Read Ndebele-IBhayibhili Elingcwele 2006 Udanyela 4 Bible Online

Udanyela 4 - Ndebele-IBhayibhili Elingcwele 2006 bible

Udanyela 4

¹Inkosi uNebukadinezari wathi kubo bonke abantu lezizwe lezindimi ezisemhlabeni wonke: Ukuthula kakwande phakathi kwenu!

²Kube kuhle kimi ukutshengisa izibonakaliso lezimangaliso uNkulunkulu oPhezukonke angenzele zona.

³Yeka ubukhulu bezibonakaliso zakhe, lamandla ezimangaliso zakhe! Umbuso wakhe ungumbuso ongelakuphela, lokubusa kwakhe kungokwezizukulwana zonke.

⁴Mina Nebukadinezari, ngangichelesile endlini yami, ngiphumelela esigodlweni sami.

⁵Ngaphupha iphupho elangethusayo, ngisalele embhedeni wami imicabango lemibono yengqondo yami yangethusa.

⁶Ngasengikhupha isimemezelo sokuthi bonke abahlakaniphileyo beBhabhiloni balethwe phambi kwami ukuze bangitshele ingcazelo yephupho.

⁷Zasezifika izanuse lezangoma lamaKhaladiya labafunda okutshiwo zinkanyezi, ngabatshela iphupho, kodwa behluleka ukungitshela ingcazelo yalo.

⁸Ekucineni uDaniyeli wafika kimi, lowo owathiwa ibizo likaNkulunkulu wami lokuthi uBeliteshazari, yena olomoya wabonkulunkulu abangcwele; ngamtshela iphupho ngathi:

⁹Wena Beliteshazari, nduna yezanuse, ngoba ngiyazi ukuthi ulomoya wabonkulunkulu abangcwele, lokuthi kakulamfihlakalo ekwehlulayo, nanti iphupho engiliphuphileyo; ngitshela ingcazelo yalo.

¹⁰Nansi imibono eyafika engqondweni yami ngisaIele embhedeni. Ngabona isihlahla phakathi komhlaba, sasiside kakhulu.

¹¹Isihlahla sakhula, saqina, isicholo saso safinyelela ezulwini, sabonakala emhlabeni wonke.

¹²Amahlamvu aso ayemahle, lezithelo zaso zazinengi, kukhona kiso ukudla kwabo bonke. Inyamazana zeganga zathola umthunzi ngaphansi kwaso, lenyoni zaphezulu zahlala engatsheni zaso, layo yonke inyama yondliwa kiso.

¹³Ngabona emibonweni yengqondo yami lapho ngilele embhedeni ongcwele olindayo esehla evela ezulwini.

¹⁴Wamemeza wathi: Sigamuleleni phansi isihlahla, liqume ingatsha zaso, lisiphundle amahlamvu, lichithachithe izithelo zaso. Izinyamazana kazibaleke ngaphansi kwaso, lenyoni engatsheni zaso.

¹⁵Kodwa litshiye isidindi sigxumeke ngempande emhlabathini, sibotshiwe ngebhanti lensimbi lethusi phakathi kwamahlungu otshani beganga. Kathanjiswe yena ngamazolo aphezulu, ahlale etshanini lezinyamazana.

¹⁶Kasayikuba lengqondo yomuntu, uzakuba lengqondo yenyamazana iminyaka eyisikhombisa.

¹⁷Lesisigwebo siyisimemezelo sabangcwele abalindayo, isinqumo selizwi lazo, ukuze abaphilayo bazi ukuthi oPhezukonke uyabusa umbuso wabantu, awunike lowo athanda ukumnika, amise phezu kwawo abantukazana.

¹⁸Leliphupho ngaliphupha mina nkosi uNebukadinezari. Wena-ke, Beliteshazari, wangitshela ingcazelo yalo, ngoba bonke abahlakaniphileyo embusweni wami bengelamandla ukungitshela ingcazelo yalo; kodwa wena ulawo. ngoba umoya wabonkulunkulu abangcwele ukuwe.

¹⁹Khona uDaniyeli obizo lakhe lalinguBeliteshazari wamangala okwesikhatshana, lemicabango yakhe yamethusa. Inkosi yasisithi: Beliteshazari, ungethuswa liphupho lengcazelo yalo. UBeliteshazari waphendula wathi: Nkosi yami, iphupho kalibe ngelalabo abakuzondayo, lengcazelo yalo ibe ngeyezitha zakho.

