Read Ndebele-IBhayibhili Elingcwele 2006 Uhezekiyeli 43 Bible Online

Uhezekiyeli 43 - Ndebele-IBhayibhili Elingcwele 2006 bible

Uhezekiyeli 43

¹Wasengiletha esangweni, isango elikhangele impumalanga.

²Khangela, inkazimulo kaNkulunkulu kaIsrayeli yavelela ngempumalanga, lomdumo wokuza kwakhe wawunjengowamanzi amanengi, lomhlaba wakhanya ngenkazimulo yakhe.

³Umbono engawubonayo wawunjengombono engawubona lapho uNkulunkulu esiza ukuchitha iJerusalema, unjengombono engawubona emfuleni iKebari; ngathi mbo ngobuso phansi.

⁴Nxa inkazimulo ye Nkosi ingena ethempelini ngesango elikhangele impumalanga,

⁵umoya wangiphakamisa, wangiletha egumeni elingaphakathi; khangela-ke, inkazimulo ye Nkosi yayigcwele ithempeli.

⁶Lapho lowomuntu emi phansi kwami, ngezwa omunye ekhuluma lami ethempelini.

⁷Wathi kimi: Ndodana yomuntu, le yindawo yesihlalo sami sobukhosi lendawo yengaphansi yenyawo zami, lapho engizahlala khona phakathi kwabantwana bakoIsrayeli kokuphela. Indlu kaIsrayeli kayisayikungcolisa ibizo lami elingcwele, bona lamakhosi abo, ngokuwula kwabo langezidumbu zamakhosi abo,

⁸ngokumisa umbundu womnyango wabo phansi kowami, lensika zeminyango yabo phansi kwezami, sehlukaniswe ngumduli kuphela. Bangcolisile ibizo lami elingcwele ngamanyala abo abawenzileyo, ngakho ngibaqedile ngolaka lwami.

⁹Ngakhoke kabalahle izithombe zabo lezidumbu zamakhosi abo khatshana lami, ngizahlala phakathi kwabo kokuphela.

¹⁰Wena-ke, ndodana yomuntu, tshela indlu kaIsrayeli ngalelithempeli, ngokukhangeleka kwalo langesimo salo, ukuze babe lenhloni ngobubi babo.

¹¹Uba belenhloni ngakho konke abakwenzileyo, ubatshengise ithempeli, ukuma kwezinto zalo, intuba zalo zokuphuma lezokungena, lesimo salo sonke, ubatshele imithetho yalo yonke lemilayo yalo yonke. Ukubhale konke phambi kwabo ukuze bayigcine bayenze yonke imilayo yalo lemithetho yalo.

¹²Nanku umlayo wethempeli, indawo yonke esengqongeni yentaba izakuba yingcwelengcwele. Khangela, yiwo lowo umlayo wethempeli.

¹³Nanzi izilinganiso zelathi ngezingalo, ubude bengalo inye buyingalo lesandla; ukuphakama kwesidindi salo kuzakuba yingalo, lobubanzi baso bube yingalo, lomqolo olingana lesandla emphethweni waso. Lobu buzakuba yibude belathi;

¹⁴ingalo ezimbili kusukela esidindini phansi kusiya ngaphezu kwelitshe lokuqala, ububanzi buyingalo; kusukela ngaphezu kwelitshe elincinyane kusiya ngaphezu kwelitshe elikhulu kube zingalo ezine, ububanzi buyingalo.

¹⁵Iziko lelathi libe zingalo ezine ukuphakama; kusukela eziko lelathi kusiya phezulu kulempondo ezine, ubude bazo buyingalo.

¹⁶Iziko lelathi lizalingana inhlangothi zonke, ubude balo bube zingalo ezilitshumi lambili lobubanzi bube zingalo ezilitshumi lambili.

¹⁷Umphetho walo uzalingana inhlangothi zonke, ubude bube zingalo ezilitshumi lane, lobubanzi bube zingalo ezilitshumi lane, ube lomqolo emaceleni awo. ububanzi balo bube yingxenye eyodwa kwezimbili yengalo, ngaphansi kube yingalo inhlangothi zonke. Izinyathelo zelathi zizakhangela empumalanga.

¹⁸Wasesithi kimi: Ndodana yomuntu, iNkosi uJehova ithi: Nansi imithetho emayelana lokunikela elathini. Mhla lisakhelwa ukunikela iminikelo yokutshiselwa kilo lokufafaza igazi kilo,

¹⁹uzanika abapristi abangamaLevi abosendo lukaZadoki, abasondela ukukhonza kimi ijongosi ithole lenkomo, lomnikelo wesono, kutsho iNkosi uJehova.

²⁰Uthathe elinye legazi layo, ulifake empondweni zozine zelathi, lezingonsini zozine zomphetho walo, lemqolweni olizingelezeleyo. Ngokunjalo-ke uzalihlambulula ilathi, ulenzele inhlawulo yokuthula.

²¹Uthathe ijongosi lomnikelo wesono, ulitshise endaweni elungisiweyo yethempeli ngaphandle kwendawo engcwele.

²²Ngosuku lwesibili uzanikela izinyane lembuzi elipheleleyo libe ngumnikelo wesono; lihlambuluke ilathi njengoba lihlanjululwe ngejongosi.

²³Nxa usuqedile ukulihlambulula, uzanikela ijongosi ithole lenkomo elingelasici lenqama engelasici ephuma emhlanjini.

²⁴Uzilethe phambi kwe Nkosi, abapristi bazifafaze ngetswayi, bazinikele zibe ngumnikelo wokutshiswa e Nkosi ni.

²⁵Insuku eziyisikhombisa insuku zonke uzanika imbuzi ibe ngumnikelo wesono, unikele lejongosi ithole lenkomo lenqama okuvela emhlanjini kungelasici.

²⁶Insuku eziyisikhombisa bazakwenzela ilathi inhlawulo yokuthula, balihlambulule, balenze libe ngcwele.

²⁷Nxa seziphelile lezonsuku, kusukela esukwini lwesificaminwembili abapristi bazanikela phezu kwelathi iminikelo yenu yokutshiswa leminikelo yokuthula; ngizalemukela, kutsho iNkosi uJehova.