Read Ndebele-IBhayibhili Elingcwele 2006 Uhezekiyeli 3 Bible Online

Uhezekiyeli 3 - Ndebele-IBhayibhili Elingcwele 2006 bible

Uhezekiyeli 3

¹Yasisithi kimi: Ndodana yomuntu, dlana okunikwayo, dlana lumqulu, uhambe uyekhuluma koIsrayeli.

²Ngasengivula umlomo wami, yanginika umqulu ukuthi ngiwudle.

³Yathi kimi: Ndodana yomuntu, dlana lumqulu engikunika wona, ukuze usuthe. Ngasengiwudla, waba mnandi njengoluju emlonyeni wami.

⁴Yasisithi kimi: Ndodana yomuntu, hamba uye koIsrayeli, ukhulume amazwi ami kibo.

⁵Ngoba kangikuthumi ebantwini abakhuluma ulimi lwezizweni lolimi olulukhuni, kodwa ngikuthuma koIsrayeli.

⁶Kangikuthumi ebantwini abakhulu abakhuluma ulimi lwezizweni lolulukhuni, abalamazwi ongeke uwezwe. Uba bengikuthuma kwabanjalo, bebezakuzwa.

⁷Kodwa indlu kaIsrayeli kayiyikukuzwa, ngoba kabathandi ukungizwa mina; bonke balukhuni, kabezwa.

⁸Khangela, lawe ngizakwenza ufanane labo, ngizakwenza ube lukhuni njengabo, ngikwenze ukuthi ungezwa njengabo.

⁹Ngizakwenza ube njengendayimana elukhuni kulensengetshe. Ungabesabi, ungathuthumeli ngabo ngoba bengabahlamukileyo.

¹⁰Futhi yathi kimi: Ndodana yomuntu, wonke amazwi ami engiwatshoyo kuwe emukele enhliziyweni yakho, uwezwe ngendlebe zakho.

¹¹Suka, uye ebantwini bakini abathunjiweyo, ukhulume kibo, loba bezakuzwa loba bengayikukuzwa, uthi: Nanka amazwi eNkosi uJehova.

¹²UMoya wasengiphakamisa; ngezwa emva kwami ilizwi lomdumo omkhulu, lisithi: Kabubusiswe ubukhosi be Nkosi busuka endaweni yabo.

¹³Kwakungumdumo wokuthintana kwempiko zezidalwa eziphilayo, lomsindo wamavili ayeseceleni kwazo, okwezwakala njengokunyikinyeka komhlaba.

¹⁴UMoya wasengiphakamisa, wangisusa; ngahamba ekubabeni, ngifutheka emoyeni wami, isandla se Nkosi sinzima phezu kwami.

¹⁵Ngafika-ke kwabathunjiweyo eTelabibi, ababehlala emfuleni iKebari. Ngahlala phakathi kwabo insuku eziyisikhombisa ngithithibele.

¹⁶Ekucineni kwensuku eziyisikhombisa ilizwi le Nkosi lafika kimi,

¹⁷lathi: Ndodana yomuntu, ngikwenzile waba ngumlindi wendlu kaIsrayeli. Lapho usizwa ilizwi elivela kimi, ungixwayisele bona.

¹⁸Lapho ngisithi komubi: Uzakufa isibili; wena uba ungamxwayisi, loba ungakhulumi ukumxwayisa omubi endleleni yakhe embi ukuze aphephe, lowomuntu omubi uzafela ebubini bakhe; kodwa igazi lakhe ngizalibiza kuwe.

¹⁹Kodwa uba wena umxwayisa omubi, angabuyi ebubini bakhe loba endleleni yakhe embi, uzafela ebubini bakhe; kodwa wena uzaphepha.

²⁰Lalapho olungileyo ephambuka ekulungeni kwakhe, enze okubi, ngibeke isikhubekiso phambi kwakhe, uzakufa. Ngoba ungamxwayisanga yena, uzafela ezonweni zakhe kuthi izenzo zakhe ezilungileyo azenzileyo zingakhunjulwa. Kodwa igazi lakhe ngizalibiza kuwe.

²¹Kodwa lapho umxwayisa olungileyo ukuze angoni, angaze ona, uzaphila, ngoba ezwile ukuxwayisa kwakho; wena uzaphepha.

²²Isandla se Nkosi saba phezu kwami lapho, yathi kimi: Sukuma, uye esigodini, ngizakhuluma kuwe khona.

²³Ngasengisukuma ngisiya esigodini. Khangela, inkazimulo ye Nkosi yayimi khona, injengenkazimulo engangiyibonile emfuleni iKebari; ngathi mbo ngobuso.

²⁴UMoya wangena kimi, wangimisa ngenyawo zami, wakhuluma kimi wathi: Hamba uyezivalela endlini yakho.

²⁵Wena-ke, ndodana yomuntu, khangela, uzabotshwa ngamagoda ukuze ungaphumeli ebantwini;

²⁶ngizakwenza ukuthi ulimi lwakho lunamathele olwangeni lomlomo wakho ube yisimungulu, ungabakhuzi, ngoba bayisizwe esihlamukileyo.

²⁷Kodwa lapho sengikhuluma kuwe, ngizavula umlomo wakho, uzakuthi kibo: Nanka amazwi eNkosi uJehova. Lowo othanda ukuzwa kezwe; ongathandiyo ukuzwa angezwa; ngoba bayisizwe esihlamukileyo.