekhandiweyo, langekhasiya* langekalamu*; konke lokhu benanisa ngakho.

²⁰IDedani lathengiselana lawe ngamalembu amahle ezihlalo zokugada.

²¹IArabhiya lazo zonke iziphathamandla zeKedari babengabathengi bakho abathandekayo, bethengiselana lawe ngamawundlu langezinqama langezimbuzi.

²²Abathengi beShebha leRahama bathengiselana lawe, benana impahla zakho ngenhlobo zonke ezinhle zamakha, langamatshe wonke amahle, langegolide.

²³IHarani leKane leEdeni, labathengi beAsiriya, leKilimadi, bathengiselana lawe.

²⁴Laba bathengiselana lawe ngezembatho ezinhle, langamalembu aluhlaza okwesibhakabhaka, langomsebenzi ocecisiweyo, langamacansi amabalabala, elukwe ngentambo, aqina; bathengiselana lawe ngakho konke lokhu.

²⁵Imikhumbi emikhulu yakuthwalela impahla zakho. Waba njengomkolo ogcwele usindwa kakhulu enhliziyweni zenlwandle.

²⁶Abagwedli bakho bakukhuphelela emanzini amanengi. Umoya wempumalanga usukwephulele enhliziyweni zenlwandle.

²⁷Inotho yakho lempahla yakho, lalokho okuthengisayo, labatshayeli bakho, labaqondisi bakho, labavimbi bezimfa zakho, labathengi bakho, lawo wonke amadoda empi akhona kuwe, ixuku lonke eliphakathi kwakho, lizatshona enhliziyweni zenlwandle ngosuku lokuchitheka kwakho.

²⁸Ngelizwi lokukhala kwabaqondisi bakho ilizwe lonke liyathuthumela.

²⁹Lapho bonke abagwedli besehla emikhunjini yabo, lalapho abatshayeli labaqondisi bekhuphukela ekhunjini kanyekanye,

³⁰bayahlaba umkhosi, bekukhalela ngokubaba; bathela uthuli emakhanda abo, bazibhuqe emlotheni,

³¹baziphuce amakhanda, bagqoke amalembu amasaka, bakukhalele inyembezi kakhulu, bakhale inyembezi ngokubaba bomphefumulo, ngokukhala okubabayo.

³²Ekukhaleni kwabo bayalila ngawe, bathi: Ngubani owayenjengeTire elizigqajayo elizingelezelwe lulwandle?

³³Ekuphumeni kwempahla yakho olwandle, wenelisa abantu abanengi; ngenotho enengi langempahla yakho wanothisa amakhosi omhlaba.

³⁴Khathesi usuwephulwe lulwandle enzikini zamanzi; impahla yakho lalo lonke ixuku lakho kutshone kanye lawe.

³⁵Bonke abakhileyo ezihlengeni bayamangala ngawe, lamakhosi abo ayesaba kakhulu, lobuso bawo bunyukumele.

³⁶Abathengi phakathi kwabantu bayakuncifela. Usuchitheke kubi, kawusayikuba khona kuze kube nininini.