Read Ndebele-IBhayibhili Elingcwele 2006 Uhezekiyeli 29 Bible Online

Uhezekiyeli 29 - Ndebele-IBhayibhili Elingcwele 2006 bible

Uhezekiyeli 29

¹Ngomnyaka wetshumi, ngosuku lwetshumi lambili lwenyanga yetshumi, ilizwi le Nkosi lafika kimi lathi:

²Ndodana yomuntu, khangela ngakuFaro inkosi yeGibhithe, uprofethe ngaye langeGibhithe lonke,

³ukhulume uthi: INkosi uJehova ithi: Khangela, ngimelene lawe, wena Faro nkosi yeGibhithe, wena mgobho omkhulu olele phakathi kwemifula yayo, othi: Umfula iNile ungowami, ngawenza.

⁴Ngizafaka ingwegwe emihlathini yakho, nginamathelise inhlanzi zemifula yakho emaxolweni akho, ngikukhuphe emifuleni yakho, lazo zonke inhlanzi zemifula yakho ezinamathele emaxolweni akho.

⁵Ngikuphosele enkangala, wena lazo zonke inhlanzi zemifula yakho, liwele endle lingabuthwa lingcwatshwe. Ngizakunikela ube yikudla kwezilo zomhlaba lenyoni zamazulu.

⁶Bonke abakhileyo eGibhithe bazakwazi ukuthi ngiyi Nkosi. Ngoba wawuludondolo olunjengomhlanga nje koIsrayeli,

⁷lapho bekubamba ngesandla, wephuka, wabakhumula iziphanga, lalapho beseyama kuwe, waqamuka, wabawisela phansi.

⁸Ngakho-ke iNkosi uJehova ithi: Khangela, ngizakulethela inkemba, ngiqede phakathi kwakho abantu lezinyamazana;

⁹lelizwe leGibhithe lichitheke libe yinkangala. Khona bazakwazi ukuthi ngiyi Nkosi. Lokhu uthe: Umfula iNile ungowami, ngiwenzile;

¹⁰ngalokho khangela, ngimelene lawe lomfula wakho; ngizalichitha ilizwe leGibhithe libe yinkangala isibili, kusukela eMigidoli ngenyakatho kuze kube seSiyene ngeningizimu, kuze kube lemingceleni yeEtiyopiya.

¹¹Kakusayikudlula muntu kilo, kakusayikudlula lanyamazana; kaliyikuhlalwa muntu iminyaka engamatshumi amane.

¹²Ngizalichitha ilizwe leGibhithe okwedlula amazwe wonke achithekileyo; imizi yalo izachitheka okweminyaka engamatshumi amane phakathi kwemizi echithekileyo. Ngizawachithachitha amaGibhithe phakathi kwezizwe, ngiwahlakazele phakathi kwamazwe.

¹³INkosi uJehova ithi: Ekupheleni kweminyaka engamatshumi amane ngizabutha amaGibhithe ebantwini engiwachithachithe phakathi kwabo.

¹⁴Ngizababuyisela abantu beGibhithe elizweni lePatrosi, ilizwe abadabuka kilo; lapho bazakuba ngumbuso ophansi.

¹⁵Bazakuba ngumbuso ophansi kulayo yonke, bangaphindi baphakanyiswe phezu kwezinye izizwe; ngizabenza babe bancinyane kakhulu ukuze bangabusi ezinye izizwe futhi.

¹⁶Indlu kaIsrayeli ingeke ilithembe iGibhithe futhi; lokhu kuzabakhumbuza izono zabo zokuya eGibhithe ukudla usizo. Bazakwazi ukuthi ngiyiNkosi uJehova.

¹⁷Ngomnyaka wamatshumi amabili lesikhombisa, esukwini lokuqala lwenyanga yokuqala, ilizwi le Nkosi lafika kimi lathi:

¹⁸Ndodana yomuntu, uNebukadinezari inkosi yeBhabhiloni walwisa ibutho lakhe leTire okwesikhathi eside, kwaze kwaphucuka amakhanda wonke. Kwafutha amahlombe wonke; kodwa yena lebutho lakhe kabazuzanga lutho eTire ngomsebenzi wabo isikhathi eside.

¹⁹Ngalokho iNkosi uJehova ithi: Khangela, ngizanikela ilizwe leGibhithe kuNebukadinezari inkosi yeBhabhiloni; uzathumba yonke inotho yalo, aliphundle aliphange, aliholise ibutho lakhe.

²⁰Ngimnikile ilizwe leGibhithe libe ngumvuzo womsebenzi wakhe, ngoba ungisebenzele, kutsho iNkosi uJehova.

²¹Ngalolosuku ngizakhupha amahlumela amatsha koIsrayeli, ngikunike wena Hezekeli, amandla okukhuluma phakathi kwabo. Bazakwazi ukuthi ngiyi Nkosi.