Read Ndebele-IBhayibhili Elingcwele 2006 Uhezekiyeli 32 Bible Online

Uhezekiyeli 32 - Ndebele-IBhayibhili Elingcwele 2006 bible

Uhezekiyeli 32

¹Ngomnyaka wetshumi lambili, ngosuku lokuqala enyangeni yetshumi lambili, ilizwi le Nkosi lafika kimi lathi:

²Ndodana yomuntu, khala isililo ngoFaro inkosi yeGibhithe, uthi kuye: Wena uzifananise lebhongo lesilwane phakathi kwezizwe, kodwa wena ufanana lomgobho emanzini omfula iNile; uvuthela amanzi ngamakhala akho, uvube amanzi ngenyawo zakho, ungcolise imifula.

³INkosi uJehova ithi: Ngizaphosela imbule lami phezu kwakho embuthanweni kwezizwe ezinengi, ngikukhuphe ngembule lami,

⁴ngikuphosele emhlabathini, ngikuphose endle, ngihlalise phezu kwakho zonke inyoni zamazulu, zonke izilo zeganga zizitike ngawe.

⁵Ngizalahla inyama yakho ezintabeni, ngigcwalise izihotsha ngempethu zesidumbu sakho.

⁶Ilizwe lizagcwala igazi lakho eligelezayo, lize lifike ezintabeni, lezifudlana zonke zigcwale lona.

⁷Lapho sengikuchitha, ngizasibekela amazulu, ngenze inkanyezi zalo zibe mnyama, ngisibekele ilanga ngeyezi, lenyanga ingabe isakhanya.

⁸Konke ukukhanya kwamazulu ngikwenze kube mnyama kuwe, ngehlisele umnyama elizweni lakho, kutsho iNkosi uJehova.

⁹Ngizakhathaza inhliziyo zabantu abanengi nxa ngikuthumba phakathi kwezizwe, ngikusa emazweni ongawaziyo.

¹⁰Ngizakwenza abantu abanengi bamangale ngawe, lamakhosi abo athuthumele ngenxa yakho nxa ngigweba inkemba yami phambi kwabo; bazathuthumela isikhathi sonke, bonke babe lovalo ngokuphila kwabo mhla wosuku lokuwa kwakho.

¹¹Ngoba iNkosi uJehova ithi: Inkemba yenkosi yeBhabhiloni izakwehlela.

¹²Ngizabulala ixuku lakho ngezinkemba zamaqhawe asabeka kuzo zonke izizwe. Azaqeda ukuziphakamisa kweGibhithe, kubhubhe lexuku lonke lalo.

¹³Ngizabulala inyamazana zonke emanzini amanengi, kungabi khona lonyawo lomuntu oluwadungayo futhi, kungabi khona lesondo lenyamazana eliwavubayo.

¹⁴Besengisenza amanzi abo azike, lemifula yabo igeleze njengamafutha, kutsho iNkosi uJehova.

¹⁵Lapho ngichitha ilizwe leGibhithe, lalapho ilizwe liphundlwa konke okukilo, lalapho ngitshaya bonke abahlala kilo, bazakwazi-ke ukuthi ngiyi Nkosi.

¹⁶Lokhu kuyisililo esizahlatshelwa; abesifazana bezizwe bazasihlabela; bazasihlabela ngeGibhithe langexuku lonke lalo, kutsho iNkosi uJehova.

¹⁷Ngomnyaka wetshumi lambili, ngosuku lwetshumi lanhlanu lwenyanga yokuqala, ilizwi le Nkosi lafika kimi lathi:

¹⁸Ndodana yomuntu, khalela abantu bonke beGibhithe, ubehlisele elizweni elingaphansi komhlaba kulabo abehlela egodini, bona labesifazana bezizwe ezilodumo.

¹⁹Uthi kibo: Ledlula bani ngobuhle? Yehlani, lilaliswe labangasokanga.

²⁰Labo abahamba labo, kanye labo bonke abantu babo, bazakufa kanye lalabo ababulawa ngenkemba.

²¹Iziphathamandla ezilamandla zizakhuluma ngabo labasizi babo, zisendaweni zabafileyo zithi: Sebehlile, balele abangasokanga bebulewe ngenkemba.

²²LeAsiriya ikhona lapho kanye lexuku layo lonke, lamangcwaba ayo elihanqile inhlangothi zonke, bonke babulewe bawile ngenkemba.

²³Amangcwaba abo enziwe ekutshoneni kwegodi, lexuku layo lihanqe ingcwaba layo, bonke bebulewe bawa ngenkemba, bona ababesesatshwa elizweni labaphilayo.

²⁴Likhona lapho iElamu lexuku layo lonke lihanqe ingcwaba layo, bonke bebulewe bawa ngenkemba, behlela elizweni elingaphansi komhlaba bengasokanga, bona ababesesatshwa elizweni labaphilayo, bathwele ihlazo labo kanye labo abehlela egodini.

²⁵Balenzela indawo yokulala phakathi kwabafileyo kanye lexuku layo lonke, amangcwaba abo elihanqile, bonke bengasokanga, bebulewe ngenkemba. Ukwesabeka kwabo kwakugcwele elizweni labaphilayo, bathwala ihlazo labo kanye labo abehlela egodini, babekwa phakathi kwabafileyo.

²⁶IMesheki leTubali zikhona lapho kanye lamaxuku azo wonke, lamangcwaba awo ezihanqile, bonke bengasokanga, bebulewe ngenkemba, ngoba babesesatshwa elizweni labaphilayo.

²⁷Kabayikulala lamaqhawe afa kudala ehlela esihogweni lezikhali zawo, aqanyeliswa inkemba zawo, lamathambo awo endlalelwa ngezihlangu zawo; ukwesabeka kwamaqhawe kwakuselizweni labaphilayo.

²⁸Lawe Faro uzabulawa, ulaliswe phakathi kwabangasokanga, labo ababuleweyo ngenkemba.

²⁹LeEdoma ikhona lapho, kanye lamakhosi leziphathamandla zayo, loba babelamandla balaliswe kanye lalabo ababuleweyo ngenkemba, belele labangasokanga labehlela phansi egodini.

³⁰Iziphathamandla zenyakatho zikhona lapho, zonke ngoluthi lwazo, labo bonke abeSidoni, abehlele phansi kanye labafileyo belenhloni ngenxa yokwesabeka konke abakwenza ngamandla abo; balele bangasokanga kanye labo ababuleweyo ngenkemba, bethwele ihlazo labo lalabo abehlela egodini.

³¹Lapho uFaro ebabona, uzaziduduza ngenxa yamaxuku akhe wonke, uFaro lebutho lakhe lonke, bebulewe ngenkemba, kutsho iNkosi uJehova.

³²Ngoba yena owagcwalisa ukwesabeka kwakhe elizweni labaphilayo uzabekwa phakathi kwabangasokanga kanye lalabo ababuleweyo ngenkemba, uFaro lexuku lakhe lonke, kutsho iNkosi uJehova.