Read Ndebele-IBhayibhili Elingcwele 2006 Udanyela 11 Bible Online

Udanyela 11 - Ndebele-IBhayibhili Elingcwele 2006 bible

Udanyela 11

¹Mina-ke, ngomnyaka wokuqala kaDariyusi umMede, ngema ukumqinisa ukuze abe lamandla.

²Khathesi ngizakutshela. Khangela, kusezavela amakhosi amathathu ePerisiya; eyesine izanotha okwedlula wonke. Kuthi lapho isiqinile ngenxa yenotho yayo, ibavuse bonke ukumelana lombuso wamaGriki.

³Besekuvela inkosi elamandla ezabusa umbuso omkhulu, yenze ekuthandayo.

⁴Izakwenela ukuvela nje, umbuso wayo uchithwe wehlukaniswe izigaba ezine zamazulu, kodwa unganikwa inzalo yayo, ungabuswa njengokubusa kwayo. Ngoba umbuso wayo uzasitshunwa, unikwe abanye ngaphandle kwalaba.

⁵Inkosi yeningizimu izakuba lamandla, kodwa omunye wababusi bayo uzakuba lamandla ukuyedlula, abe lombuso omkhulu.

⁶Emva kweminyaka izakwenza isivumelwano, inkosi yeningizimu yendisele indodakazi yayo enkosini yenyakatho ukuze enze isivumelwano sokuthula; kodwa kasiyikuma, yona kanye lenceku zayo eyafika lazo, lomntwana wayo, lomkayo bazabulawa.

⁷Ngalezozikhathi kuzavela olihlumela empandeni zaleyondodakazi athathe indawo yenkosi. Uzakuza lebutho lenkosi yenyakatho, angene enqabeni yayo, alwe labantu bayo, abehlule.

⁸Uzathumbela eGibhithe onkulunkulu babo, lezithombe zabo zensimbi, lezitsha zabo eziligugu ezesiliva lezegolide. Okweminyaka eminengi kayikuba asayihlasela inkosi yenyakatho.

⁹Yonake ibisihlasela umbuso wenkosi yeningizimu, kodwa ibuyele futhi elizweni layo.

¹⁰Amadodana ayo azahloma abuthe ibutho elikhulu; enye izakhukhula yedlule, ilwe ize ifike enqabeni yayo.

¹¹Inkosi yeningizimu izathukuthela, iphume ukulwa lenkosi yenyakatho, ibuthe ibutho elikhulu, kodwa izanikelwa esandleni sesitha sayo.

¹²Lapho ixuku selithunjiwe, inhliziyo yayo izaziphakamisa, ibulale amatshumi ezinkulungwane, kodwa kayiyikunqoba.

¹³Inkosi yenyakatho ibuye ibuthe futhi ibutho elikhulu kuleyokuqala; kuthi emva kweminyaka ethile ifike lebutho elikhulu lempahla ezinengi.

¹⁴Ngalezozikhathi abanengi bazayivukela inkosi yeningizimu. Abantu abalesihluku phakathi kwabantu bakini bazavuka ukuze bagcwalise umbono, kodwa behluleke.

¹⁵Inkosi yenyakatho ibisifika, yakhe idundulu lokuvimbezela, iwuthathe umuzi obiyelweyo. Ibutho leningizimu kaliyikuma kanye lamabutho ayo akhethiweyo, azaswela amandla.

¹⁶Kodwa ehlaselayo izakwenza ekuthandayo, kungabi khona loyedwa oyimelayo. Izakuma elizweni elihle, lonke libe sesandleni sayo.

¹⁷Izazimisela ukunqoba umbuso wonke wenkosi yeningizimu, yenze isivumelwano layo, iyendisele indodakazi yayo ukuze kuchitheke umbuso wayo; kodwa lokhu kakuyikuphumelela.

¹⁸Emva kwalokho etshibilikela ezihlengeni, iwanqobe amanengi awo; kodwa induna yezizweni izakuqeda lokhu ukuzikhukhumeza kwayo, ikuphendule kube lihlazo.

¹⁹Izatshibilika ibuyele ezinqabeni zelizwe layo, kodwa izakwehlulwa, ingaphindi ibonwe futhi.

²⁰Esikhundleni sayo kuzavela enye inkosi ezathuma umthelisi ukuthelisa abantu abacindezele; kodwa ngensuku ezinlutshwana izabulawa, kungeyisikho obala loba empini.

²¹Esikhundleni sayo kuzavela umuntu odelelekileyo ongabunikwanga ubukhosi, afike kungananzelelwe, awuthathe umbuso ngokukhohlisa.

²²Amabutho azazikhukhula phambi kwakhe, azibhubhise, kanye lesiphathamandla sesivumelwano.

