Read Ndebele-IBhayibhili Elingcwele 2006 Uhezekiyeli 48 Bible Online

Uhezekiyeli 48 - Ndebele-IBhayibhili Elingcwele 2006 bible

Uhezekiyeli 48

¹Nanka amabizo ezizwe. Kusukela emngceleni ongenyakatho, kusukela eceleni kwendlela yeHethiloni ekungeneni kweHamathi, kuze kufike eHazariEnoni, elisemngceleni wenyakatho kweDamaseko maqondana leHamathi, ngitsho kusukela empumalanga kusiya entshonalanga, uDani uzakuba lenkatho eyodwa.

²Kuxhuma endaweni kaDani, kusukela empumalanga kusiya entshonalanga uAsheri uzakuba lesigaba esisodwa.

³Kuxhuma endaweni kaAsheri, kusukela empumalanga kusiya entshonalanga uNafithali uzakuba lesigaba esisodwa.

⁴Kuxhuma endaweni kaNafithali, kusukela empumalanga kusiya entshonalanga uManase uzakuba lesigaba esisodwa.

⁵Kuxhuma endaweni kaManase, kusukela empumalanga kusiya entshonalanga uEfrayimi uzakuba lesigaba esisodwa.

⁶Kuxhuma endaweni kaEfrayimi, kusukela empumalanga kusiya entshonalanga uRubeni uzakuba lesigaba esisodwa.

⁷Kuxhuma endaweni kaRubeni, kusukela empumalanga kusiya entshonalanga uJuda uzakuba lesigaba esisodwa.

⁸Kuxhuma endaweni kaJuda, kusukela empumalanga kusiya entshonalanga kuzakuba yisigaba elizasehlukanisela i Nkosi, ububanzi baso bube zingalo eziyizinkulungwane ezingamatshumi amabili lanhlanu, ubude baso buzalingana lobesinye sezigaba zezizwe, kusukela empumalanga kusiya entshonalanga indlu engcwele izakuba phakathi kwaso.

⁹Isigaba elizasehlukanisela i Nkosi ubude baso bube zingalo eziyizinkulungwane ezingamatshumi amabili lanhlanu, lobubanzi baso bube zingalo eziyizinkulungwane ezingamatshumi amabili.

¹⁰Nanzi izabelo zezigaba ezingcwele. Abapristi bazakuba lesabelo esiyizingalo ezizinkulungwane ezingamatshumi amabili lanhlanu ngenyakatho; ububanzi baso ngentshonalanga bube zingalo ezizinkulungwane ezilitshumi, lobubanzi baso ngempumalanga bube zingalo ezizinkulungwane ezilitshumi, lobude baso ngeningizimu bube zingalo ezizinkulungwane ezingamatshumi amabili lanhlanu, indlu engcwele ye Nkosi izakuba phakathi kwaso.

¹¹Lesi sizakuba ngesabapristi abehlukaniselwa i Nkosi, amadodana kaZadoki, abagcine umlindo wami abangaduhanga lapho abantwana bakoIsrayeli beduha njengokwenza kwamaLevi.

¹²Kuzakuba yisigaba sabo esikhethiweyo sivela esigabeni esingcwele selizwe, sibe yindawo engcwele yezingcwele, sixhume endaweni yamaLevi.

¹³Eceleni kwendawo yabapristi amaLevi azakuba lesabelo, ubude baso bube zingalo eziyizinkulungwane ezingamatshumi amabili lanhlanu, lobubanzi baso bube zingalo eziyizinkulungwane ezilitshumi. Ubude baso bonke buzakuba zingalo eziyizinkulungwane ezingamatshumi amabili lanhlanu, lobubanzi baso bube zingalo eziyizinkulungwane ezingamatshumi amabili.

¹⁴Kabayikusithengisa, loba benanise ngaso, kabayikusinika abanye lesisigaba esihle selizwe, ngoba singcwele e Nkosi ni.

¹⁵Indawo eseleyo, ububanzi bayo buzingalo ezizinkulungwane ezinhlanu, lobude bayo buzingalo ezizinkulungwane ezingamatshumi amabili lanhlanu, izasetshenziswa ngumuzi, ibe yindawo yokwakha, leganga. Phakathi kwayo kuzakuba khona umuzi.

¹⁶Nanzi izilinganiso zawo; ngenyakatho uzakuba zingalo ezizinkulungwane ezine lamakhulu amahlanu, ngeningizimu ube zingalo ezizinkulungwane ezine lamakhulu amahlanu, ngempumalanga ube zingalo ezizinkulungwane ezine lamakhulu amahlanu, langentshonalanga ube zingalo ezizinkulungwane ezine lamakhulu amahlanu.

