Read Ndebele-IBhayibhili Elingcwele 2006 Uhezekiyeli 38 Bible Online

Uhezekiyeli 38 - Ndebele-IBhayibhili Elingcwele 2006 bible

Uhezekiyeli 38

¹Ilizwi le Nkosi lafika kimi lathi:

²Ndodana yomuntu, khangela kuGogi, isiphathamandla seRoshi leMesheki leTubali, elizweni leMagogi, uprofethe ngaye,

³uthi: INkosi uJehova ithi: Khangela, ngimelene lawe, Gogi, sikhulu seRoshi leMesheki leTubali.

⁴Ngizakuphendula, ngifake ingwegwe emihlathini yakho, ngikukhuphe wena lebutho lakho lonke, amabhiza labagadi bamabhiza, bonke begqoke izigqoko zensimbi. bephelele, belixuku elikhulu, bonke bephethe ihawu lesihlangu esikhulu, begweba ngezinkemba.

⁵AbePerisiya labeKushi labePuti balabo, belezihlangu lezingowane bonke,

⁶iGomeri lamaxuku alo wonke, iBeti-Togarima lamaxuku alo elivela endaweni ezikhatshana zenyakatho, abantu abanengi abakanye lawe.

⁷Lunga, uhlale ulungile, wena kanye lawo wonke amaxuku abuthene kuwe, ube ngumkhokheli wawo.

⁸Emva kwensuku ezinengi uzahanjelwa; eminyakeni ezayo uzahlasela ilizwe elathathwa enkembeni, elilabantu ababuthwa ezizweni ezinengi, babekwa entabeni zakoIsrayeli ebeziyinkangala isikhathi eside. Bona abakhutshwa ezizweni bazahlala khona bangethuki, bonke ngoluthi lwabo.

⁹Uzaqhubeka, uze njengesiphepho, ube njengeyezi elisibekele umhlaba, wena lawo wonke amaxuku akho, abantu abanengi belawe.

¹⁰INkosi uJehova ithi: Ngalolosuku kuzafika imicabango engqondweni yakho, wenze amacebo amabi,

¹¹uthi: Ngizahlasela ilizwe elilemizi engabiyelwanga, ngibulale abantu abahlala ngokuthula bengethuki lutho, bonke behlala emizini engelamiduli, lengelamasango lemigoqo,

¹²ngithathe impango ngiyithumbe, ngihlasele indawo ebezichithekile esezilabantu, ngihlasele abantu ababuthwe ezizweni abazuze izifuyo lempahla, abahlala enkabeni yomhlaba.

¹³IShebha leDedani, labathengisi beTarshishi lawo wonke amabhongo ezilwane layo bazakuthi kuwe: Uzile yini ukuthatha impango yini? Ubuthanisile ixuku lakho ukuthumba impango, uthathe isiliva legolide, uthathe izifuyo lempahla, uthumbe impango enengi yini?

¹⁴Ngalokho-ke, ndodana yomuntu, profetha kuGogi uthi: INkosi uJehova ithi: Ngalolosuku nxa isizwe sami uIsrayeli sesihlala singethuki, uzavuka,

¹⁵uphume endaweni yakini, endaweni ezikhatshana zenyakatho, wena labantu abanengi kanye lawe, bonke begade amabhiza, belixuku elikhulu lebutho elilamandla.

¹⁶Uzahlasela abantu bami uIsrayeli njengeyezi lisibekela umhlaba. Ensukwini zokucina ngizakuqhubeza lelizwe lami ukuze izizwe zingazi, nxa ngibonakalisa ngawe ubungcwele bami phambi kwazo, wena Gogi.

¹⁷INkosi uJehova ithi: Ekukhulumeni kwami ngenceku zami abaprofethi ensukwini zasendulo, abaprofetha futhifuthi ngalezonsuku, kwakungawe engasonga ukumletha ukuhlasela koIsrayeli.

¹⁸Kodwa ngalolosuku azafika ngalo uGogi elizweni lakoIsrayeli, ulaka lwami luzavutha, kutsho iNkosi uJehova.

¹⁹Ngoba ngomona wami langolaka lwami oluvuthayo ngithi: Ngalolosuku kuzakuba khona ukunyikinyeka okukhulu elizweni lakoIsrayeli.

²⁰Inhlanzi zolwandle, lenyoni zamazulu, lenyamazana zeganga, lazo zonke izinto ezihahabayo phansi, labo bonke abantu abakhona emhlabeni, kuzathuthumela phambi kwami; intaba zizadilizelwa phansi, kudilike amawa, lemiduli yonke iwele phansi.

²¹Ngizambizela konke okwesabekayo uGogi, kutsho iNkosi uJehova. Abantu bakhe bonke bazabulalana.

²²Ngizamjezisa ngomatshayabhuqe wesifo langokuchitheka kwegazi, ngehlisele phezu kwakhe lamaxuku akhe labo bonke abantu abalaye izulu lesiqhotho lomlilo lesolufa*.

²³Ngalokho ngizaveza ubukhulu bami lobungcwele bami, ngizibonakalise ezizweni ezinengi; khona-ke bazakwazi ukuthi ngiyi Nkosi.