Read Ndebele-IBhayibhili Elingcwele 2006 Uhezekiyeli 31 Bible Online

Uhezekiyeli 31 - Ndebele-IBhayibhili Elingcwele 2006 bible

Uhezekiyeli 31

¹Ngomnyaka wetshumi lanye, ngosuku lokuqala enyangeni yesithathu, ilizwi le Nkosi lafika kimi lathi:

²Ndodana yomuntu, tshono kuFaro inkosi yeGibhithe lakubo bonke abantu bakhe uthi: Ufanana lobani ebukhulwini bakho?

³Khangela, ngizafananisa iAsiriya lomsedari oseLebhanoni, olengatsha ezinhle ezinika umthunzi eguswini, omude kakhulu, olezihloko ezifinyelela emayezini.

⁴Amanzi awuthelela, lamanzi angaphansi awukhulisa, imifula yawo yageleza yazingelezela indawo ohlanyelwe kiyo, yakhuphela imisele yayo kuzo zonke izihlahla zeganga.

⁵Waphakama-ke, wazedlula zonke izihlahla zegusu, ingatsha zawo zaba zinkulu zabande, ngenxa yobunengi bamanzi empandeni zawo.

⁶Zonke inyoni zamazulu zakhela izidleke zazo engatsheni zawo, lenyamazana zonke zeganga zazalela ngaphansi kwengatsha zawo, langaphansi komthunzi kwahlala izizwe zonke ezinkulu.

⁷Wawumuhle ngobukhulu bawo, langobude bengatsha zawo, ngoba impande zawo zatshona zafika emanzini amanengi.

⁸Imisedari yensimini kaNkulunkulu yayingeke ilinganiswe lawo, lamafiri ayingalingani lengatsha zawo; lomangwe wawungeke ulinganiswe lengatsha zawo, kwakungekho isihlahla ensimini kaNkulunkulu esihle njengawo.

⁹Ngawenza wamuhle ngobunengi bengatsha zawo, lazo zonke izihlahla zeEdeni zawuhawukela, izihlahla ezazisensimini kaNkulunkulu.

¹⁰Ngakho iNkosi uJehova ithi: Ngenxa yokuthi waba mude, izihloko zawo zathinta amayezi, inhliziyo yawo yaziphakamisa ngobude bawo,

¹¹ngizawunikela esandleni sesikhulu sezizweni; sizawuphatha ngokufanele ububi bawo. Sengiwulahlile.

¹²Abezizweni abalesihluku kulazo zonke izizwe bazawuquma bawulahle; ingatsha zawo zizawela ezintabeni lezihotsheni; zizakwephukela ezifuleni zelizwe, labantu bonke bomhlaba basuke emthunzini wawo, bawutshiye.

¹³Nxa usuwile, zonke inyoni zamazulu zizahlala phezu kwawo, lenyamazana zonke zeganga zihlale phezu kwengatsha zawo.

¹⁴Lokhu kwenzelwa ukuze kungabi lasihlahla emanzini esikhula sibe side kakhulu, lezihloko zaso zithinte amayezi, kungabi lasihlahla esinatha amanzi esifinyelela emayezini; ngoba zonke zimiselwe ukufa, ziye elizweni elingaphansi komhlaba, njengabantu abafileyo abehlela phansi egodini.

¹⁵INkosi uJehova ithi: Lapho umkusu usuwehlele endaweni yabafileyo, ngizakwenza okungaphansi komhlaba kuwulilele, ngimise imifula yawo, ngivimbele amanzi amanengi. Ngizasibekela iLebhanoni ngomnyama ngenxa yawo, lezihlahla zonke zizadana ngenxa yawo.

¹⁶Ngizakwenza zonke izizwe zithuthumele ngomdumo wokuwa kwawo, lapho ngiwuphosela esihogweni kanye lalabo abehlela egodini. Zonke izihlahla zeEdeni, ezikhethiweyo lezinhle zeLebhanoni, zonke ezinatha amanzi, zizaduduzwa elizweni elingaphansi komhlaba.

¹⁷Lazo zizakuya esihogweni kanye lawo, kubo ababulewe ngenkemba. Yebo, labo abahlala ngaphansi komthunzi wawo phakathi kwezizwe bazabhubha.

¹⁸Pho-ke, wena ufanana lobani ngodumo langobukhulu ezihlahleni zeEdeni? Uzakwehliselwa elizweni elingaphansi komhlaba lezihlahla zeEdeni, ulale phakathi kwabangasokanga, kanye labo ababulewe ngenkemba. Lo nguFaro lexuku lakhe lonke, kutsho iNkosi uJehova.