Read Ndebele-IBhayibhili Elingcwele 2006 Uhezekiyeli 6 Bible Online

Uhezekiyeli 6 - Ndebele-IBhayibhili Elingcwele 2006 bible

Uhezekiyeli 6

¹Ilizwi le Nkosi lafika kimi lathi:

²Ndodana yomuntu, khangela entabeni zakoIsrayeli, uprofethe ngazo,

³uthi: Lina zintaba zakoIsrayeli, zwanini ilizwi leNkosi uJehova. INkosi uJehova ithi ezintabeni lemaqaqeni lezifuleni lezihotsheni: Khangelani, mina uqobo ngizakwehlisela phezu kwenu inkemba, ngivale indawo zenu eziphakemeyo zokukhonzela.

⁴Amalathi enu azadilizwa, kubulawe lamalathi okutshisela impepha; lababuleweyo bakini ngibaphosele phambi kwezithombe zenu.

⁵Ngizabeka izidumbu zabantwana bakoIsrayeli phambi kwezithombe zabo, ngichithachithe amathambo enu kumalathi enu inhlangothi zonke.

⁶Kuzo zonke indawo lapho elihlala khona imizi yenu izachitheka, lendawo zenu eziphakemeyo zokukhonzela zivalwe, lamalathi enu adilike aphele nya, lezithombe zenu zibulawe ziphele, lamalathi enu okutshisela impepha adilizwe, lemisebenzi yenu ibhidlizwe.

⁷Nxa abantu bebulawa phakathi kwenu, lizakwazi ukuthi ngiyi Nkosi.

⁸Kanti ngizayekela abanye benu baphephe bahlakazeke phakathi kwezizwe.

⁹Abaseleyo bakini bazangikhumbula phakathi kwezizwe abathunjelwe kizo; bazakhumbula ukudabuka kwami ngenxa yenhliziyo zabo ezasuka kimi ngenxa yobubi langenxa yamehlo abo ayelandele izithombe. Khona bezanengwa yibo bonke ububi ababenzileyo langamanyala abo wonke.

¹⁰Bazakwazi ukuthi mina ngiyi Nkosi. Kangikhulumanga ize nxa ngisithi ngizakwenza lokho okubi kibo.

¹¹INkosi uJehova ithi: Tshaya ngezandla zakho, ugide ngenyawo zakho uthi: Maye! ngenxa yawo wonke amanyala amabi akoIsrayeli; ngoba bazakuwa ngenkemba, langendlala, langomatshayabhuqe wesifo.

¹²Okhatshana uzabulawa ngomatshayabhuqe wesifo, oseduze uzakuwa ngenkemba, loseleyo abulawe yindlala. Kuzaphela ngokunjalo ukufutheka kwami phezu kwabo.

¹³Lizakwazi ukuthi ngiyi Nkosi nxa ababuleweyo babo sebelele phakathi kwezithombe zabo, behanqe amalathi abo, phezu kwawo wonke amaqaqa amade, lezingqongeni zonke zezintaba, langaphansi kwazo zonke izihlahla eziluhlaza, langaphansi kwazo zonke izihlahla ezinkulu ezilamahlamvu, loba ngaphi lapho ababenikela khona ngephunga elimnandi kuzo zonke izithombe zabo.

¹⁴Ngizabaphakamisela isandla sami, ngilichithe ilizwe liphele, kuzo zonke indawo abahlala kuzo, kusukela enkangala kuze kufike eRibila. Khona-ke bezakwazi ukuthi ngiyi Nkosi.