Read Ndebele-IBhayibhili Elingcwele 2006 Uhezekiyeli 37 Bible Online

Uhezekiyeli 37 - Ndebele-IBhayibhili Elingcwele 2006 bible

Uhezekiyeli 37

¹Isandla se Nkosi sasiphezu kwami, sangikhupha ngomoya we Nkosi, sangibeka phansi esihotsheni, sasigcwele amathambo.

²Yangizulisa phakathi kwawo, khangela, ayemanengi kakhulu esihotsheni, njalo khangela, ayomile kakhulu.

³Yathi kimi: Ndodana yomuntu, kambe amathambo la angaphila yini? Ngaphendula ngathi: Nkosi Jehova, nguwe owaziyo.

⁴Yasisithi kimi futhi: Profetha kulamathambo, uthi kiwo: Lina mathambo omileyo, zwanini ilizwi le Nkosi.

⁵INkosi uJehova ithi kulamathambo omileyo: Khangelani, ngizangenisa umoya kini, liphile.

⁶Ngizabeka imisipha phezu kwenu, ngihlumise inyama phezu kwenu, ngilifake isigogo, ngilifake umoya, liphile. Lizakwazi ukuthi ngiyi Nkosi.

⁷Ngasengiprofetha njengokulaywa kwami. Kwathi ngisaprofetha, khangela, kwaba khona umsindo lokukhehlezela. Amathambo abuthana ndawonye, ithambo laba sethanjeni lalo.

⁸Ngabona, khangela-ke, imisipha kiwo, lenyama yahluma phezu kwawo, lesigogo sawembesa. Kodwa kwakungelamoya kiwo.

⁹Yasisithi kimi: Profetha emoyeni, profetha ndodana yomuntu, uthi emoyeni: INkosi uJehova ithi: Woza moya, uvele endaweni zonke, uphefumulele kulaba ababuleweyo ukuze baphile.

¹⁰Ngasengiprofetha njengokungilaya kwayo; umoya wangena kiwo, aphila, ema ngenyawo zawo, aba lixuku elikhulu kakhulu.

¹¹Yasisithi kimi: Ndodana yomuntu, amathambo la anguIsrayeli wonke. Khangela, bathi: Amathambo ethu omile, lethemba lethu lilahlekile, sesiphelile.

¹²Ngakho-ke profetha uthi kibo: INkosi uJehova ithi: Khangela, ngizavula amangcwaba enu, ngilivuse emalibeni enu, lina bantu bami, ngilibuyise elizweni lakoIsrayeli.

¹³Lizakwazi ukuthi ngiyi Nkosi nxa ngivula amangcwaba enu, ngilivusa emalibeni enu, bantu bami.

¹⁴Ngizafaka umoya wami kini, liphile, ngizalibeka kwelenu ilizwe; khona lizakwazi ukuthi mina Nkosi ngikhulumile, lokuthi ngikwenzile, kutsho i Nkosi.

¹⁵Ilizwi le Nkosi lafika kimi lathi:

¹⁶Ndodana yomuntu, thatha intonga, ubhale kiyo uthi: NgekaJuda loIsrayeli ahlangene laye. Uthathe enye intonga, ubhale kiyo uthi: NgekaJosefa, intonga kaEfrayimi, loIsrayeli wonke ahlangene laye.

¹⁷Uzixhume zibe yintonganye esandleni sakho.

¹⁸Lapho abantu bakini besithi kuwe: Ungasitshela yini ukuthi zitshoni lezi?

¹⁹uthi kibo: INkosi uJehova ithi: Khangela, sengizathatha intonga kaJosefa, esesandleni sikaEfrayimi, lezizwe zonke zakoIsrayeli ezihlangene laye, ngiyixhume entongeni kaJuda, zibe yintonganye esandleni sami.

²⁰Ziphathe intonga obhala kizo ukuze abantu bazibone,

²¹uthi kibo: INkosi uJehova ithi: Khangela, ngizathatha abantwana bakoIsrayeli ezizweni abaya kizo, ngibabuyise bevela endaweni zonke, ngibalethe elizweni labo;

²²ngizabenza babe yisizwe sinye elizweni phezu kwezintaba zakoIsrayeli, babuswe yinkosinye, bangabe besaba yizizwe ezimbili lemibuso emibili eyehlukeneyo.

²³Kabasayikuzingcolisa futhi ngezithombe zabo langezinto zabo ezenyanyekayo, langeziphambeko zabo. Kodwa ngizabakhupha kukho konke ukuhlamuka abona ngakho, ngibahlambulule babe ngabantu bami, mina ngibe nguNkulunkulu wabo.

²⁴Inceku yami uDavida uzakuba yiNkosi yabo, babe lomelusi munye. Bazalandela imithetho yami, bananzelele ukugcina izimiso zami.

²⁵Bazahlala elizweni elalihlala oyihlo engalinika inceku yami uJakobe; bona kanye labantwana babo labantwana babantwana babo bahlale khona kokuphela. UDavida inceku yami uzakuba yisiphathamandla sabo kokuphela.

²⁶Ngizakwenza labo isivumelwano sokuthula, sibe yisivumelwano esilaphakade. Ngizababusisa ngibandise, ngakhe indlu yami engcwele phakathi kwabo kokuphela.

²⁷Indawo yami yokuhlala izakuba kibo, ngibe nguNkulunkulu wabo, babe ngabantu bami.

²⁸Khona izizwe zizakwazi ukuthi mina Nkosi ngenza uIsrayeli abe ngcwele nxa indlu yami engcwele isiphakathi kwabo kokuphela.