Read Ndebele-IBhayibhili Elingcwele 2006 Uhezekiyeli 40 Bible Online

Uhezekiyeli 40 - Ndebele-IBhayibhili Elingcwele 2006 bible

Uhezekiyeli 40

¹Ngomnyaka wamatshumi amabili lanhlanu wokuthunjwa kwethu, ekuqaliseni komnyaka, ngosuku lwetshumi lwenyanga, ngomnyaka wetshumi lane emva kokutshaywa komuzi, ngalolosuku, isandla se Nkosi saba phezu kwami.

²Ngombono uNkulunkulu wangisa elizweni lakoIsrayeli, wangibeka phezu kwentaba ende kakhulu, lapho engabona khona okwakungathi yindlu zomuzi kuphambi kwami.

³Lapho angiletha khona, khangela, kwakukhona umuntu olesimo esifanana lethusi, ephethe intambo ephothiweyo lomhlanga wokulinganisa, emi esangweni.

⁴Lowomuntu wathi kimi: Ndodana yomuntu, khangela ngamehlo akho, uzwe ngendlebe zakho, ubeke ingqondo yakho kulokho konke engizakutshengisa khona, ngoba ulethelwe ukuthi ngikutshengise khona, utshumayele koIsrayeli konke lokho ozakubona.

⁵Khangela, kwakukhona umduli ngaphandle ozingelezele indawo yethempeli, ubude bomhlanga wokulinganisa owawuphethwe ngulowomuntu babuzingalo eziyisithupha, ubude bengalo inye buyingalo lesandla. Waselinganisa ubuqatha bomduli, balingana lomhlanga munye, lobude balingana lomhlanga munye.

⁶Wasesiya esangweni elikhangele impumalanga, wakhwela ngezinyathelo, walinganisa umbundu wesango, walingana lomhlanga munye ukutshona kwawo.

⁷Walinganisa izindlu eziseceleni, zaba ngumhlanga munye ubude, lomhlanga munye ububanzi. Walinganisa umkhandlo ophakathi kwezindlu eziseceleni, waba zingalo ezinhlanu. Umbundu wesango ongasendlini engasekungeneni kwesango langaphakathi waba ngumhlanga munye.

⁸Waselinganisa indlu engasekungeneni, yaba zingalo eziyisificaminwembili,

⁹lensika zayo zaba zingalo ezimbili. Indlu esesangweni yayisekucineni ngaphakathi.

¹⁰Kwakukhona izindlu ezintathu ngapha langapha kwesango langasempumalanga, zontathu zazilingana, lensika zangapha langapha zazilingana.

¹¹Waselinganisa ububanzi besango, baba zingalo ezilitshumi, lobude besango baba zingalo ezilitshumi lantathu.

¹²Kwakukhona umnxibo phambi kwezindlu eziseceleni, uyingalo ngapha langapha. Izindlu eziseceleni zazizingalo eziyisithupha ngapha langapha.

¹³Waselinganisa isango kusukela ngasemva kwenye indlu kusiya ngasemva kwenye, kwaba zingalo ezingamatshumi amabili lanhlanu ububanzi, kusukela emnyango kusiya emnyango.

¹⁴Waselinganisa indlu esekungeneni, yaba zingalo ezingamatshumi amabili; kwakukhona iguma elizingelezele indlu engasekungeneni kwesango.

¹⁵Kusukela ngaphambi kwesango ekungeneni kuze kube sekucineni ngaphakathi endlini esekungeneni kwesango kwaba zingalo ezingamatshumi amahlanu.

¹⁶Emaceleni womabili esango kwakulamawindi, ezindlini eziseceleni emkhandlweni ophakathi kwazo; kwakukhona amawindi indawo zonke zendlu engasekungeneni kwesango, lezihlahla zelala zicecise izinsika.

¹⁷Wasengisa egumeni elingaphandle, khangela, kwakukhona lapho izindlwana lendawo egandelweyo kuzingelezele iguma, izindlwana ezingamatshumi amathathu zingaphambi kwendawo egandelweyo.

¹⁸Indawo egandelweyo yayisemasangweni, ilingana lobude bamasango, yayiyindawo engaphansi.

¹⁹Waselinganisa ububanzi beguma, kusukela ngaphambi kwesango elingaphansi kusiya ngaphandle kwesango elingaphakathi, kwaba zingalo ezilikhulu. Wasengisa ngenyakatho.

²⁰Kwakukhona lapho isango elalikhangele inyakatho, lilisango leguma langaphakathi. Walinganisa ubude balo lobubanzi balo.

²¹Lezindlu zalo ezintathu ngapha langapha lensika zalo lendlu yazo engasekungeneni kwakulingana lokwesango lokuqala. Ubude balo babuzingalo ezingamatshumi amahlanu, lobubanzi balo babuzingalo ezingamatshumi amabili lanhlanu.

²²Amawindi alo, lendlu yalo engasekungeneni, lezihlahla zalo zamalala kwakulingana lokwesango elikhangele impumalanga. Kwakulezinyathelo eziyisikhombisa eziya kilo, lendlu esekungeneni yayingaphakathi.

²³Maqondana lesango ngenyakatho, njengempumalanga, kwakukhona isango leguma, walinganisa kusukela esangweni kusiya esangweni, kwaba zingalo ezilikhulu.

²⁴Wasengisa ngeningizimu, khangela, kwakukhona isango ngeningizimu; walinganisa insika zalo lendlu yalo esekungeneni, kwakulingana lezinye.

²⁵Kwakukhona kilo amawindi inhlangothi zonke lendlini yalo ekungeneni, ayefanana lamanye amawindi. Ubude balo babuzingalo ezingamatshumi amahlanu, lobubanzi balo buzingalo ezingamatshumi amabili lanhlanu.

