Read Ndebele-IBhayibhili Elingcwele 2006 Uhezekiyeli 28 Bible Online

Uhezekiyeli 28 - Ndebele-IBhayibhili Elingcwele 2006 bible

Uhezekiyeli 28

¹Ilizwi le Nkosi lafika kimi lathi:

²Ndodana yomuntu, tshono kusiphathamandla seTire, uthi iNkosi uJehova ithi: Ngoba inhliziyo yakho iziphakamisile, utshilo ukuthi: Mina nginguNkulunkulu, ngihlezi esihlalweni sabonkulunkulu enzikini zolwandle; kanti ungumuntu nje, kawusunkulunkulu, lanxa uzitshaya ohlakaniphileyo njengonkulunkulu.

³Khangela, impela uhlakaniphile kuloDaniyeli, kakukho okufihlakeleyo kuwe.

⁴Ngokuhlakanipha kwakho langokuqedisisa kwakho uzinothisile, wabuthela endlini zenotho yakho igolide lesiliva.

⁵Ngokuhlakanipha kwakho okukhulu ekuthengeni wandisile inotho yakho, lenhliziyo yakho isizigqaja ngenotho yakho.

⁶Ngalokho iNkosi uJehova, ithi: Ngoba uzitshaya ohlakaniphileyo njengonkulunkulu,

⁷khangela, ngizakulethela abezizwe, ngilethe izizwe ezesabekayo kakhulu; zizahwatsha inkemba zazo, zichithe ubuhle bokuhlakanipha kwakho, zone udumo lwakho.

⁸Zizakuphosela phansi egodini, ufe kubi enhliziyweni zenlwandle.

⁹Uzakutsho yini uthi: Ngingunkulunkulu, phambi kwalabo abakugwazayo, lanxa wena ungumuntu ungesuye uNkulunkulu, ezandleni zalabo abakugwazayo?

¹⁰Uzakufa njengabangasokanga ngezandla zabezizwe; ngoba sengikhulumile, kutsho iNkosi uJehova.

¹¹Ilizwi le Nkosi lafika kimi lathi:

¹²Ndodana yomuntu, khala isililo ngenkosi yeTire, uthi kiyo: INkosi uJehova ithi: Wawuyisiboniso sokupheleleyo, ugcwele ukuhlakanipha, uphelele ngobuhle.

¹³WawuseEdeni, insimu kaNkulunkulu, ucecile ngawo wonke amatshe amahle, ngitsho ikorneliya* letopazi* lejaspi* lekrisolite* lebherule* le-onikse* lesafire* lerubi* le-emeraldi*. Amahlwayi akho ayengawegolide, lamasongo owawuwagqizile ayenzelwe wena ngosuku lokuzalwa kwakho.

¹⁴Ngakunika ikherubhi* lokukulinda, usentabeni engcwele kaNkulunkulu, wahamba phakathi kwamatshe avutha umlilo.

¹⁵Wawuphelele endleleni zakho, kusukela esukwini owadalwa ngalo kwaze kwatholwa ububi kuwe.

¹⁶Ngenxa yobunengi bokuthenga kwakho wagcwala ulunya, wasusona. Ngakuxotsha njengento engcolileyo entabeni kaNkulunkulu, lekherubi* lokukulinda lakukhupha phakathi kwamatshe avutha umlilo.

¹⁷Inhliziyo yakho yaziphakamisa ngenxa yobuhle bakho; wona ukuhlakanipha kwakho ngenxa yodumo lwakho. Ngakuphosa phansi, ngakuchaya phambi kwamakhosi ukuze akukhangele ngamehlo awo.

¹⁸Ngobunengi bezono zakho zokukhohlisa kwakho ekuthengiseni ungcolise indawo zakho ezingcwele; ngaphemba umlilo phakathi kwakho, wakutshisa du, ngakutshisa waba ngumlotha emhlabathini ukuze bonke bakubone.

¹⁹Bonke abakwaziyo phakathi kwabantu bamangala ngawe. Usuchitheke kubi, kawusayikuba khona kuze kube nininini.

²⁰Ilizwi le Nkosi lafika kimi lathi:

²¹Ndodana yomuntu, khangela ngakuyo iSidoni, uprofethe ngayo,

²²uthi: INkosi uJehova ithi: Khangela, ngimelene lawe, wena Sidoni, ngizabonakalisa udumo lwami phakathi kwakho. Bazakwazi ukuthi ngiyi Nkosi lapho sengenze izigwebo phakathi kwayo, ngibonakalise ubungcwele bami kiyo.

²³Ngoba ngizathumela umatshayabhuqe wesifo kiyo, kuchitheke legazi endleleni zayo; abantu bazakufela phakathi kwayo, besiwa ngenkemba eyihanqileyo inhlangothi zonke. Khona bazakwazi ukuthi ngiyi Nkosi.

²⁴KoIsrayeli kakusayikuba khona ukhula oluhlabayo lameva alimazayo phakathi kwabo bonke omakhelwane babo ababenze inhlekisa. Khona bazakwazi ukuthi ngiyiNkosi uJehova.

²⁵INkosi uJehova ithi: Nxa sengibutha uIsrayeli ebantwini abachithachithwe kibo, ngizabonakalisa ubungcwele bami kibo phambi kwezizwe; bazahlala elizweni lazo engalinika inceku yami uJakobe.

²⁶Bazahlala kilo belondolozekile, bakhe imizi, bahlanyele izivini. Bazahlala belondolozeka nxa sengisenza izigwebo phezu kwabo bonke omakhelwane babo ababenze inhlekisa. Khona bazakwazi ukuthi ngiyiNkosi uJehova.