Read Ndebele-IBhayibhili Elingcwele 2006 Uhezekiyeli 39 Bible Online

Uhezekiyeli 39 - Ndebele-IBhayibhili Elingcwele 2006 bible

Uhezekiyeli 39

¹Wena-ke, ndodana yomuntu, profetha ngoGogi uthi: INkosi uJehova ithi: Khangela, ngimelene lawe, Gogi, sikhulu esikhulu seRoshi leMesheki leTubali.

²Ngizakuphendula, ngikuqhube, ngikukhuphe endaweni ezikhatshana zenyakatho, ngikuse entabeni zakoIsrayeli.

³Besengitshayela phansi idandili elisesandleni sakho sokhohlo, ngiwisele phansi imitshoko esandleni sakho sokunene.

⁴Uzawela phezu kwezintaba zakoIsrayeli, wena lamaxuku akho wonke labantu abalawe. Ngizakunikela emanqeni lezilweni zeganga ukuze kukudle.

⁵Uzawela endle, ngoba ngikhulumile, kutsho iNkosi uJehova.

⁶Ngizathumela umlilo kuMagogi lakulabo abahlala ngokulondolozeka ezihlengeni. Bazakwazi ukuthi ngiyi Nkosi.

⁷Ngizakwenza ukuthi ibizo lami laziwe phakathi kwabantu bami uIsrayeli, kangisayikuyekela ibizo lami elingcwele lingcoliswe futhi; lezizwe zizakwazi ukuthi ngiyi Nkosi, oNgcwele kaIsrayeli.

⁸Khangelani, kuyeza kuzakwenzeka, kutsho iNkosi uJehova; yilo lolosuku engakhuluma ngalo.

⁹Kuzakuthi labo abahlala emizini yakoIsrayeli baphume, babuthe izikhali, babase umlilo ngazo, izihlangu ezikhulu lamahawu lamadandili lemitshoko lezinduku lemikhonto, bakubase iminyaka eyisikhombisa,

¹⁰ukuze bangathezi inkuni egangeni, loba bazigamule eguswini, ngoba bazabasa imililo yabo ngezikhali; bazakwemuka labo ababemukayo, baphange labo ababaphangayo, kutsho iNkosi uJehova.

¹¹Ngalolosuku ngizanika uGogi indawo yokungcwabela koIsrayeli isihotsha saseAbarimi, esingempumalanga kolwandle. Bazangcwatshelwa lapho uGogi lawo wonke amaxuku akhe, ligcwale lonke iAbarimi, balibize ngokuthi yisiHotsha samaxuku kaGogi.

¹²UIsrayeli uzabangcwaba inyanga eziyisikhombisa ukuze ilizwe lihlambuluke.

¹³Bonke abantu belizwe bazasiza ukubangcwaba, kubalethele udumo mhla ngibonakalisa inkazimulo yami, kutsho iNkosi uJehova.

¹⁴Bazamisa abantu abazahambahamba phakathi kwelizwe, bangcwabe labo abaseleyo elizweni ukuze lihlambuluke. Ekupheleni kwenyanga eziyisikhombisa bazaqalisa ukuhlola.

¹⁵Nxa behambahamba phakathi kwelizwe, omunye abone ithambo lomuntu, uzamisa isibonakaliso phansi kwalo, baze balingcwabe abangcwabayo esiHotsheni samaxuku kaGogi.

¹⁶Kukhona umuzi lapho othiwa iHamona. Bazahlambulula ilizwe ngokunjalo.

¹⁷Wena-ke, ndodana yomuntu, kutsho iNkosi uJehova, khuluma lenyoni zenhlobo zonke lenyamazana zonke zeganga, uthi: Hlanganani lize, buthanani livela indawo zonke lize edilini lomhlatshelo engililungiselele lona, idili elikhulu lomhlatshelo eliphezu kwentaba zakoIsrayeli, lizakudla inyama linathe igazi.

¹⁸Lizakudla inyama yamaqhawe, linathe igazi leziphathamandla zomhlaba; banjengezinqama, lamawundlu, lezimbuzi, lamajongosi, lezinonileyo zeBashani.

¹⁹Lizakudla amahwahwa lize lisuthe, linathe igazi lize lidakwe, edilini lomhlatshelo engililungisela lona.

²⁰Lizasutha etafuleni lami amabhiza labagadi lamaqhawe lamadoda wonke empi, kutsho iNkosi uJehova.

²¹Ngizamisa inkazimulo yami phakathi kwezizwe; izizwe zonke zizabona isigwebo engisenzileyo, lesandla sami engisehlisele phezu kwabo.

²²Indlu kaIsrayeli izakwazi ukuthi ngiyi Nkosi uNkulunkulu wabo kusukela kulolosuku.

²³Lezizwe zizakwazi ukuthi indlu kaIsrayeli yathunjwa ngenxa yesono sayo, ngoba bangikhohlisa kakhulu ngaze ngafihla ubuso bami kibo, ngabanikela ezandleni zezitha zabo, bawa ngenkemba.

²⁴Ngabaphatha ngokufanele ukungcola kwabo leziphambeko zabo, ngabafihlela ubuso bami.

²⁵Ngalokho-ke iNkosi uJehova ithi: Sengizabuyisa abantu bakaJakobe, ngibe lesihawu kuIsrayeli wonke, ngibe lobukhwele langebizo lami elingcwele.

²⁶Bazakhohlwa ihlazo labo lokungikhohlisa kwabo konke, nxa sebehlale elizweni labo kungasekho lobethusayo,

²⁷lapho sengibakhuphile ebantwini, ngabaqoqa emazweni ezitha zabo, ngabonakalisa ubungcwele bami ngabo phambi kwezizwe.

²⁸Bazakwazi ukuthi ngiyiNkosi uJehova wabo ngoba ngabaxotshela phakathi kwezizwe, ngabuye ngabaqoqela elizweni labo. Kangisayikutshiya loyedwa wabo phakathi kwezizwe.

²⁹Kangisayikubafihlela ubuso bami nxa sengithela umoya wami phezu kukaIsrayeli, kutsho iNkosi uJehova.