²⁶Kwakukhona izinyathelo eziyisikhombisa eziya kilo, lendlu esekungeneni yayiphakathi; kwakulezihlahla zamalala ensikeni zalo, ngapha langapha kwalo.

²⁷Kwakukhona isango ngeningizimu kweguma elingaphakathi; walinganisa kusukela esangweni kusiya esangweni ngeningizimu, kwaba zingalo ezilikhulu.

²⁸Wasengiletha egumeni elingaphakathi ngesango leningizimu, walinganisa isango leningizimu, lalilingana lamanye.

²⁹Indlu zalo eziseceleni lensika zalo lendlu yalo esekungeneni zazilingana lezinye. Kwakukhona kilo amawindi inhlangothi zonke lendlini yalo ekungeneni. Ubude balo babuzingalo ezingamatshumi amahlanu, lobubanzi balo buzingalo ezingamatshumi amabili lanhlanu.

³⁰Kwakukhona izindlu ezisekungeneni inhlangothi zonke, ubude bazo buzingalo ezingamatshumi amabili lanhlanu, lobubanzi bazo buzingalo ezinhlanu.

³¹Indlu yalo esekungeneni yayikhangele iguma elingaphandle, kukhona izihlahla zamalala ensikeni zalo; kwakukhona izinyathelo eziyisificaminwembili zokuya kilo.

³²Wasengisa egumeni elingaphakathi ngempumalanga, walinganisa isango, lalilingana lamanye.

³³Indlu zalo eziseceleni, lensika zalo, lendlu yalo esekungeneni zazilingana lezinye; kwakukhona kilo amawindi inhlangothi zonke lendlini yalo ekungeneni. Ubude balo babuzingalo ezingamatshumi amahlanu, lobubanzi balo buzingalo ezingamatshumi amabili lanhlanu.

³⁴Indlu yalo esekungeneni yayikhangele iguma elingaphandle, kukhona izihlahla zamalala ensikeni zalo, ngapha langapha kwalo; kwakukhona izinyathelo eziyisificaminwembili zokuya kilo.

³⁵Wasengisa esangweni elingenyakatho, walilinganisa, lalilingana lamanye.

³⁶Indlu zalo eziseceleni, lensika zalo, lendlu yalo esekungeneni zazilingana lezinye; lalilamawindi inhlangothi zonke; ubude balo babuzingalo ezingamatshumi amahlanu, lobubanzi balo buzingalo ezingamatshumi amabili lanhlanu.

³⁷Indlu yalo esekungeneni yayikhangele iguma elingaphandle, kwakukhona izihlahla zamalala ensikeni zalo. ngapha langapha kwalo, kwakukhona izinyathelo eziyisificaminwembili zokuya kilo.

³⁸Kwakukhona indlu eyayilomnyango ongasendlini esekungeneni kwesango, lapho okwakuzageziselwa khona umnikelo wokutshiswa.

³⁹Endlini esekungeneni kwesango kwakukhona amatafula amabili ngapha langapha, okwakuzahlatshelwa kiwo umnikelo wokutshiswa lomnikelo wesono lomnikelo wecala.

⁴⁰Ngaphandle kwendlu esekungeneni, ekungeneni kwesango elingenyakatho, kwakukhona amatafula amabili, langaphakathi kwendlu esekungeneni kwesango kwakukhona amatafula amabili.

⁴¹Amatafula amane ayengaphakathi, lamatafula amane ayengaphandle, eceleni kwesango, wonke ayeyisificaminwembili lapho okwakuzahlatshelwa khona umhlatshelo.

⁴²Kwakukhona futhi amatafula amane ayenziwe ngamatshe abaziweyo, angawomnikelo wokutshiswa. ubude bawo buyingalo lengxenye eyodwa kwezimbili, lobubanzi bawo buyingalo lengxenye eyodwa kwezimbili, lokuphakama kwawo kuyingalo, okwakuzabekwa kiwo izinto zokuhlaba umnikelo wokutshiswa leminye iminikelo.

⁴³Imibundu, ubude bayo bungangesandla, yayifakiwe ngaphakathi inhlangothi zonke. Ematafuleni kwakuzabekwa inyama yomnikelo.

⁴⁴Wasengingenisa egumeni elingaphakathi. kwakukhona egumeni elingaphakathi izindlu ezimbili. Enye isesangweni elingenyakatho, ikhangele iningizimu, lenye ingasesangweni elingeningizimu, ikhangele inyakatho.

⁴⁵Wasesithi kimi: Lindlu ekhangele iningizimu ngeyabapristi abaphethe ithempeli,

⁴⁶lendlu ekhangele inyakatho ngeyabapristi abaphethe ilathi. Ngitsho amadodana kaZadoki okuyiwona wodwa phakathi kwamadodana kaLevi angasondela e Nkosi ni ukuyikhonza.

⁴⁷Waselinganisa iguma, ubude balo baba yizingalo ezilikhulu. lobubanzi balo buzingalo ezilikhulu. inhlangothi zonke, lelathi laliphambi kwethempeli.

⁴⁸Wasengiletha endlini esekungeneni kwethempeli, walinganisa insika zendlu, zaba zingalo ezinhlanu inhlangothi zonke; ububanzi besango baba zingalo ezilitshumi lane; lobubanzi bemiduli eseceleni kwesango baba zingalo ezintathu ngapha langapha.

⁴⁹Ubude bendlu esekungeneni babuzingalo ezingamatshumi amabili, lobubanzi bayo buzingalo ezilitshumi lambili; kwakukhona izinyathelo ezilitshumi eziya kilo; kwakukhona insika ekungeneni kwesango inhlangothi zombili.