Read Ndebele-IBhayibhili Elingcwele 2006 Uhezekiyeli 36 Bible Online

Uhezekiyeli 36 - Ndebele-IBhayibhili Elingcwele 2006 bible

Uhezekiyeli 36

¹Ndodana yomuntu, profetha ngentaba zakoIsrayeli uthi: Lina zintaba zakoIsrayeli, zwanini ilizwi le Nkosi.

²INkosi uJehova ithi: Ngoba izitha zatsho kini zathi: Iya! khathesi intaba zasendulo sezingezethu;

³ngalokho-ke profetha uthi: INkosi uJehova ithi: Ngoba abantu abalihanqileyo balichitha, balichoboza laze lanqotshwa langezinye izizwe, laba yingxoxo lokunyeya okubi kwabantu.

⁴Ngalokho, lina zintaba zakoIsrayeli, zwanini ilizwi leNkosi uJehova ezintabeni lemaqaqeni, lezindongeni lezihotsheni, lemizini echithekileyo langamanxiwa asephenduke impango lenhlekisa yezizwe ezizingelezeleyo.

⁵INkosi uJehova ithi: Ngikhuluma ngomona wami otshisayo ngezinye izizwe, ikakhulu ngeEdoma lonke, abazithathela ilizwe lami ngentokozo langokudelela ukuze libe ngelabo, bahlale kilo.

⁶Ngalokho profetha ngelizwe lakoIsrayeli, utsho ezintabeni lemaqaqeni, lezindongeni lezihotsheni uthi: INkosi uJehova ithi: Khangela, ngikhuluma ngomona wami langolaka lwami, ngoba lithwele ihlazo lezizwe.

⁷Ngalokho-ke iNkosi uJehova ithi: Ngiyazifunga ukuthi izizwe ezilihanqileyo yizo ezizathwala ihlazo.

⁸Kodwa, lina zintaba zakoIsrayeli, lizahluma ingatsha zenu, livezele abantu bami uIsrayeli izithelo, ngoba sebezabuya ekhaya.

⁹Ngoba khangelani, mina ngilani, ngizaphendukela ngakini, lizalinywa lihlanyelwe.

¹⁰Ngizakwandisa abantu phezu kwenu, uIsrayeli wonke, wonke ngoluthi lwakhe; imizi izahlala abantu, kwakhiwe lendawo ezichithekileyo;

¹¹ngandise phezu kwenu abantu lenyamazana, kuzalane kwande. Ngizakwenza ukuthi kwakhiwe kini njengakudala, ngilenzele okuhle kakhulu kulakuqala. Ngalokho, lina zintaba, lizakwazi ukuthi ngiyi Nkosi.

¹²Ngizahambisa abantu phezu kwenu, yebo abantu bami uIsrayeli. Bazahlala kini, libe zintaba zabo, kalisayikubabulala abantwana babo.

¹³INkosi uJehova ithi: Abantu bathi liyilizwe elidla abantu, libulala abantwana besizwe sakini.

¹⁴Kodwa kalisayikudla abantu, kalisayikubulalela isizwe sakini abantwana baso, kutsho iNkosi uJehova.

¹⁵Kangisayikuliyekela lizwe inhlamba yezizwe futhi, kalisayikuthwala ihlazo labantu loba likhubekise isizwe sakini, kutsho iNkosi uJehova.

¹⁶Ilizwi le Nkosi lafika kimi lathi:

¹⁷Ndodana yomuntu, lapho uIsrayeli esahlala elizweni lakhe, walingcolisa ngendlela zakhe langezenzo zakhe, ukuziphatha kwakhe phambi kwami kwakufanana lokungcola kowesifazana owehlukanisiweyo.

¹⁸Ngakho ngasengehlisela phezu kwabo ulaka lwami ngenxa yegazi abalichitha elizweni, langenxa yezithombe abalingcolisa ngazo.

¹⁹Ngabachithachitha phakathi kwezizwe, bahlakazekela emazweni wonke; ngabagweba ngokufanele ukuziphatha kwabo lezenzo zabo.

