Read Ndebele-IBhayibhili Elingcwele 2006 Uhosiya 4 Bible Online

Uhosiya 4 - Ndebele-IBhayibhili Elingcwele 2006 bible

Uhosiya 4

¹Zwanini ilizwi le Nkosi, lina bantwana bakoIsrayeli, ngoba i Nkosi imangalela abakhileyo elizweni. Kakukho uthembeko lomusa lokumazi uNkulunkulu elizweni.

²Kukhona ukwephulwa kwezifungo, lokuqamba amanga, lokubulala, lokweba, lokufeba; baqhubeka ngokwenza okubi, lamacala egazi ayalandelana.

³Ngakho-ke ilizwe liyalila, labo bonke abahlala kilo baphela amandla, kanye lenyamazana zeganga lenyoni zamazulu, lenhlanzi zolwandle ziyaphela.

⁴Kakungabi khona umuntu owethwesa omunye icala, lomangelela omunye, ngoba mina ngizakwethwesa icala, wena mpristi.

⁵Uzakhubeka emini lebusuku, umprofethi uzakhubeka kanye lawe; uyasibulala isizwe sakini.

⁶Abantu bami bayabhubha ngokuswela ukwazi; ngoba ukwalile ukwazi, lami ngizakwala, ungangisebenzeli njengompristi. Lokhu usuwukhohliwe umlayo kaNkulunkulu wakho, lami ngizakhohlwa abantwana bakho.

⁷Ngokwanda kwabapristi kuyanda lokona kwabo kimi. Udumo lwabo ngizaluphendula lube lihlazo.

⁸Badla izono zabantu bami, bayizihwaba zobubi babo.

⁹Abapristi labantu bazaphathwa ngokufananayo, ngizabatshaya ngenxa yendlela zabo, ngibaphindisele ngenxa yezenzo zabo.

¹⁰Bazakudla, kodwa bangasuthi; bazawula, kodwa bangandi; ngoba bawulile ngokudela i Nkosi.

¹¹Iwayini elidala lelitsha liyaqeda ukuqedisisa kwabantu bami.

¹²Bayacela izeluleko esigodweni, lentonga yabo iyabeluleka. Ngoba umoya wokuwula ubaduhisile, bawulile ngokutshiya uNkulunkulu wabo.

¹³Benza imihlatshelo engqongeni zentaba, banikela iminikelo phezu kwamaqaqa, ngaphansi kwesihlahla se-okhi*, langaphansi kwemikhaya emhlophe, langaphansi kwezihlahla ezinkulu lezilamahlamvu ngoba zilemithunzi emihle. Ngakho-ke amadodakazi enu ayawula, labomakoti benu bayafeba.

¹⁴Kangiyikuwatshaya amadodakazi enu nxa ewula, labomakoti benu nxa befeba; ngoba lamadoda lawo ahamba lamawule, enze imihlatshelo yawo kanye lezifebe zethempelini; abantu abangelakuqedisisa bazabhubha.

¹⁵Loba wena Israyeli uwula, uJuda kangabi lacala. Lingangeni eGiligali, lingayi eBetiAveni, lingafungi lithi: Kuphila kukaJehova.

¹⁶UIsrayeli ulenkani njengethokazi elihlanyayo; i Nkosi izabelusela edlelweni elibanzi njengamawundlu yini?

¹⁷UEfrayimi uzihlanganisile lezithombe

¹⁸lexuku lezidakwa, bazinikela ekuwuleni, bethanda ihlazo okwedlula udumo lwabo.

¹⁹Umoya uzabakhukhula, ubagoqele ngempiko zawo, amalathi abo azabalethela ihlazo kuphela.