Read Ndebele-IBhayibhili Elingcwele 2006 Uhezekiyeli 33 Bible Online

Uhezekiyeli 33 - Ndebele-IBhayibhili Elingcwele 2006 bible

Uhezekiyeli 33

¹Ilizwi le Nkosi lafika kimi lathi:

²Ndodana yomuntu, tshono kibo abantu bakini uthi: Uba ngiletha inkemba elizweni, labantu belizwe bathathe omunye phakathi kwabo, bambeke abe ngumlindi wabo,

³nxa ebona inkemba isiza elizweni, avuthele uphondo, axwayise abantu,

⁴uba omunye esizwa ukukhala kophondo angananzi, inkemba ifike imsuse, kuzakuba ngumlandu wakhe.

⁵Uzwile ukukhala kophondo, kazananza, ngoba umlandu uzakuba ngowakhe. Kodwa uba ebexwayisekile, ubezaphepha.

⁶Kodwa nxa umlindi ebona inkemba isiza, angaluvutheli uphondo, abantu bengaxwayiswa, inkemba ifike isuse omunye wabo, lowomuntu afele esonweni sakhe, umlandu uzakuba ngowomlindi.

⁷Wena-ke, ndodana yomuntu, ngikubeke ube ngumlindi koIsrayeli; nxa usizwa ilizwi elivela kimi, ubaxwayise.

⁸Uba ngisithi komubi: Wena muntu omubi, uzakufa isibili; uba ungakhulumi wena ukumxwayisa omubi ukuze atshiye indlela yakhe, lowomuntu omubi uzafela esonweni sakhe, kodwa umlandu uzakuba ngowakho.

⁹Kodwa uba umxwayisa omubi ukuze aphenduke endleleni yakhe, angatshiyi indlela yakhe, uzafela esonweni sakhe, kodwa wena uzaphepha.

¹⁰Wena-ke, ndodana yomuntu, tshono kuIsrayeli uthi: Lina lithi: Iziphambeko zethu lezono zethu zisehlele, siyaphela ngenxa yazo; sizaphila njani?

¹¹Tshono kibo uthi: INkosi uJehova ithi: Ngiyazifunga mina, kangithokozi ngokufa komubi, kodwa ngokuthi omubi atshiye indlela yakhe aphile; tshiyani-ke, tshiyani indlela zenu ezimbi, ngoba lizafelani, lina ndlu kaIsrayeli?

¹²Wena-ke, ndodana yomuntu, tshono ebantwini bakini uthi: Ukulunga kolungileyo kakuyikumkhulula uba esona; lobubi bomubi kabuyikumbulala uba etshiya ububi bakhe; lolungileyo kayikuphila ngokulunga kwakhe uba esona.

¹³Lapho ngisitsho kolungileyo ukuthi uzaphila isibili, kanti uba ethemba ukulunga kwakhe, enze isono, kakuyikukhunjulwa lesisodwa isenzo sakhe esilungileyo, kodwa uzafela esonweni asenzileyo.

¹⁴Futhi uba ngisitsho komubi ukuthi uzakufa isibili, kanti uba ephenduka ezonweni zakhe, enze okufaneleyo lokulungileyo,

¹⁵uba ebuyisela isibambiso, abuyisele lokho akuphangileyo, ahambe ngezimiso zempilo, angenzi okubi, uzaphila isibili, angafi.

¹⁶Kakusayikukhunjulwa lesisodwa sezono azenzileyo; ngoba wenzile okufaneleyo lokulungileyo, uzaphila isibili.

¹⁷Kodwa abantu bakini bathi: Indlela yeNkosi kayilunganga, kanti ngezabo indlela ezingalunganga.

¹⁸Nxa olungileyo etshiya ukulunga kwakhe, enze okubi, uzakufa ngenxa yakho.

¹⁹Nxa omubi etshiya ububi bakhe, enze okufaneleyo lokulungileyo, uzaphila ngenxa yakho.

²⁰Kanti lina lithi: Indlela yeNkosi kayilunganga. Lina ndlu kaIsrayeli, ngizalahlulela lonke ngokufanele izindlela zenu.

²¹Ngomnyaka wetshumi lambili wokuthunjwa kwethu, ngosuku lwesihlanu lwenyanga yetshumi, umuntu owayephunyukile eJerusalema wafika kimi wathi: Umuzi usutshayiwe.

²²Isandla se Nkosi sasiphezu kwami kusihlwa kungakafiki ophunyukileyo; yavula umlomo wami ngesikhathi lowomuntu engakafiki kimi ekuseni. Umlomo wami wavuleka, angabe ngisaba yisimungulu.

²³Ilizwi le Nkosi lafika kimi lathi:

²⁴Ndodana yomuntu, abakhileyo endaweni ezichithekileyo elizweni lakoIsrayeli, balokhu besithi: UAbrahama wayemunye lapho enikwa ilizwe, kodwa thina sibanengi; ilizwe silinikiwe isibili ukuhlala kilo.

²⁵Ngalokho-ke tshono kibo uthi: INkosi uJehova ithi: Lidla inyama elegazi, liphakamisele amehlo enu ezithombeni zenu, lichithe igazi; lizahlala kilo ilizwe yini?

²⁶Lithemba inkemba, lenze amanyala, lowo lalowo angcolise umfazi womakhelwane wakhe; kambe lizahlala kilo ilizwe yini?

²⁷Tshono lokhu kibo uthi: INkosi uJehova ithi: Ngiyazifunga mina, isibili labo abasendaweni ezichithekileyo bazabulawa; labo abasendle ngizabanikela ezilweni zibabulale, lalabo abasezinqabeni labasembalwini bazabulawa ngomatshayabhuqe wesifo.

²⁸Ngizalichitha ilizwe libe yinkangala, lamandla alo aziphakamisayo azaphela, lentaba zakoIsrayeli zibe yinkangala ukuze kungadluli muntu kuzo.

²⁹Khona bazakwazi ukuthi ngiyi Nkosi lapho sengilichithile ilizwe laba yinkangala ngenxa yamanyala abo wonke abawenzileyo.

³⁰Wena-ke, ndodana yomuntu, abantu bakini bakhuluma ngawe emidulini leminyango yezindlu, lowo lalowo uthi kumfowabo: Woza, sizwe ukuthi ilizwi lithini elivela e Nkosi ni.

³¹Ngakho abantu bami bayeza kuwe, bahlale phambi kwakho, bezwe okutshoyo, kodwa kabayikukwenza. Ngoba bathanda ngomlomo wabo, kodwa inhliziyo zabo zisenzuzweni yabo.

³²Khangela, kibo unjengomuntu ohlabela ingoma ezinhle, olelizwi elihle, owazi ukutshaya kuhle ichacho, ngoba bayezwa okutshoyo kodwa kabayikukwenza.

³³Nxa lokhu kufika, khangela, kuzafika isibili, khona bazakwazi ukuthi bekukhona umprofethi phakathi kwabo.