Read Ndebele-IBhayibhili Elingcwele 2006 Udanyela 10 Bible Online

Udanyela 10 - Ndebele-IBhayibhili Elingcwele 2006 bible

Udanyela 10

¹Ngomnyaka wesithathu kaKurosi inkosi yePerisiya ilizwi lembulelwa uDaniyeli, owayethiwa nguBeliteshazari. Lelolizwi laliqinisiIe, kodwa kwakulukhuni ukuliqedisisa. Waliqedisisa ngombono.

²Ngalezonsuku, mina Daniyeli ngangilila okwamaviki amathathu.

³Kangidlanga okumnandi lenyama, kanginathanga lewayini, futhi kangigcobanga okwamaviki amathathu agcweleyo.

⁴Ngosuku lwamatshumi amabili lane ngenyanga yokuqala, lapho ngangimi ekhunjini lomfula omkhulu othiwa iTigrisi,

⁵ngaphakamisa amehlo ami, ngabona, khangela, umuntu egqoke ilembu elicolekileyo, ebophe ngebhanti legolide leOfiri ekhalweni lwakhe.

⁶Umzimba wakhe wawunjengelitshe elithiwa yibherule*, lobuso bakhe bunjengokuphazima kombane, lamehlo akhe enjengezihlanti* ezivuthayo, ingalo lemibala yakhe kunjengokukhazimula kwethusi elikhazimulayo, lokuzwakala kwelizwi lakhe kunjengomsindo wexuku.

⁷Yimi ngedwa engabona lowombono, ngoba abantu ababelami kabawubonanga, kodwa behlelwa yikuthuthumela okukhulu, babaleka ukuze bacatshe.

⁸Ngakho-ke ngasengisala ngedwa, ngawubona lumbono omkhulu, ngaphelelwa ngamandla, ubuso bami baguquka kubi.

⁹Ngasengisizwa ilizwi lakhe; lapho ngilizwa, ngathi mbo ngobuso phansi, ngaqaieka.

¹⁰Khangela, ngasengibanjwa yisandla, sangimisa ngezandla zami langamadolo ngilokhu ngithuthumela.

¹¹Wathi kimi: Daniyeli, wena muntu othandekayo kakhulu, zwana lamazwi engiwakhuluma kuwe; sukuma ume, ngoba sengithunywe kuwe. Kwathi ekhuluma lelilizwi kimi, ngasukuma ngithuthumela.

¹²Wasesithi kimi: Ungesabi, Daniyeli, ngoba kusukela esukwini lokuqala owazama ngalo ukusebenzisa ingqondo yakho ukuze uqedisise, wazithoba phambi kukaNkulunkulu wakho, amazwi akho ezwakele, ngizile ngenxa yamazwi akho.

¹³Umbusi wesizwe samaPerisiya wamelana lami insuku ezingamatshumi amabili lanye; kodwa khangela, uMikayeli omunye wababusi abakhulu weza ukungisiza; ngoba ngangitshiywe ngedwa embusweni sePerisiya,

¹⁴ngizile ukuthi ngikwenze uqedisise okuzakwehlela abantu bakini ensukwini zokucina. Lo ngumbono ngensuku ezizayo.

¹⁵Esekhulumile kimi lawomazwi, ngakhangelisa ubuso bami phansi, ngaba yisimungulu.

¹⁶Khangela, okunye okufanana lomuntu kwathinta umlomo wami; ngavula umlomo wami, ngakhuluma. Ngathi kulowo omi phambi kwami: Nkosi yami, ngenxa yombono ngifikelwe yibuhlungu, kangiselawo amandla.

¹⁷Mina-ke, inceku yeNkosi yami, ngingakhuluma ngithini eNkosini yami? Ngoba kangiselawo amandla, sengisehluleka lokuphefumula.

¹⁸Wasengithinta futhi lowo olesimo somuntu, wangiqinisa.

¹⁹Wasesithi: Wena muntu othandekayo kakhulu, ungesabi; ukuthula kakube kuwe, qina ume isibindi. Kwathi lapho ekhuluma lami ngaqina, ngasengisithi: Kayikhulume iNkosi yami, ngoba isingiqinisile.

²⁰Wasesithi: Uyazi ukuthi ngizeleni kuwe? Kodwa khathesi ngizabuyela ukulwa lombusi wePerisiya; kuthi lapho sengimehlule, khangela, kufike umbusi wamaGriki.

²¹Kodwa ngizakutshela okubhaliweyo encwadini yeqiniso; kakho loyedwa oziqinisa lami ukumelana labo ngaphandle kukaMikayeli umbusi wenu.