Read Ndebele-IBhayibhili Elingcwele 2006 Udanyela 9 Bible Online

Udanyela 9 - Ndebele-IBhayibhili Elingcwele 2006 bible

Udanyela 9

¹Ngomnyaka wokuqala kaDariyusi indodana kaAhasuwerusi, umMede ngokuzalwa, owabekwa waba yinkosi yamaKhaladiya,

²ngomnyaka wokuqala wokubusa kwakhe, mina Daniyeli ngabona ezincwadini ukuthi ubunengi beminyaka yokuchitheka kweJerusalema, elakhuluma ngayo ilizwi le Nkosi kuJeremiya umprofethi, uzakuba yiminyaka engamatshumi ayisikhombisa.

³Ngasengikhuleka kuNkulunkulu iNkosi, ngayincenga, ngizila ukudla, ngigqoke amalembu amasaka, ngihlezi esilotheni.

⁴Ngakhuleka e Nkosi ni uNkulunkulu wami. ngavuma izono ngathi: Wena Nkosi, Nkulunkulu omkhulu lowesabekayo, ogcina isivumelwano lothando kwabakuthandayo labagcina imilayo yakho,

⁵sonile, saziphatha kubi, senza okubi, sakuhlamuka, sayephula imilayo yakho lezimiso zakho;

⁶kasilalelanga inceku zakho abaprofethi, ezikhulume ebizweni lakho emakhosini ethu, lezikhulwini zethu, lakubobaba, lakibo bonke abantu belizwe.

⁷Kukhona ukulunga kuwe, Nkosi, kodwa kithi kukhona ihlazo njengalamhlanje ebantwini bakoJuda, labakhileyo eJerusalema, lakuIsrayeli wonke, kubo abaseduze labakhatshana. emazweni wonke obaxotshele kiwo ngenxa yenkohliso abayenze kuwe.

⁸Kukhona kithi ihlazo, Nkosi, emakhosini ethu, lezikhulwini zethu, lakubobaba, ngoba sonile kuwe.

⁹Kuwe, Nkosi uNkulunkulu wethu, kukhona isihawu lokuthethelela; ngoba sikuhlamukile.

¹⁰Kasilalelanga ilizwi lakho ngokulandela imilayo yakho owasimisela yona ngezinceku zakho abaprofethi.

¹¹UIsrayeli wonke weqe umlayo wakho, waphambuka kiwo, wala ukulalela ilizwi lakho. Isiqalekiso lesifungo esibhaliweyo emlayweni kaMozisi inceku yakho sehliselwe phezu kwethu, ngoba sonile kuwe.

¹²Uqinisile amazwi akho owawakhuluma emelene lathi njalo emelene labahluleli bethu abasahlulelayo ngokusehlisela umonakalo omkhulu, ngoba emazulwini wonke kakuzanga kwenziwe okunjengalokho okwenziwe eJerusalema.

¹³Lumonakalo wonke usehlele njengoba kubhaliwe emlayweni kaMozisi; kodwa kasiyincenganga i Nkosi uNkulunkulu wethu, ukuthi sitshiye izono zethu, silalele iqiniso layo.

¹⁴Ngakho-ke i Nkosi yasisidlinzeka ngomonakalo, yawehlisela phezu kwethu; ngoba i Nkosi uNkulunkulu wethu ilungile emisebenzini yayo yonke eyenzileyo, thina kasililalelanga ilizwi layo.

¹⁵Khathesi-ke, Nkosi Nkulunkulu wethu, owabakhuphayo abantu bakho elizweni leGibhithe ngesandla esilamandla, wazenzela udumo njengalamhlanje, sonile senza okubi.

¹⁶Nkosi, ngakho konke ukulunga kwakho dedisa ulaka lwakho lokuthukuthela kwakho emzini weJerusalema, entabeni yakho engcwele. Ngoba ngenxa yezono zethu langobubi babobaba iJerusalema labantu bakho bayisiga phakathi kwabo bonke abasihanqileyo.

¹⁷Ngakho-ke, Nkulunkulu wethu, zwana umkhuleko wenceku yakho lokuncenga kwayo; langenxa yebizo lakho, Nkosi, ukhanyise futhi ubuso bakho endlini yakho engcwele echithekileyo.

¹⁸Nkulunkulu wami, beka indlebe yakho uzwe; vula amehlo akho ubone ukuchitheka kwethu, lokomuzi obizwa ngebizo lakho; ngoba kasikhuleki kuwe ngenxa yokulunga kwethu, kodwa ngenxa yesihawu sakho esikhulu.

¹⁹Nkosi, zwana! Nkosi, thethelela! Nkosi, nanzelela wenze! Ungalibali, ngenxa yebizo lakho, Nkulunkulu wami, ngoba umuzi wakho labantu bakho babizwa ngebizo lakho.

²⁰Kwathi ngisakhuluma ngikhuleka, ngivuma izono zami lezono zabantu bakithi uIsrayeli, ngincenga i Nkosi uNkulunkulu wami ngentaba engcwele kaNkulunkulu wami,

²¹ngisakhuluma ngikhuleka, lowomuntu uGabriyeli engambona embonweni kuqala waphaphela kimi masinyane ngesikhathi somnikelo wakusihlwa.

²²Wafika wathi kimi: Daniyeli, sengifikile ukuze ngikunike ukuhlakanipha lokuqedisisa.

²³Ekuqaliseni kokuncenga kwakho kwaphuma ilizwi, ngize ukukutshela lona, ngoba uyathandeka kakhulu. Ngakho-ke lilalele ilizwi, uqedisise umbono.

²⁴Amaviki angamatshumi ayisikhombisa amiswe phezu kwabantu bakho laphezu komuzi wakho ongcwele ukuqeda ububi, lokuphela izono, lokwenzela isono inhlawulo yokuthula, lokungenisa ukulunga okulaphakade, lokuphawula umbono lesiprofethi, lokugcoba ingcwelengcwele.

²⁵Ngakho-ke yazi uqedisise ukuthi kusukela ekuphumeni kwelizwi ukuthi kwakhiwe futhi iJerusalema kuze kube sekufikeni kogcotshiweyo, ungumbusi, kuzakuba ngamaviki ayisikhombisa. IJerusalema izahlala yakhiwe okwamaviki angamatshumi ayisithupha lambili ilezindlela lemifolo yamanzi, kodwa kuzakuba yisikhathi sokuhlupheka.

²⁶Lemva kwamaviki angamatshumi ayisithupha lambili uMesiya uzaqunywa, kodwa kungesi kwakhe; lomuzi lendawo engcwele abantu bombusi abazakuza bazawuchitha; lokuphela kwawo kuzakuba ngesikhukhula, njalo kuze kube sekupheleni kwempi ukuchitheka kumisiwe.

²⁷Njalo uzaqinisa isivumelwano labanengi okweviki eyodwa, laphakathi kweviki uzakwenza umhlatshelo lomnikelo kume; ngophiko lwezinengiso kuzakwenza kuchitheke, kuze kube sekutshabalaleni, lokumisiweyo kuzathululelwa phezu kochithwayo.