²³Kusukela esikhathini sokwenziwa kwesivumelwano laye uzasebenza ngobuqili, aqine abe lamandla elabantu abalutshwana.

²⁴Uzanqoba izindawo ezinothileyo zombuso, enze okungenziwanga ngoyise, laboyise baboyise, abele abalandeli bakhe impango lokuthunjiweyo lempahla; enze amacebo okuhlasela inqaba, kodwa kube ngokwesikhatshana nje.

²⁵Uzasukela inkosi yeningizimu ngamandla lesibindi elebutho elikhulu; inkosi yeningizimu ilwe laye ilebutho elikhulu elilamandla; kodwa kayiyikuma, ngoba abantu bazayenzela amacebo.

²⁶Lalabo abadla ukudla kwayo okumnandi bazayibhubhisa, ibutho layo likhukhulwe, kubulawe abanengi.

²⁷Amakhosi amabili esidla ndawonye azakwenza amacebo, akhohlisane, kodwa kungawasizi. Kodwa ukuphela kuzafika ngesikhathi esimisiweyo.

²⁸Uzabuyela elizweni lakhe elempahla enengi, kodwa inhliziyo yakhe imelane lesivumelwano esingcwele, enze akufunayo, abesebuyela elizweni lakhe.

²⁹Ngesikhathi esimisiweyo uzabuya ahlasele iGibhithe; kodwa kakuyikuba njengakuqala.

³⁰Imikhumbi yamaRoma izamhlasela, abesesesaba, abuyele emuva; uzabuyela ethukuthele, asukelane lesivumelwano esingcwele. Uzabuya asekele labo abadele isivumelwano esingcwele.

³¹Amabutho akhe azafika angcolise ithempeli lenqaba, asuse umnikelo otshiswa insuku zonke, amise amanyala aletha ukuchitheka.

³²Uzabakhohlisa ngokubabamba amehlo labo abephula isivumelwano; kodwa abantu abamaziyo uNkulunkulu wabo bazakuma baqine, balwe.

³³Abahlakaniphileyo babantu bazafundisa abanengi, kodwa bezakuwa ngenkemba langomlilo, babanjwe, bathunjwe okwensuku ezithile.

³⁴Ekubulaweni kwabo bazasizwa kancinyane, loba abanengi balabo abazihlanganisa labo bengelaqiniso.

³⁵Abanye babahlakaniphileyo bazabulawa ukuze abanye bahlolwe, bahlanjululwe, benziwe babe mhlophe, kuze kufike isikhathi sokuphela, ngoba kungokwesikhathi esimisiweyo.

³⁶Inkosi izakwenza ekuthandayo; izaziphakamisa izikhulise ngaphezu kwabo bonke onkulunkulu, ikhulume okumangalisayo ngonkulunkulu, iphumelele kuze kuphelele intukuthelo. ngoba okumisiweyo kuzakwenziwa.

³⁷Kayiyikunanza onkulunkulu baboyise lonkulunkulu othandwa ngabesifazana; kayiyikunanza loyedwa uNkulunkulu, ngoba izazikhulisa ibe phezu kwabo bonke.

³⁸Izadumisa uNkulunkulu wezinqaba; uNkulunkulu owayengaziwa ngoyise izamdumisa ngegolide langesiliva, langamatshe amahle, langezipho ezibiza imali enengi.

³⁹Izagcwalisa inqaba zayo eziqinileyo ngabantu bezizweni, abantu abakhonza uNkulunkulu wezizweni; labo abayivumayo ibanike udumo, ibenze ababusi phezu kwabanengi, ibanike umvuzo wamazwe.

⁴⁰Ngesikhathi sokuphela inkosi yeningizimu izayihlasela; kodwa inkosi yenyakatho izayisukela njengesivunguzane ilezinqola, labagadi bamabhiza, lemikhumbi eminengi, ihlasele amazwe, ikhukhule, idlule.

⁴¹Izangena elizweni elihle, ibulale amatshumi azinkulungwane; kodwa iEdoma loMowabi lengxenye enkulu yabeAmoni bazaphunyuka esandleni sayo.

⁴²Izaphakamisela isandla sayo emazweni, lelizwe leGibhithe kaliyikuphepha.

⁴³Izathatha inotho yegolide leyesiliva lazo zonke izinto eziligugu zeGibhithe; amaLibiya lamaEtiyopiya azayikhonza.

⁴⁴Kodwa izakwethuswa yimibiko evela empumalanga lenyakatho, iphume ngokuthukuthela okukhulu ukuqeda lokutshabalalisa abanengi.

⁴⁵Izamisa amathente ayo obukhosi phakathi kolwandle lentaba enhle engcwele. Kodwa izakufa, kungekho ongayisiza.