Read Ndebele-IBhayibhili Elingcwele 2006 Uhezekiyeli 41 Bible Online

Uhezekiyeli 41 - Ndebele-IBhayibhili Elingcwele 2006 bible

Uhezekiyeli 41

¹Wasengingenisa ethempelini, walinganisa insika, ububanzi bazo babuzingalo eziyisithupha inhlangothi zonke.

²Ububanzi bomnyango babuzingalo ezilitshumi, lobubanzi bemiduli eseceleni kwesango babuzingalo ezinhlanu ngapha langapha. Waselinganisa ubude bethempeli, baba zingalo ezingamatshumi amane, lobubanzi balo baba zingalo ezingamatshumi amabili.

³Wasengena endlini engaphakathi, walinganisa insika zomnyango, zaba zingalo ezimbili, lobubanzi bomnyango baba zingalo eziyisithupha; lemiduli eseceleni kwesango yaba zingalo eziyisikhombisa.

⁴Walinganisa ubude bendlu esekucineni, baba zingalo ezingamatshumi amabili, lobubanzi bayo baba zingalo ezingamatshumi amabili. Wasesithi kimi: Lokhu kuyingcwele yezingcwele.

⁵Waselinganisa umduli wethempeli, ubuqatha bawo baba zingalo eziyisithupha. Ububanzi bezindlu eziseceleni baba zingalo ezine, inhlangothi zonke zethempeli.

⁶Izindlu eziseceleni zazelekene zintathu, enye phezu kwenye, zingamatshumi amathathu mzila munye. Kwakulezisekelo emdulini wethempeli ezisekele izindlu eziseceleni ukuze zingaqiniswa ngumduli wethempeli.

⁷Izindlu eziseceleni zaqhela zaba banzi ekuphakameni kwazo kusukela kwenye indlu kusiya kwenye, zivumelana lokuqhela kwezisekelo kusukela kwenye indlu kusiya kwenye, inhlangothi zonke zethempeli. Ethempelini kwakukhona ilele, ukuze umuntu asuke endlini engaphansi, adabule kwephakathi, ukuya kwephezulu.

⁸Ngabona futhi ukuthi ithempeli lalilendawo edundubeleyo inhlangothi zonke. Izisekelo zezindlu eziseceleni zazilingana lomhlanga owodwa olobude obuzingalo eziyisithupha.

⁹Ubuqatha bomduli wangaphandle wezindlu eziseceleni babuzingalo ezinhlanu; lengxenye yendawo edundubeleyo eyayisele yayizingalo ezinhlanu.

¹⁰Indawo edundubeleyo engaphandle kwezindlu eziseceleni ezizingelezele ithempeli ububanzi bayo babuzingalo ezingamatshumi amabili.

¹¹Izivalo zezindlu eziseceleni zavulelwa endaweni edundubeleyo eseleyo, esinye isivalo sivulelwa enyakatho lesinye sivulelwa eningizimu; ububanzi bendawo eseleyo babuzingalo ezinhlanu inhlangothi zonke.

¹²Indlu eyayikhangele iguma lethempeli ngentshonalanga, ububanzi bayo babuzingalo ezingamatshumi ayisikhombisa, lobuqatha bomduli wayo babuzingalo ezinhlanu inhlangothi zonke, lobude bawo babuzingalo ezingamatshumi ayisificamunwemunye.

¹³Waselinganisa ithempeli, ubude balo baba zingalo ezilikhulu. Igceke lendlu lilemiduli yalo kwaba zingalo ezilikhulu ubude;

¹⁴lobubanzi bethempeli ngempumalanga kanye leguma baba zingalo ezilikhulu.

¹⁵Waselinganisa indlu ekhangele iguma engentshonalanga kanye lemiduli yayo inhlangothi zonke, yaba zingalo ezilikhulu ubude. Ithempeli, lendlu engaphakathi, lendlu esekungeneni ngaphandle,

¹⁶zazilemiduli yamapulanka; izindlu lezi ezintathu zazilamawindi alemigubazi. Kusukela phansi kuze kufike emawindini langaphezu komnyango,

¹⁷endlini engaphakathi lezindlini ekungeneni lakuyo yonke imiduli ngaphandle langaphakathi,

¹⁸kwakukhona izithombe ezibaziweyo, ezamakherubi, lezihlahla zelala, isihlahla selala simi phakathi kwamakherubi* amabili. Ikherubhi* lilinye lalilobuso obubili,

¹⁹obunye buyibuso bomuntu bukhangelene lesihlahla selala, lobunye buyibuso bebhongo lesilwane bukhangelene lesihlahla selala. Zazinjalo izithombe ezibaziweyo ethempelini lonke.

²⁰Amakherubi* lezihlahla zelala kwakubaziwe kusukela phansi kwaze kwafika ngaphezu komnyango, lemdulini wethempeli.

²¹Imigubazi yomnyango wethempeli yayilingana inhlangothi zonke; laphambi kwendawo engcwele kwakukhona into,

²²efanana lelathi eyakhiwe ngezigodo, ukuphakama kwayo kuzingalo ezintathu, ubude bayo buzingalo ezimbili, lobubanzi bayo buzingalo ezimbili; izingonsi zayo lesidindi sayo kanye lemiduli yayo kwenziwe ngezigodo. Wathi kimi: Lokhu kulitafula eliphambi kwe Nkosi.

²³Ithempeli lendawo engcwele kokubili kwakulezivalo ezihlanganayo.

²⁴Izivalo zazilempiko ezimbili, ileso laleso isivalo silempiko ezimbili ezivulekayo.

²⁵Ezivalweni zethempeli kwakubazwe amakherubi* lezihlahla zelala, njengalokho okwakusemidulini. Kwakukhona uphahla lwezigodo ngaphambi kwendlu engasekungeneni.

²⁶Kwakukhona amawindi alemigubazi lezihlahla zelala ngapha langapha kwamawindi, emidulini esemaceleni endlu esekungeneni.