Read Ndebele-IBhayibhili Elingcwele 2006 Uhezekiyeli 7 Bible Online

Uhezekiyeli 7 - Ndebele-IBhayibhili Elingcwele 2006 bible

Uhezekiyeli 7

¹Ilizwi le Nkosi lafika kimi lathi:

²Ndodana yomuntu, mina Nkosi uJehova ngithi elizweni lakoIsrayeli: Ukuphela kuyeza, ukuphela kuyeza emagumbini womane elizwe.

³Ukuphela sekufikile kini, ngizakwehlisela ukuthukuthela kwami phezu kwenu, ngiligwebe ngezenzo zenu, ngehlisele phezu kwenu amanyala enu.

⁴Kangiyikuliyekela, kangiyikulihawukela, kodwa ngizalitshaya ngenxa yezindlela zenu lapho amanyala enu esephakathi kwenu. Khona lizakwazi ukuthi ngiyi Nkosi.

⁵INkosi uJehova ithi: Ukuchitheka kulandela ukuchitheka. Khangela, kuyeza.

⁶Ukuphela sekufikile, ukuphela sekufikile, sekulehlele; khangela, kuyeza.

⁷Ukuchitheka kwakho sekufikile, wena owakhileyo elizweni; isikhathi sesifikile, losuku lusondele, usuku lokukhala olungesilo usuku lomsindo wentokozo phezu kwezintaba.

⁸Ngizakwehlisela ulaka lwami phezu kwenu, ngiqedele ukuthukuthela kwami kini, ngiligwebe ngokufanele indlela zenu, ngilitshaye ngenxa yawo wonke amanyala enu.

⁹Kangiyikuliyekela, kangiyikulihawukela, kodwa ngizalitshaya ngenxa yezenzo zenu langamanyala enu asesephakathi kwenu. Khona lizakwazi ukuthi ngiyi Nkosi etshayayo.

¹⁰Khangela usuku, khangela luyeza. Ukuchitheka kwenu sekufikile, ububi buyahluma, lokuziqhenya kukhahlele,

¹¹isihluku sikhule saba yibubi. Kakuyikusala lutho lwabo, lenothweni yabo, lezifuyweni zabo, lebukhosini babo.

¹²Isikhathi sesifikile, losuku lusondele. Umthengi kangathokozi, lothengisayo angazisoli, ngoba ulaka lwehlela phezu kwabo bonke.

¹³Umthengisi kayikubuya azuze lokho akuthengisileyo besaphila bobabili; ngoba okuthengisiweyo kakuyikubuyiselwa ngenxa yesiphithiphithi; futhi kakuyikuba khona umuntu ozaphila ngenxa yobubi bakhe.

¹⁴Seluvuthelwe uphondo, bazilungiselela bonke, kodwa kakho ophumayo ukuya empini, ngoba ukuthukuthela kwami kwehlele phezu kwabo bonke.

¹⁵Ngaphandle kukhona inkemba, ngaphakathi kukhona umatshayabhuqe wesifo lendlala; osegangeni uzakufa ngenkemba, lophakathi komuzi abulawe ngendlala lomatshayabhuqe wesifo.

¹⁶Uba kukhona ababalekela ezintabeni bazakuba njengamajuba avela esihotsheni; bakhale bonke bekhalela ububi babo.

¹⁷Zonke izandla zizakuba buthakathaka, lamadolo axege.

¹⁸Bonke bazagqoka amalembu amasaka, behlelwe yikwesaba, babanjwe zinhloni, baphuce amakhanda.

¹⁹Bazalahlela isiliva sabo ezindleleni, legolide labo lizakuba njengento engcolileyo. Isiliva sabo legolide labo kakuyikuba lamandla okubakhulula ngosuku lokuthukuthela kwe Nkosi. Kabayikukudla basuthe; ngoba ububi babo buyisikhubekiso sabo.

²⁰Babeziqhenya ngobuhle beziceciso zabo abenza ngazo imifanekiso lezithombe ezinengisayo. Ngakho-ke ngizazenza zibe yizinto ezingcolileyo kibo.

²¹Ngizazinikela ezandleni zabezizwe bazithumbe, lakwababi bomhlaba zibe yimpango yabo, bazazingcolisa.

²²Ngizafihla ubuso bami kibo ukuze bangcolise indawo yami eligugu. Abaphangi bazangena bayingcolise.

²³Zilungiselele, ngoba ilizwe ligcwele amacala egazi, lomuzi ugcwele isihluku;

²⁴ngizaletha izizwe ezimbi kakhulu ukuthumba indlu zabo, ngiqede ukuziqhenya kwabo lamandla abo, kungcoliswe indawo zabo ezingcwele.

²⁵Lapho usizi selufikile, bazadinga ukuthula, kodwa kakuyikuba khona.

²⁶Ukuchitheka kuzalandela ukuchitheka, amahungahunga alandele amanye amahungahunga. Bazadinga umbono kumprofethi, kodwa kakusayikuba khona ukuqondisa kompristi leseluleko sabadala.

²⁷Inkosi izalila, leziphathamandla zigcwale ukudana, labantu belizwe bazathuthumela. Ngizakwenza kibo njengokufanele indlela zabo, ngibagwebe njengokufanele izigwebo zabo; bazakwazi ukuthi ngiyi Nkosi.