Read Ndebele-IBhayibhili Elingcwele 2006 Udanyela 7 Bible Online

Udanyela 7 - Ndebele-IBhayibhili Elingcwele 2006 bible

Udanyela 7

¹Ngomnyaka wokuqala kaBelishazari, inkosi yeBhabhiloni, uDaniyeli waphupha iphupho, wabona lemibono ngengqondo yakhe esalele embhedeni wakhe. Waselibhala iphupho, waqalisa

²wathi: Ngabona embonweni wami ebusuku imimoya evela inhlangothi zonke, iqubula ulwandle olukhulu.

³Kwaphuma olwandle izilo ezine ezinkulu ezingafananiyo.

⁴Esokuqala sasifanana lesilwane, silempiko zenkozi. Kwathi lapho ngisakhangele, impiko zaso zephulwa, saphakanyiswa omhlabathini, samiswa ngenyawo ezimbili njengomuntu, sanikwa ingqondo yomuntu.

⁵Isilo sesibili sasifanana lebhere. Sasiquthile silembambo ezintathu emlonyeni waso phakathi kwamazinyo aso. Kwathiwa kuso: Vuka, udle inyama enengi.

⁶Emva kwalokho ngakhangela, ngabona esinye esifanana lengwe, silempiko ezine zenyoni emhlana waso, silamakhanda amane, sanikwa amandla okubusa.

⁷Emva kwalokho ngabona emibonweni ebusuku isilo sesine, esesabekayo kakhulu, silamandla amakhulu, silamazinyo amakhulu ensimbi, sadla safohloza, lokuseleyo sakuhlifiza ngenyawo. Sasehlukile kuzo zonke izilo ezazingaphambi kwaso, silempondo ezilitshumi.

⁸Ngisazikhangele impondo, kwaphuma olunye phakathi kwazo, oluncinyane; kwasekusitshunwa ezintathu ezokuqala ukulucentela indawo. Lwalulamehlo afanana lawomuntu, lomlomo okhuluma amazwi okuzincoma.

⁹Ngisakhangele, kwabekwa izihlalo zobukhosi, kwahlala oyisimakade; izembatho zakhe zazimhlophe njengeliqhwa elikhithikayo, lenwele zekhanda lakhe zinjengoboya bezimvu obuhlambulukileyo; isihlalo sakhe sobukhosi singamalangabi omlilo, lamavili aso enjengomlilo ovuthayo,

¹⁰Kwavela umkhonjwana womlilo, waphumela ngaphambi kwakhe. Inkulungwane zezinkulungwane zamkhonza, lezinkulungwane ezilitshumi zezinkulungwane ezilitshumi zema phambi kwakhe. Isahlulelo sazimisa, lezincwadi zavulwa.

¹¹Ngasengikhangela ngenxa yomsindo wamazwi okuzincoma ayekhulunywa luphondo. Ngisakhangele, isilo sabulawa, lomzimba waso wachithwa, wanikelwa ukutshiswa ngomlilo.

¹²Kodwa ezinye izilo ukubusa kwazo kwathathwa, kodwa impilo yazo yelulwa okwesikhathi esithile.

¹³Ngabona emibonweni ebusuku kufika lamayezi aphezulu ofanana lendodana yomuntu, wafika koyisimakade, wasondezwa phambi kwakhe.

¹⁴Wanikwa amandla okubusa, lodumo, lombuso, ukuze bonke abantu bezizwe lezindimi bamkhonze. Ukubusa kwakhe kakulakuphela, kakuyikudlula, lombuso wakhe uyilowo ongayikuchithwa.

¹⁵Mina Daniyeli, umoya wami wakhathazeka, lemibono yengqondo yami yangethusa.

¹⁶Ngasondela komunye walabo abemi lapho, ngambuza iqiniso ngakho konke lokhu. Wasengitshela, wangibonisa ingcazelo yalezozinto.

¹⁷Wathi: Lezizilo ezine ezinkulu zingamakhosi amane azavela emhlabeni.

¹⁸Kodwa abangcwele boPhezukonke bazakwemukeliswa umbuso, ube ngowabo kuze kube nininini.

¹⁹Ngasengithanda ukwazi iqiniso mayelana lesilo sesine esasehlukile kwezinye zonke, sisesabeka kakhulu, silamazinyo ensimbi lenzipho zethusi, esadla safohloza, sahlifiza okuseleyo ngenyawo zaso.

²⁰Futhi ngathanda ukwazi langempondo ezilitshumi ezazisemhlokweni yaso, langolunye uphondo okwathi ekuphumeni kwalo zawa ezintathu, uphondo olwalulamehlo lomlomo owakhuluma amazwi okuzincoma, olwakhanya lulukhulu kulezinye.

²¹Ngisakhangele, loluphondo lwalwa labangcwele, lwabanqoba,

²²kwaze kwafika oyisimakade, lesahlulelo saphiwa abangcwele boPhezukonke; kwafika isikhathi sokuthi abangcwele bemukeliswe umbuso.

²³Wangiphendula wathi: Isilo sesine sizakuba ngumbuso wesine emhlabeni, ozakwehluka kuyo yonke imibuso; uzachitha umhlaba wonke, uwuhlifize, uwufohloze.

²⁴Impondo ezilitshumi zingamakhosi alitshumi azavela kulowombuso. Kuzavela enye emva kwawo, yona izakwehluka kwawokuqala, izachitha amakhosi amathathu.

²⁵Izakhuluma kubi ngoPhezukonke, ihluphe abangcwele boPhezukonke. Izanakana ukuguqula izikhathi zemikhosi lomlayo. Abangcwele bazanikelwa esandleni sayo, iminyaka emithathu lengxenye.

²⁶Ukulunga kuzahlala, kususwe ukubusa kwayo, kuqedwe kuchithwe nya.

²⁷Amandla lobukhulu bemibuso yonke engaphansi komthunzi welanga kuzanikwa abantu abangcwele boPhezukonke. Ukubusa kwabo kakuyikuphela, layo yonke imibuso izabakhonza ibalalele.

²⁸Luphelela lapha udaba. Mina Daniyeli, imicabango yami yangethusa kakhulu, kwaphenduka lebala lami. Ngakugcina kwaba yimfihlo.