Read Ndebele-IBhayibhili Elingcwele 2006 Uhezekiyeli 35 Bible Online

Uhezekiyeli 35 - Ndebele-IBhayibhili Elingcwele 2006 bible

Uhezekiyeli 35

¹Ilizwi le Nkosi lafika kimi lathi:

²Ndodana yomuntu, khangela entabeni yeSeyiri, uprofethe ngayo,

³uthi kuyo: INkosi uJehova ithi: Khangela, ngimelene lawe, wena ntaba yeSeyiri, ngizakuphakamisela isandla sami, ngikuchithe ube yinkangala.

⁴Ngizachitha imizi yakho, uzakuba yinkangala; uzakwazi ukuthi ngiyi Nkosi.

⁵Ngoba waba lenzondo elaphakade, wanikela abantwana bakoIsrayeli ekubulaweni ngesikhathi sokuhlupheka kwabo, ngesikhathi sokutshaywa kwabo kokucina.

⁶Ngalokho, kutsho iNkosi uJehova, ngiyazifunga mina ukuthi ngizakunikela ekuchithekeni kwegazi, ukuchitheka kwegazi kuthomane lawe; ngoba ulecala lokuchitha igazi, ukuchitheka kwegazi kuzathomana lawe.

⁷Ngizachitha intaba yeSeyiri ibe yinkangala, ngiqume kusuke kiyo bonke abafikayo labasukayo.

⁸Ngizagcwalisa intaba zakho ngababuleweyo; ababuleweyo ngenkemba bazawela emaqaqeni akho lezihotsheni zakho lezindongeni zakho.

⁹Ngizakwenza ube yinkangala elaphakade, kungahlali muntu emizini yakho. Khona uzakwazi ukuthi ngiyi Nkosi.

¹⁰Ngoba utshilo wathi: Lezizizwe ezimbili, oJuda loIsrayeli, lamazwe azo kuzakuba ngokwami, sizahlala kukho, lapho i Nkosi eyayihlala khona;

¹¹ngalokho ngiyazifunga, kutsho iNkosi uJehova, ngizakuphatha ngokufanele ukuzonda kwakho lomona wakho owawenzayo ngenxa yokubazonda kwakho; ngizakwenza ukuthi ungazi nxa ngikugweba.

¹²Uzakwazi ukuthi mina Nkosi ngizwile ukuthuka kwakho owakutsho ngezintaba zakoIsrayeli usithi: Zichithekile, zinikiwe thina ukuze sizidle.

¹³Lakhuluma kubi ngami, landisa amazwi enu ngami, ngikuzwile.

¹⁴INkosi uJehova ithi: Ukuze umhlaba wonke uthokoze, ngizalichitha.

¹⁵Njengoba lathokoza ngelizwe lami uIsrayeli ngoba lachitheka, ngizakwenza njalo kuwe, uzachitheka, wena ntaba yeSeyiri, leEdoma lonke. Khona bazakwazi ukuthi ngiyi Nkosi.