Read Ndebele-IBhayibhili Elingcwele 2006 Uhezekiyeli 8 Bible Online

Uhezekiyeli 8 - Ndebele-IBhayibhili Elingcwele 2006 bible

Uhezekiyeli 8

¹Kwathi ngomnyaka wesithupha, ngosuku lwesihlanu lwenyanga yesithupha, ngihlezi endlini yami, labadala bakoJuda behlezi lami, isandla seNkosi uJehova sehlela phezu kwami.

²Ngabona, khangela-ke, okwakufanana lomuntu; kwakuvutha umlilo kusukela ekhalweni kusiya phansi, kucwazimula njengethusi kusukela ekhalweni kusiya phezulu.

³Waseselula okwakungathi yisandla, wangibamba ngenwele. Umoya wangiphakamisela phakathi komhlaba lamazulu, wangiletha ngemibono kaNkulunkulu eJerusalema, entubeni yeguma elingaphakathi, elikhangele inyakatho, lapho okwakukhona isihlalo sesithombe somona esibanga umona.

⁴Khangela-ke, inkazimulo kaNkulunkulu kaIsrayeli yayilapho injengokuyibona kwami esihotsheni.

⁵Wasesithi kimi: Ndodana yomuntu, ake ukhangele ngenyakatho. Ngasengiphakamisa amehlo ami ngenyakatho, khangela-ke, lesosithombe somona ngenyakatho kwesango lelathi, entubeni yalo.

⁶Wasesithi kimi: Ndodana yomuntu, uyakubona yini lokho abakwenzayo, amanyala amakhulu enziwa yindlu kaIsrayeli lapha, ukungixotshela khatshana lendawo yami engcwele? Kodwa usezabona amanyala adlula la.

⁷Wasengisa emnyango weguma; kwathi lapho ngibona, khangela, kulembobo emdulini.

⁸Wasesithi kimi: Ndodana yomuntu, bhoboza umduli. Ngathi ngiwubhoboze umduli, khangela, kulomnyango.

⁹Wasesithi kimi: Ngena, ubone amanyala angcolileyo abawenzayo lapha.

¹⁰Ngasengingena, ngabona, khangela, lapho kudwetshiwe emidulini inhlangothi zonke imifanekiso yazo zonke izinto ezihahabayo, lezilo ezenyanyekayo, lazo zonke izithombe zakoIsrayeli.

¹¹Kwakumi phambi kwazo abadala bendlu kaIsrayeli abangamatshumi ayisikhombisa bekanye loJahazaniya indodana kaShafani. Bonke babephethe indengezi zempepha, zithunqa intuthu yempepha.

¹²Wasesithi kimi: Ndodana yomuntu, uyakubona yini lokho abakwenzayo emnyameni abadala bendlu kaIsrayeli endlini zabo zemifanekiso? Ngoba bathi: I Nkosi kayisiboni; i Nkosi ilitshiyile ilizwe layo.

¹³Wasesithi kimi futhi: Uzabuya ubone amanyala amakhulu edlula la abawenzayo.

¹⁴Wasengisa entubeni yesango langenyakatho kwendlu ye Nkosi; khangela-ke, lapho abesifazana bekhala inyembezi ngoTamuzi.

¹⁵Wasesithi kimi: Uyakubona lokhu yini, wena ndodana yomuntu? Khona usuzabona amanyala amakhulu okwedlula la.

¹⁶Wangingenisa egumeni elingaphakathi kwethempeli; khangela-ke, emnyango wethempeli le Nkosi phakathi komkoto lelathi abantu abangamatshumi amabili lanhlanu befulathele ithempeli le Nkosi, bekhangele ngempumalanga, bekhonza ilanga eliphumayo.

¹⁷Wasesithi kimi: Uyakubona lokhu yini, wena ndodana yomuntu? Kuyinto elula koJuda ukwenza amanyala abawenzayo lapha yini, ukuthi bagcwalise ilizwe ngokubi, bavuse ulaka lwami? Khangela, babeka ingatsha empumulweni zabo.

¹⁸Ngizabasulela ekuthukutheleni kwami. Kangiyikubayekela ngibahawukele; lanxa bekhala kakhulu, kangiyikubezwa.