Read Ndebele-IBhayibhili Elingcwele 2006 Udanyela 1 Bible Online

Udanyela 1 - Ndebele-IBhayibhili Elingcwele 2006 bible

Udanyela 1

¹Ngomnyaka wesithathu wokubusa kukaJehoyakhimi inkosi yakoJuda, uNebukadinezari inkosi yeBhabhiloni wafika eJerusalema, wayivimbezela.

²INkosi yanikela uJehoyakhimi inkosi yakoJuda esandleni sakhe, lengxenye yezitsha zendlu kaNkulunkulu. UNebukadinezari wazisa elizweni leShinari, endlini kaNkulunkulu wakhe, wazibeka endlini yenotho.

³Waselaya uAshipenazi induna yabathenwa bayo ukuthi ilethe ingxenye yabantwana bakoIsrayeli, abozalo lwesikhosini kanye leziphathamandla,

⁴abangamajaha angelasici, abukekayo, ahlakaniphileyo, alolwazi, akwaziyo ukufunda, lalamandla okusebenza esigodlweni senkosi, bafundiswe izincwadi lolimi lwamaKhaladiya.

⁵Inkosi yabamisela isabelo sokudla kwabo kwensuku zonke, okumnandi okudliwa yinkosi, lewayini elinathayo. Babezafundiswa iminyaka emithathu, kuthi ekupheleni kwayo balethwe enkosini ukuyisebenzela.

⁶Phakathi kwabo kwakukhona oDaniyeli loHananiya loMishayeli loAzariya, abesizwe sakoJuda.

⁷Induna yabathenwa yabatha amanye amabizo; uDaniyeli yathi nguBeliteshazari, loHananiya yathi nguShadraki, loMishayeli yathi nguMeshaki, loAzariya yathi nguAbedinego.

⁸Kodwa uDaniyeli wazimisela ukuthi angazingcolisi ngokudla kwenkosi okumnandi, langewayini eyayilinatha. Ngakho-ke wasecela induna yabathenwa ukuthi imvumele angazingcolisi.

⁹UNkulunkulu wamnika uDaniyeli umusa lesihawu enduneni yabathenwa;

¹⁰induna yabathenwa yathi kuDaniyeli: Ngiyesaba ukuthi inkosi yami elimisele ukudla lokunathwayo izabona ukuthi wena ucakile kulamanye amajaha ayintanga yakho; ubusungifaka engozini yokubulawa yinkosi.

¹¹UDaniyeli wasesithi encekwini eyayimiswe induna yabathenwa ukuphatha uDaniyeli loHananiya loMishayeli loAzariya:

¹²Ake ulinge inceku zakho okwensuku ezilitshumi, usinike imibhida kuphela ukuze sidle yona sinathe lamanzi.

¹³Ubusukhangela isimo sethu, lesimo samajaha adla ukudla kwenkosi okumnandi, wenzeke njengalokho okubonayo ezincekwini zakho.

¹⁴Inceku yasilalela lokhu, yabalinga okwensuku ezilitshumi.

¹⁵Ekupheleni kwensuku ezilitshumi babonakala bengcono bezimukile enyameni kulawo wonke amajaha ayesidla ukudla kwenkosi okumnandi.

¹⁶Ngakho-ke inceku yasisusa ukudla kwabo okumnandi kanye lewayini ababezalinatha, yabanika imibhida kuphela.

¹⁷Lamajaha amane uNkulunkulu wawanika ukwazi lamandla okufunda izincwadi, kanye lokuhlakanipha. Njalo uDaniyeli wayelokuqedisisa ngayo yonke imibono lamaphupho.

¹⁸Ekupheleni kwesikhathi, lapho inkosi isitshilo ukuthi lamajaha angeniswe esigodlweni, induna yabathenwa yawaletha phambi kukaNebukadinezari.

¹⁹Inkosi yakhuluma labo; phakathi kwawo wonke kwakungekho owayefanana loDaniyeli loHananiya loMishayeli loAzariya; basebeqalisa ukuyisebenzela inkosi.

²⁰Ezintweni zonke zokuhlakanipha lezokuqedisisa inkosi eyayibabuza ngazo, yabathola besedlula ngokuphindwe katshumi zonke izanuse lezangoma ezazisembusweni wayo.

²¹UDaniyeli waqhubeka kwaze kwaba ngumnyaka wokuqala wokubusa kwenkosi uKurosi.