Read Ndebele-IBhayibhili Elingcwele 2006 Uhezekiyeli 47 Bible Online

Uhezekiyeli 47 - Ndebele-IBhayibhili Elingcwele 2006 bible

Uhezekiyeli 47

¹Wasengibuyisela emnyango wethempeli, khangela-ke, amanzi egobhoza ngaphansi kwedundulu lomnyango wethempeli eqonda empumalanga, ngoba ithempeli lalikhangele impumalanga; amanzi ayegeleza ngakwesokunene ngeningizimu kwelathi.

²Wasengikhupha ngendlela yesango langenyakatho, wangibhodisa ngaphandle kwesango elingaphandle elikhangele impumalanga. Khangela, amanzi ayegeleza ngeningizimu.

³Waseqonda empumalanga ephethe intambo esandleni sakhe, waselinganisa ingalo eziyizinkulungwane, wasengidabulisa phakathi kwamanzi, ayefika enqagaleni.

⁴Waselinganisa futhi ingalo eziyizinkulungwane, wangidabulisa phakathi kwamanzi, akhawula emadolo. Walinganisa futhi ingalo eziyizinkulungwane, wangidabulisa phakathi kwamanzi, afika ekhalweni.

⁵Walinganisa futhi ingalo eziyizinkulungwane, aba ngumfula engehluleka ukuwuchapha, ngoba amanzi ayesephakeme, esilingene ukuntsheza, esengumfula owawungeke wachatshwa.

⁶Wasesithi kimi: Ndodana yomuntu, ukubonile lokhu yini? Wasengibuyisela emuva enginqumisa ukhumbi lomfula.

⁷Ekubuyeleni kwami, khangela, ekhunjini lomfula izihlahla ezinengi kakhulu inhlangothi zonke.

⁸Wasesithi kimi: Lamanzi agelezela endaweni ezingempumalanga, aze ehlele emagcekeni; nxa esengena emanzini emiyo olwandle, azakuba matsha.

⁹Lapho umfula odlula khona ezonke izidalwa eziphilayo ezibhinqika emhlabeni zizaphila; kuzakuba khona inhlanzi ezinengi kakhulu, ngoba lamanzi eza lapho ukuze amanye enziwe abe mahle; lapho egeleza khona konke kuzaphila.

¹⁰Abagoli benhlanzi bazakuma phansi kolwandle, kusukela eEngedi kuze kube seEnegilayimi kuzakuba yindawo yokugola inhlanzi. Inhlanzi zalo zizakuba ngezenhlobo ezinengi njengenhlanzi zolwandle olukhulu.

¹¹Kodwa amatete awo lamaxhaphozi awo kawayikuba lamanzi amatsha. Azakuba zindawo zetswayi.

¹²Enkunjini zombili zomfula kuzakhula zonke inhlobo zezihlahla ezidliwayo. Amahlamvu azo kawayikubuna, lezithelo zazo kaziyikuphutha, zizathela izithelo ezintsha inyanga zonke, ngoba amanzi azo avela endlini engcwele. Izithelo zazo zizakuba ngezokudliwa, lamahlamvu azo abe ngawokwelapha.

¹³INkosi uJehova ithi: Nansi imingcele elizakwehlukanisa ngayo izizwe zakoIsrayeli ezilitshumi lambili ilizwe libe yilifa lazo. UJosefa uzakuba lenkatho ezimbili.

¹⁴Lizalehlukanisa ngokulinganayo; ngafunga ukulinika oyihlo, lelilizwe lizakuba ngelenu.

¹⁵Nanku umngcele welizwe; ngenyakatho kusukela elwandle olukhulu kuyedlula eHethiloni kuze kube sekungeneni eHamathi, kudlulele eZedadi,

¹⁶leBerotha lSibiriyami, elisemngceleni phakathi kweDamaseko leHamathi, kuze kufike eHazeriHatikoni elisemngceleni weHawurani.

¹⁷Uzakuba njalo umngcele usukela elwandle usiya eHazari-Enoni, esemngceleni weDamaseko ongenyakatho, lomngcele weHamathi ngenyakatho. Lo uzakuba ngumngcele wenyakatho.

¹⁸Ngempumalanga umngcele uzasuka eHazari-Enoni phakathi kweHawurani leDamaseko, ulandele iJordani phakathi kweGileyadi lelizwe lakoIsrayeli, uze ufike elwandle olungempumalanga uyefika eTamari. Lo uzakuba ngumngcele wempumalanga.

¹⁹Ngeningizimu uzasuka eTamari uze ufike emanzini eMeribathi-Kadeshi, usuke lapho uye emfuleni weGibhithe uyefika elwandle olukhulu. Lo uzakuba ngumngcele weningizimu.

²⁰Ngentshonalanga, uLwandle olukhulu luzakuba ngumngcele ngentshonalanga kuze kufike maqondana leHamathi. Lo uzakuba ngumngcele wentshonalanga.

²¹Ngokunjalo-ke lizalehlukanisa ilizwe ezizweni zakoIsrayeli.

²²Lilabe libe ngelenu lelabezizwe abahlala phakathi kwenu, bezala abantwana phakathi kwenu. Bazakuba njengamadodana azalelwe koIsrayeli. Kanye lani bazakwabelwa ilizwe phakathi kwezizwe zakoIsrayeli.

²³Lakusiphi isizwe owezizwe ahlala kiso lizamabela lapho ilizwe lakhe, kutsho iNkosi uJehova.