Read Ndebele-IBhayibhili Elingcwele 2006 Udanyela 8 Bible Online

Udanyela 8 - Ndebele-IBhayibhili Elingcwele 2006 bible

Udanyela 8

¹Ngomnyaka wesithathu wokubusa kwenkosi uBelishazari kwabonakala umbono kimi mina Daniyeli, emva kwalowo owabonakala kimi kuqala.

²Ngabona embonweni kungathi ngiseSusa emzini omkhulu welizwe iElamu; ngabonake embonweni kungathi ngisemfuleni iUlayi.

³Nga phakamisa amehlo ami, khangela, inqama imi ekhunjini lomfula. Yayilempondo ezimbili, impondo zombili, zazinde, olwesibili lulude okwedlula olunye.

⁴Ngayibona inqama igqikilela ngentshonalanga langenyakatho langeningizimu; kwakungelanyamazana eyayingema phambi kwayo kwakungekho muntu ongaphephisa lutho emandleni ayo; yayizenzela santando, yazikhukhumeza.

⁵Kwathi ngisacabanga, khangela, kwaqhamuka impongo ivela ngentshonalanga idabula umhlaba wonke, inganyatheii phansi. Yayilophondo oluqaphileyo phakathi kwamehlo ayo.

⁶Yafika enqameni elempondo ezimbili engangiyibone imi ekhunjini lomfula, yayisukela ekuthukutheleni kwayo okukhulu.

⁷Ngayibona isondela enqameni, yayithukuthelela kakhulu, yayitshaya, yephula impondo zayo zombili. Inqama yayingelamandla okuyimela; impongo yayiwisela phansi, yayihlifiza; kwakungekho owayengayephula inqama emandleni ayo.

⁸Impongo yazikhukhumeza kakhulu; kodwa kwathi isilamandla, uphondo lwayo olukhulu lwephuka, endaweni yalo kwaphuma impondo ezine eziqaphileyo zikhangele emagumbini amane amazulu.

⁹Kolunye lwazo kwaphuma uphondo oluncinyane, lwakhula kakhulu, lwatshengisa amandla ayo enginizimu lempumalanga laselizweni elihle.

¹⁰Lwakhula lwaba lukhulu lwaze lwafinyelela ebuthweni lamazulu; lwazidilizela phansi ezinye inkanyezi, lwazinyathela.

¹¹Lwazikhukhumeza lwaze lwalingana lenkosi yezinkanyezi. Lwamisa iminikelo yayo etshiswa insuku zonke, lwadiliza indlu yayo engcwele,

¹²lwanikela lezinkanyezi; lwafaka okubi esikhundleni somnikelo, lwaphosela phansi iqiniso, luphumelela kukho konke.

¹³Ngasengisizwa ongcwele okhuluma, lomunye owathi kulowo okhulumayo: Koze kube nini lumbono usiba khona owomnikelo otshiswa insuku zonke? Koze kube nini isono esichithayo sisenziwa? Koze kube nini kuyekelwa indawo engcwele lezinkanyezi ukuthi zinyathelwe phansi?

¹⁴Wathi kuye: Kuzaze kube yizikhathi zokuhlwa lezokusa eziyizinkulungwane ezimbili lamakhulu amathathu zokunikelwa kweminikelo; besekulungiswa indawo engcwele.

¹⁵Kwathi sengiwubonile umbono, mina Daniyeli, ngazama ukuwuqedisisa. Khangela, kwasekusima phambi kwami othile olesimo somuntu.

¹⁶Ngezwa ilizwi lomuntu phakathi komfula iUlayi, limemeza lisithi: Gabriyeli, yenza lumuntu ukuthi awuqedisise umbono.

¹⁷UGabriyeli wasesondela lapho engimi khona. Esefikile ngatshaywa luvalo, ngathi mbo ngobuso phansi. Kodwa yena wathi kimi: Ndodana yomuntu, qedisisa ukuthi umbono ungowesikhathi sokucina.

¹⁸Kwathi esakhuluma lami, ngaqaleka ngawela phansi; kodwa wangithinta, wasengiphakamisa engimisa ngenyawo.

¹⁹Wathi: Khangela, ngizakutshela okuzakwenzeka ekupheleni kwentukuthelo, ngoba ukucina kuzakuba ngesikhathi esimisiweyo.

²⁰Mayelana lenqama oyibonileyo ilempondo ezimbili, zona zingamakhosi aseMede lamaPerisiya.

²¹Impongo iyinkosi yamaGriki, lophondo olukhulu phakathi kwamehlo ayo luyinkosi yokuqala.

²²Uphondo olwephukayo, okwakhula impondo ezine endaweni yalo, lokhu kuyimibuso emine ezavela esizweni sayo, kodwa ingabi lamandla ayo.

²³Ensukwini zokucina zaleyomibuso, lapho izono zayo sezizinkulu, kuzavela inkosi elolunya elukhuni lekhohlisayo.

²⁴Izakuba lamandla amakhulu, ilethe ukuchitheka okwesabekayo, iphumelele kulokho ekwenzayo, ichithe amaqhawe labantu babangcwele.

²⁵Ngobuqili bayo izakwenza inkohliso iphumelele, izikhukhumeze engqondweni yayo, ichithe abanengi ngokubajuma, ize imelane leNkosi yamakhosi, kodwa izaphohlozwa kungeyisikho ngezandla zomuntu.

²⁶Umbono wezikhathi zokuhlwa lezokusa osulandisiwe uliqiniso. Kodwa kawube yimfihlo, ngoba ungowensuku ezinengi ezizayo.

²⁷Mina Daniyeli, ngasengiphela amandla, ngagula insuku ezithile; ngavuka ngenza umsebenzi wenkosi, kodwa ngamangaliswa yilowombono, kangaze ngawuqedisisa.