Read Ndebele-IBhayibhili Elingcwele 2006 Uhosiya 2 Bible Online

Uhosiya 2 - Ndebele-IBhayibhili Elingcwele 2006 bible

Uhosiya 2

¹Bizani abafowenu lithi ngabantu bami, labodadewenu lithi ngabathandekayo.

²Solani unyoko, limsole, ngoba kasuye umkami, lami kangisiyo indoda yakhe, ukuze ayekele ukuwula kwakhe, asuse izigqizo zokufeba kwakhe emabeleni akhe,

³hlezi ngimhlubule abe nqunu, abe njengosukwini azalwa ngalo, ngimenze afanane lenkangala, ngimbeke abe njengelizwe elomileyo, ngimbulale ngokoma.

⁴Kangiyikubahawukela labantwana bakhe, ngoba bangabantwana bokufetshwa.

⁵Ngoba unina wabo uwulile, owabazalayo wenzile ihlazo. Ngoba wathi: Ngizazilandela izithandwa zami, ezingipha ukudla lamanzi, loboya bezimvu, lefilakisi, lamafutha lokunathwayo.

⁶Ngalokho, khangela, ngizavala indlela yakhe ngameva, ngimakhele umduli ukuze angazitholi indlela zakhe ezindala.

⁷Uzathungatha izithandwa zakhe, kodwa angazifici; uzazidinga, kodwa angazitholi. Abesesithi: Sengizabuyela endodeni yami yokuqala, ngoba kwakungcono kimi ngalesosikhathi kulakhathesi.

⁸Wayengakwazi ukuthi kwakuyimi engangimnika amabele lewayini elitsha lamafutha, ngimnika isiliva esinengi legolide elinengi abakusebenzisela uBhali.

⁹Ngakho ngizathatha amabele ami ngesikhathi sokuvuna, lewayini lami elitsha ngesikhathi salo esimisiweyo; ngithathe loboya bami bezimvu lesikhusha sami, okuzakwembesa ubunqunu bakhe.

¹⁰Sengizakwambula ihlazo lakhe phambi kwezithandwa zakhe, kungabi khona omophulayo esandleni sami.

¹¹Ngizaqeda intokozo yakhe yonke, amadili akhe, lokuthwasa kwenyanga, lamasabatha akhe, lemikhosi yakhe yonke emisiweyo.

¹²Ngizagamula izihlahla zakhe zamavini lezemikhiwa, atsho ngazo ukuthi: Lezi zingumvuzo wami izithandwa zami ezinginike wona. Ngizazenza zibe liGusu, zidliwe zinyamazana zeganga.

¹³Ngizamphindisela ngenxa yezinsuku zemikhosi yaboBhali, ayebatshisela ngazo impepha, ezicecisa ngamasongo langamangqongqo, walandela izithandwa zakhe, wangikhohlwa, kutsho i Nkosi.

¹⁴Ngalokho, khangela, ngizamhuga, ngimuse enkangala, ngimduduze.

¹⁵Lapho-ke ngizambuyisela izivini zakhe, ngenze isihotsha seAkori, okutsho iNhlupheko, sibe nguMnyango wethemba. Uzaphendula lapho njengensukwini zobutsha bakhe, njengesukwini lokuphuma kwakhe elizweni leGibhithe.

¹⁶Kuzakuthi ngalolosuku, kutsho i Nkosi, ungibize uthi: Mkami; ungabe usangibiza: Bhali wami.

¹⁷Ngoba ngizasusa amabizo aboBhali emlonyeni wakhe, angabe esezwakala futhi.

¹⁸Ngalolosuku ngizakwenza isivumelwano lenyamazana zeganga lenyoni zamazulu lezinto ezihahabayo ukuze zingabahluphi. Ngizakwephula idandili lenkemba, ngiqede impi emhlabeni, ngikulalise phansi uvikelekile.

¹⁹Ngizazimisela wena Israyeli ube ngumkami kokuphela, ngizimisele wena ngokuqotho langokulunga langothando.

²⁰Ngizazimisela wena ngeqiniso; uzangazi mina Nkosi.

²¹Kuzakuthi-ke ngalolosuku, ngizanika impendulo, kutsho i Nkosi, ngizaphendula amazulu, lona liphendule umhlaba,

²²lomhlaba uphendule amabele lewayini elitsha lamafutha, wona aphendule uJizereyeli.

²³Ngizamhlanyela uIsrayeli elizweni abe yisivuno sami. Ngizamhawukela uLoRuhama, ngithi kuLoAmi: Lina lingabantu bami; yena athi: Wena unguNkulunkulu wethu.