Read Ndebele-IBhayibhili Elingcwele 2006 Uhezekiyeli 34 Bible Online

Uhezekiyeli 34 - Ndebele-IBhayibhili Elingcwele 2006 bible

Uhezekiyeli 34

¹Ilizwi le Nkosi lafika kimi lathi:

²Ndodana yomuntu, profetha ngabelusi bakoIsrayeli, uprofethe uthi kibo: INkosi uJehova ithi: Maye kini, belusi bakoIsrayeli elizondlayo lina! Abelusi kabafanele ukwelusa izimvu yini?

³Liyadla amahwahwa, lizigqokise ngoboya, lihlabe ezinonileyo, kodwa lingazelusi izimvu.

⁴Kaliziqinisanga ezibuthakathaka, kalizelaphanga ezigulayo, lezephukileyo kalizibophanga, kalizibuyisanga eziduhileyo, lezilahlekileyo kalizidinganga, lizibusile ngamandla langolunya.

⁵Ngakho zichithekile ngoba bekungelamelusi, zaba yikudla kwazo zonke izilo zeganga.

⁶Izimvu zami zachitheka, zazulazula kuzo zonke intaba, lakiwo wonke amaqaqa aphakemeyo; izimvu zami zachitheka endaweni zonke zomhlaba, kungekho loyedwa ozilandelayo azidinge.

⁷Ngalokho-ke, lina belusi, zwanini ilizwi le Nkosi.

⁸INkosi uJehova ithi: Ngiyazifunga mina, ngoba izimvu zami seziyimpango, seziyikudla kwazo zonke izilo zeganga, ngoba kungelamelusi, langoba abelusi bami bengazidinganga izimvu zami, kodwa bezondlile bona, bengazelusanga izimvu zami.

⁹Ngakho, lina belusi, zwanini ilizwi le Nkosi.

¹⁰INkosi uJehova ithi: Khangela, ngimelene labelusi, ngizafuna izimvu zami kibo, ngibayekelise ukwelusa izimvu zami, bangaphindi ukuzondla bona. Ngizakhupha izimvu zami emilonyeni yabo ukuze zingabi yikudla kwabo.

¹¹INkosi uJehova ithi: Khangela, mina uqobo lwami ngizazilandela izimvu zami, ngizidinge.

¹²Njengomelusi edinga umhlambi wakhe lapho ezinye izimvu zakhe sezichithekile, ngokunjalo-ke ngizadinga izimvu zami, ngizikhuphe kuzo zonke indawo lapho ezihlakazekele khona ngosuku lwamayezi lomnyama onzima.

¹³Ngizazikhupha phakathi kwabantu, ngizibuthe emazweni, ngizibuyisele elizweni lazo, ngizidlise entabeni zakoIsrayeli, lemithonjeni, lakuzo zonke indawo zelizwe okwakhiwe kizo.

¹⁴Ngizazidlisa edlelweni elihle, ledlelo lazo lizakuba sezingqongeni zentaba zakoIsrayeli. Zizalala phansi elizweni eliledlelo elihle, zidle emadlelweni amahle entabeni zakoIsrayeli.

¹⁵Mina uqobo ngizakuba ngumelusi wezimvu zami, ngizilalise phansi, kutsho iNkosi uJehova.

¹⁶Ngizadinga ezilahlekileyo, ngibuyise eziduhileyo, ngibophe ezephukileyo, ngiqinise ezibuthakathaka; lezinonileyo leziqinileyo ngizazilondoloza, ngizidlise ngokulunga.

¹⁷Lina-ke, mhlambi wami, kutsho iNkosi uJehova, khangelani, ngizakwahlulela phakathi kwemvu lemvu, laphakathi kwenqama lentondolo.

¹⁸Kakwenelanga yini ukuthi lidle edlelweni elihle, lize linyathele ngenyawo ledlelo lenu eliseleyo, lokuthi linathe amanzi ahlambulukileyo lize lingcolise lamanye ngenyawo zenu?

¹⁹Izimvu zami zimele zidle lokhu okunyathelwe ngenyawo zenu, zinathe okungcoliswe ngenyawo zenu yini?

²⁰Ngakho iNkosi uJehova ithi kuzo: Khangelani, mina uqobo lwami ngizakwahlulela phakathi kwezimvu ezinonileyo lezicakileyo.

²¹Ngoba liyasunduza ngemihlubulo langamalunda, lihlabe ezibuthakathaka ngempondo zenu, zize zihlakazekele khatshana,

²²ngizazisa izimvu zami, kazisayikuba yimpango; ngizakwahlulela phakathi kwemvu lemvu.

²³Ngizazimisela umelusi abe munye, inceku yami uDavida, yena uzazelusa. Uzazidlisa abe ngumelusi wazo.

²⁴Mina Nkosi ngizakuba nguNkulunkulu wazo, lenceku yami uDavida ibe yisiphathamandla phakathi kwazo. Mina Nkosi ngikhulumile.

²⁵Ngizakwenza lazo isivumelwano sokuthula, ngixotshe izilo zeganga elizweni, ukuze zilondolozeke enkangala, zilale ehlathini.

²⁶Ngizazenza zibe yisibusiso zona lezindawo ezihanqe uqaqa lwami, ngithumele, izulu ngesikhathi salo, izulu elihle.

²⁷Izihlahla zeganga zizathela izithelo zazo, lomhlaba uveze inala, zilondolozeke elizweni lazo. Zizakwazi ukuthi ngiyi Nkosi nxa sengephule ijogwe lazo, ngazikhulula kulabo abazithumbileyo.

²⁸Kazisayikuba yimpango yezizwe, kazisayikudliwa yizilo zelizwe; zizalondolozeka, zingesatshiswa muntu.

²⁹Ngizazinika amasimu avundileyo ukuze zingabe zisaqedwa yindlala elizweni, zingabe zisaba lihlazo lezizwe.

³⁰Zizakwazi ukuthi mina Nkosi, uNkulunkulu wazo, ngilazo, lokuthi bona abantu bangabantu bami, indlu kaIsrayeli, kutsho iNkosi uJehova.

³¹Lina, bantu bami, liyizimvu zami, izimvu engizelusayo, mina nginguNkulunkulu wenu, kutsho iNkosi uJehova.