Read Ndebele-IBhayibhili Elingcwele 2006 Uhezekiyeli 30 Bible Online

Uhezekiyeli 30 - Ndebele-IBhayibhili Elingcwele 2006 bible

Uhezekiyeli 30

¹Ilizwi le Nkosi lafika kimi lathi:

²Ndodana yomuntu, profetha uthi: INkosi uJehova ithi: Maye ngalolosuku!

³Usuku selusondele, usuku lwe Nkosi selusondele, luzakuba lusuku olulamayezi, isikhathi sokuchitheka kwezizwe.

⁴Inkemba izakwehlela eGibhithe, losizi lube khona eEtiyopiya, lapho abanengi bebulawa eGibhithe, lenotho yalo ithunjwa, lezisekelo zalo zidilizelwa phansi.

⁵IEtiyopiya lePuti leLudi leArabhiya lonke leLibiya labantu belizwe abahlangene labo bazabulawa kanye labo.

⁶I Nkosi ithi: Labo abasekela iGibhithe bazakufa, lamandla ayo aziphakamisileyo ehliselwe phansi; kusukela eMigidoli ngenyakatho kuze kube seSiyene ngeningizimu bazakuwa ngenkemba, kutsho iNkosi uJehova.

⁷Ilizwe lizachitheka okwedlula amazwe wonke achithekileyo, lemizi yalo ibe phakathi kwemizi echithekileyo.

⁸Khona bazakwazi ukuthi ngiyi Nkosi, lapho sengithungele iGibhithe ngomlilo labo bonke abasizi bayo sebechithiwe.

⁹Ngalolosuku izithunywa ezilesiqubu zizasuka kimi ukwesabisa amaEtiyopiya angethuswanga lutho, ehlelwe lusizi ngalolosuku lokuchitheka kwamaGibhithe, ngoba khangela, usuku luyeza.

¹⁰INkosi uJehova ithi: Ngizaqeda inotho yeGibhithe ngesandla sikaNebukadinezari inkosi yeBhabhiloni.

¹¹Yena labantu bakhe, abesabeka okwedlula izizwe zonke, bazakuza ukulichitha ilizwe; bazayihlasela iGibhithe ngenkemba zabo, bagcwalise ilizwe ngezidumbu.

¹²Ngizakwenza umfula iNile utshe, ngithengise ilizwe ebantwini ababi, ngilichithe ilizwe lakho konke okukilo ngezandla zabezizwe; mina Nkosi ngikhulumile.

¹³INkosi uJehova ithi: Ngizachitha izithombe, ngiqede onkulunkulu bamanga eMemfisi; kungabe kusaba khona isiphathamandla elizweni leGibhithe, ngilethe ukwesaba elizweni leGibhithe.

¹⁴Ngizachitha iPatrosi, ngithungele iZowani ngomlilo, ngizenze izigwebo phakathi kweNo.

¹⁵Ngizakwehlisela ulaka lwami phezu kweSini, eyinqaba yeGibhithe, ngiqede ixuku leNo.

¹⁶Ngizathungela iGibhithe ngomlilo, leSini ibe lobuhlungu obukhulu. Imiduli yeNo izafohlelwa, lezimpophoma zamanzi zitheleke phakathi kwayo.

¹⁷Amajaha eOni lawePibesethi azakuwa ngenkemba, labesifazana bathunjwe.

¹⁸ETahafanesi ukukhanya kuzakuba mnyama, lapho engiqeda khona ukubusa kweGibhithe, lamandla aziphakamisileyo azaphela, lamayezi afike phezu kwayo, kuthunjwe lamadodakazi ayo.

¹⁹Ngokunjalo ngizakwenza izigwebo eGibhithe. Khona-ke bazakwazi ukuthi ngiyi Nkosi.

²⁰Ngomnyaka wetshumi lanye, ngosuku lwesikhombisa enyangeni yokuqala, ilizwi le Nkosi lafika kimi lathi:

²¹Ndodana yomuntu, ngiyephule ingalo kaFaro inkosi yeGibhithe, khangela, kayibotshwanga, ukuthi ipholiswe yikufakwa uhlaka, ukuze iqinele ukuphatha inkemba.

²²Ngakho-ke iNkosi uJehova ithi: Khangela, ngimelene loFaro inkosi yeGibhithe, ngizakwephula ingalo zakhe, ingalo eqinileyo lengalo eyephukileyo, ngenze inkemba iphunyuke esandleni sakhe.

²³Ngizachithachitha amaGibhithe phakathi kwezizwe, ngiwahlakazele emazweni wonke.

²⁴Ngizaqinisa ingalo zenkosi yeBhabhiloni, ngibeke inkemba yami esandleni sayo; kodwa ngizakwephula ingalo zikaFaro, abubule phambi kwayo njengomuntu olimele kubi.

²⁵Ngizaqinisa ingalo zenkosi yeBhabhiloni, kodwa ingalo zikaFaro zizakuwa; bazakwazi ukuthi ngiyi Nkosi. Nxa sengifakile inkemba yami esandleni senkosi yeBhabhiloni, izayiphakamisela elizweni leGibhithe;

²⁶ngizachithachitha amaGibhithe phakathi kwezizwe, ngiwahlakazele emazweni wonke. Khona bazakwazi ukuthi ngiyi Nkosi.