¹⁷Umuzi uzakuba lamadlelo, ngenyakatho abe zingalo ezingamakhulu amabili lamatshumi amahlanu, ngeningizimu abe zingalo ezingamakhulu amabili lamatshumi amahlanu, ngempumalanga abe zingalo ezingamakhulu amabili lamatshumi amahlanu, langentshonalanga abe zingalo ezingamakhulu amabili lamatshumi amahlanu.

¹⁸Indawo eseleyo eceleni lesabelo esingcwele izakuba zingalo ezizinkulungwane ezilitshumi kusiya empumalanga, ibe zingalo ezizinkulungwane ezilitshumi kusiya entshonalanga, ibeseceleni kwesabelo esingcwele. Izithelo zayo zizakuba ngezokudliwa yizisebenzi zomuzi.

¹⁹Izisebenzi zomuzi ezivela kuzo zonke izizwe zakoIsrayeli zizayilima.

²⁰Isabelo sonke elizasehlukanisa sizakuba zingalo ezizinkulungwane ezingamatshumi amabili lanhlanu inhlangothi zonke, ngitsho isabelo esingcwele ndawonye lempahla yonke yomuzi.

²¹Okuseleyo inhlangothi zonke zesigaba esingcwele lenxa zonke zempahla zomuzi kuzakuba ngokwesikhulu. Kusukela ezingalweni ezizinkulungwane ezingamatshumi amabili lanhlanu zesigaba esingcwele ngempumalanga komngcele, kusiya entshonalanga kusukela ezingalweni ezizinkulungwane ezingamatshumi amabili kusiya emngceleni wempumalanga, kulinganisene lezigaba zezizwe, kuzakuba ngokwesikhulu. Isigaba esingcwele kanye lendawo engcwele yethempeli phakathi kwaso,

²²lempahla yamaLevi lempahla yomuzi kuzakuba phakathi kwendawo yesiphathamandla. Isigaba sesiphathamandla sizakuba phakathi kwelizwe lakoJuda lakoBhenjamini.

²³Izizwe eziseleyo, kusukela empumalanga kusiya entshonalanga uBhenjamini uzakuba lesigaba esisodwa.

²⁴Kuxhuma endaweni kaBhenjamini kusukela empumalanga kusiya entshonalanga uSimeyoni uzakuba lesigaba esisodwa.

²⁵Kuxhuma endaweni kaSimeyoni kusukela empumalanga kusiya entshonalanga uIsakari uzakuba lesigaba esisodwa.

²⁶Kuxhuma endaweni kaIsakari kusukela empumalanga kusiya entshonalanga uZebuluni uzakuba lesigaba esisodwa.

²⁷Kuxhuma endaweni kaZebuluni kusukela empumalanga kusiya entshonalanga uGadi uzakuba lesigaba esisodwa.

²⁸Kuxhuma endaweni kaGadi kusiya eningizimu, umngcele uzasuka eTamari usiya emanzini eMeribathi-Kadeshi, usuke lapho uhambe emfuleni weGibhithe uye elwandle olukhulu.

²⁹Yilo-ke ilizwe elizalaba libe ngelenu phakathi kwezizwe zakoIsrayeli, yizo izigaba zabo, kutsho iNkosi uJehova.

³⁰Nanzi intuba zomuzi zokuphuma; ngenyakatho isilinganiso sakhona sizakuba zingalo eziyizinkulungwane ezine lamakhulu amahlanu,

³¹kuzakuba lamasango amathathu, isango likaRubeni lesango likaJuda, lesango likaLevi, amasango omuzi azabizwa ngamabizo ezizwe zakoIsrayeli.

³²Ngempumalanga isilinganiso sakhona sizakuba zingalo eziyizinkulungwane ezine lamakhulu amahlanu, kuzakuba lamasango amathathu, isango likaJosefa lesango likaBhenjamini lesango likaDani.

³³Ngeningizimu isilinganiso sakhona sizakuba zingalo eziyizinkulungwane ezine lamakhulu amahlanu, kuzakuba lamasango amathathu, isango likaSimeyoni lesango likaIsakari lesango likaZebuluni.

³⁴Ngentshonalanga isilinganiso sakhona sizakuba zingalo eziyizinkulungwane ezine lamakhulu amahlanu, kuzakuba lamasango amathathu, isango likaGadi lesango likaAsheri lesango likaNafithali.

³⁵Inhlangothi zonke zomuzi zizakuba zingalo eziyizinkulungwane ezilitshumi laficaminwembili. Ibizo lomuzi kusukela nje lizakuthiwa. INkosi ilapho.