²⁰Kodwa nxa befika ezizweni lakuyiphi indawo abafika kiyo, bangcolisa ibizo lami elingcwele, abantu baze bathi ngabo: Laba bangabantu be Nkosi, kodwa bakhutshiwe elizweni layo.

²¹Kodwa ngalikhathalela ibizo lami elingcwele abalingcolisayo indlu kaIsrayeli phakathi kwezizwe abaya kizo.

²²Ngalokho tshono kuIsrayeli uthi: INkosi uJehova ithi: Kangikwenzi lokhu ngenxa yenu, lina Israyeli, kodwa ngikwenza ngenxa yebizo lami elingcwele elilingcolisileyo phakathi kwezizwe elaya kizo.

²³Ngizabonakalisa ubungcwele bebizo lami elikhulu elingcoliswe phakathi kwezizwe, elilingcolisileyo lina phakathi kwazo; lezizwe zizakwazi ukuthi ngiyi Nkosi, kutsho iNkosi uJehova, nxa sengibonakalisa ubungcwele bebizo lami ngani phambi kwazo.

²⁴Ngoba ngizalithatha ezizweni, ngilibuthe emazweni wonke, ngililethe elizweni lenu.

²⁵Ngizalifafaza ngamanzi ahlambulukileyo, lihlambuluke kukho konke ukungcola kwenu, ngilihlambulule lakuzo zonke izithombe zenu.

²⁶Njalo ngizalinika inhliziyo entsha, ngifake lomoya omutsha phakathi kwenu, ngikhuphe inhliziyo yelitshe enyameni yenu, ngilinike inhliziyo yenyama.

²⁷Njalo ngizafaka uMoya wami phakathi kwenu, ngilenze ukuthi lihambe ngezimiso zami, ligcine izahlulelo zami lizenze.

²⁸Lizahlala elizweni engalinika oyihlo, libe ngabantu bami, lami ngibe nguNkulunkulu wenu.

²⁹Ngizalikhulula kukho konke okulingcolisayo. Ngizabiza amabele, ngiwenze abe manengi, ngingalehliseli indlala.

³⁰Ngizakwenza izithelo zezihlahla lezithelo zeganga zibe zinengi, ukuze lingaphindi futhi lithwale ihlazo lendlala phakathi kwezizwe.

³¹Khona lizakhumbula izindlela zenu ezimbi, lezenzo zenu ezingalunganga; lizanengeka ngani ngokwenu ngenxa yezono zenu langenxa yamanyala enu.

³²Kangi kw enzi lokhu ngenxa yenu, itsho iNkosi uJehova; kakwaziwe yini. Banini lenhloni, liyangeke ngenxa yendlela zenu, ndlu kaIsrayeli.

³³INkosi uJehova ithi: Mhla ngilihlambulula ebubini benu bonke, ngizakwenza ukuthi imizi ihlale abantu, kwakhiwe indawo ezichithekileyo.

³⁴Ilizwe ebeselichithekile lizalinywa futhi, endaweni yokuthi libe yinkangala kubo bonke abedlula khona.

³⁵Bazakuthi: Lelilizwe ebeseliyinkangala selifanana lensimu yeEdeni; lemizi ebisichithekile isiyinkangala isingamanxiwa, isibiyelwe ngemithangala ihlala abantu.

³⁶Izizwe ezisele zilizingelezele zizakwazi ukuthi mina Nkosi ngizakhile indawo ezingamanxiwa, ngahlanyela kutsha ilizwe ebeseliyinkangala. Mina Nkosi ngikhulumile, ngizakwenza.

³⁷INkosi uJehova ithi: Lalokhu indlu kaIsrayeli izangicela ukuthi ngiyenzele khona, ukuze ngandise abantu babo ngangomhlambi,

³⁸ngangomhlambi womhlatshelo, ngangomhlambi eJerusalema ngesikhathi semikhosi emisiweyo. Ngokunjalo imizi echithekileyo izagcwala abantu. Khona bazakwazi ukuthi ngiyi Nkosi.