Read Ndebele-IBhayibhili Elingcwele 2006 Uhezekiyeli 42 Bible Online

Uhezekiyeli 42 - Ndebele-IBhayibhili Elingcwele 2006 bible

Uhezekiyeli 42

¹Wasengikhuphela egumeni elingaphandle, ngenyakatho, wangisa ezindlini ezaziqondene legceke lethempeli maqondana lendlu engenyakatho.

²Ubude bendlu eyayingenyakatho babuzingalo ezilikhulu, lobubanzi bayo buzingalo ezingamatshumi amahlanu.

³Endaweni eseleyo eyizingalo ezingamatshumi amabili eyayihlangene lendlu engaphakathi ledundulwini eligandelweyo elegceke elingaphandle, kwakukhona imikhandlo emithathu eyclekeneyo efananayo.

⁴Ngaphambi kwezindlu kwakukhona indlela, ububanzi bayo buzingalo ezilitshumi, lobude bayo buzingalo ezilikhulu eyayiqonda egumeni elingaphakathi; iminyango yazo yayikhangele ngenyakatho.

⁵Izindlu ezingaphezulu zazinciphile kulezindlu ezingaphansi leziphakathi. ngoba imikhandlo yayiziminyanisile.

⁶Ngoba zonke zazelekene zintathu, zingelansika njengeguma; eziphezulu zinciphile kuleziphakathi lezingaphansi.

⁷Umduli wangaphandle ubude bawo buzingalo ezingamakhulu amahlanu, wahamba ngaphambi kwezindlu, ulinganisene lazo, endaweni yeguma elingaphandle.

⁸Izindlu ezazixhumene leguma elingaphandle ubude bazo babuzingalo ezingamatshumi amahlanu; khangela, lalezo ezazikhangelene lethempeli ubude bazo buzingalo ezilikhulu.

⁹Ngaphansi kwalezizindlu kwakukhona umnyango ovelela ngempumalanga lapho umuntu engena evelela egumeni elingaphandle,

¹⁰lapho okwakuqalisa khona umduli weguma. Lendaweni engeningizimu, ukudlula igceke eliseleyo kanye lendlu, kwakukhona ezinye izindlu,

¹¹kulendlela phambi kwazo. Lezindlu zazifanana ngobude langobubanzi langesinye isimo lalezo ezikhangele inyakatho, leminyango yazo yokuphuma leyokungena eyayifanana leyezindlu ezingeningizimu.

¹²Lapho umuntu eqonda ngempumalanga, lapho okuqalisa indlela khona, kwakulomnyango emdulini wangaphakathi.

¹³Wasesithi kimi: Izindlu ezingenyakatho leziqondene lazo ngeningizimu ziyizindlu ezingcwele, lapho abapristi abeza e Nkosi ni abazadlela khona iminikelo engcwelengcwele; babeke khona iminikelo engcwelengcwele, umnikelo wokudla, lomnikelo wesono, lomnikelo wecala, ngoba indawo ingcwele.

¹⁴Lapho abapristi bengena endaweni engcwele, kabayikuphumela egumeni elingaphandle bengazibekanga lapho izembatho abakhonza ngazo, ngoba lezi zingcwele. Bazagqoka ezinye izembatho bengakasondeli eduze lalokho okungokwabantu.

¹⁵Kwathi nxa eseqedile ukulinganisa ngaphakathi kwethempeli, wangikhupha ngesango elikhangele impumalanga, walinganisa ithempeli ngakuleyondawo.

¹⁶Ngomhlanga wokulinganisa walinganisa indawo engempumalanga, yaba zingalo ezingamakhulu amahlanu.

¹⁷Wasephenduka elinganisa indawo engenyakatho, yaba zingalo ezingamakhulu amahlanu.

¹⁸Wasephenduka elinganisa indawo engeningizimu, yaba zingalo ezingamakhulu amahlanu.

¹⁹Wasephenduka elinganisa indawo engentshonalanga, yaba zingalo ezingamakhulu amahlanu.

²⁰Walinganisa indawo zozine. Lalilomduli olizingelezeleyo, uzingalo ezingamakhulu amahlanu ubude, lezingalo ezingamakhulu amahlanu ububanzi, ukwehlukanisa okungcwele lokungangcwele.