²⁰Isihlahla owasibonayo esakhula saqina, lesicholo saso safinyelela phezulu, sabonakala emhlabeni wonke,

²¹silamahlamvu amahle lezithelo ezinengi, silokudla kwabo bonke, lezinyamazana zeganga zathola umthunzi ngaphansi kwaso, lenyoni zaphezulu zahlala engatsheni zaso,

²²singuwe, wena nkosi, osukhulile waqina. Ubukhulu bakho sebukhulile, bafinyelela phezulu, lokubusa kwakho kwafinyelela ekucineni komhlaba.

²³Njengoba inkosi yabona ongcwele olindayo esehla evela ezulwini esithi: Gamulelani phansi isihlahla, lisiqede, kodwa litshiye isidindi sigxumeke ngempande emhlabathini sibotshwe ngebhanti lensimbi lethusi emahlungwini otshani beganga; yena athanjiswe ngamazolo aphezulu, ahlale lenyamazana zeganga, kuze kudlule iminyaka eyisikhombisa.

²⁴Yiyo le ingcazelo, nkosi. Iyisimemezelo soPhezukonke ngenkosi yami

²⁵sokuthi uzaxotshwa ebantwini, lenhlalo yakho izakuba lenyamazana zeganga, bakudlise utshani njengenkabi, bakunethise ngamazolo amazulu, lezikhathi eziyisikhombisa zidlule phezu kwakho, uze wazi ukuthi oPhezukonke uyabusa umbuso wabantu, uwunika lowo amthandayo.

²⁶Njengoba kwalaywa ukuthi kutshiywe isidindi sesihlahla silempande, umbuso wakho uzaqina kusukela esikhathini ozakwazi ngaso ukuthi uNkulunkulu uyabusa.

²⁷Ngakho-ke, wena nkosi, akuzwe iseluleko sami; yekela izono zakho, wenze ukulunga, uyekele leziphambeko zakho ngokutshengisa isihawu kwabacindezelweyo, ukuze mhlawumbe ungahlala uchelesile okwesikhathi eside.

²⁸Konke lokhu kwayehlela inkosi uNebukadinezari.

²⁹Ekupheleni kwenyanga ezilitshumi lambili inkosi yayihambahamba ephahleni lwendlu yenkosi eBhabhiloni,

³⁰yathi: Kakusilo yini leliBhabhiloni elikhulu engalakha ngamandla ami amakhulu, laba ngumuzi wenkosi, laba lodumo lobukhosi bami?

³¹Kwathi inkosi ingakaqedi ukukhuluma, kwezwakala ilizwi livela ezulwini lisithi: Wena nkosi Nebukadinezari, kutshiwo kuwe ukuthi: Ubukhosi bususiwe kuwe;

³²uzaxotshwa ebantwini, uhlale lenyamazana zeganga, udle utshani njengenkabi okweminyaka eyisikhombisa ukuze wazi ukuthi oPhezukonke uyabusa umbuso wabantu, awunike lowo athanda ukumnika.

³³Lahle lagcwaliseka lelolizwi kuNebukadinezari. Waxotshwa ebantwini, wadla utshani njengenkabi, lomzimba wakhe wathanjiswa ngamazolo aphezulu, lezinwele zakhe zakhula zaze zalingana lensiba zelinqe, lenzipho zakhe zafanana lenzipho zenyoni.

³⁴Ekupheleni-ke kwezinsuku mina Nebukadinezari ngaphakamisela amehlo ami emazulwini, lokuqedisisa kwami kwabuyela kimi; ngambusisa oPhezukonke, ngamdumisa, ngamhlonipha yena ophila kuze kube nininini. Ngoba ubuninimandla bakhe buyibuninimandla ngobungapheliyo, lombuso wakhe usuka kusizukulwana kusiya kusizukulwana;

³⁵futhi bonke abakhileyo emhlabeni babalelwe njengeze, wenza njengentando yakhe ebuthweni lamazulu, lakwabakhileyo emhlabeni; kakho ongavimbela isandla sakhe, loba athi kuye: Wenzani?

³⁶Ngasona lesosikhathi yabuya kimi ingqondo yami, lobukhosi bami kanye lodumo lwami kwabuyiselwa kimi, lodumo embusweni wami. Abeluleki bami leziphathamandla zami zangidinga, ngabuyiselwa embusweni wami, kwengezelelwa ubukhulu bami.

³⁷Ngalokho-ke mina Nebukadinezari ngiyayibonga ngiyiphakamise ngiyidumise iNkosi yaphezulu; ngoba yonke imisebenzi yayo ilungile, lendlela zayo zinhle. Labo abazigqajayo uyabathobisa.