Read Ndebele-IBhayibhili Elingcwele 2006 Uhosiya 8 Bible Online

Uhosiya 8 - Ndebele-IBhayibhili Elingcwele 2006 bible

Uhosiya 8

¹Khalisa uphondo, ngoba ukhozi Iuzula phezu kwendlu ye Nkosi; abantu bami sebeqe isivumelwano sami, baphambuka emlayweni wami.

²Bamemeza kimi bathi: Siyakwazi, Nkulunkulu kaIsrayeli.

³UIsrayeli ulahlile okuhle, isitha sizaxotshana laye.

⁴Bazibekela amakhosi ngaphandle kwemvumo yami. Bamisa ababusi ngingazi mina. Ngesiliva sabo langegolide labo bazenzela izithombe ezabalethela ukuchitheka.

⁵Ngaleyisa ithole eladunyiswa nguwe, wena Samariya. Ukuthukuthela kwami kuyabavuthela. Koze kube nini uIsrayeli engahlanjululwanga?

⁶Umbazi walenza, kalisuye Nkulunkulu. Ithole leSamariya lizaphahlazwa libe yizihlephu.

⁷Ngoba behlanyela umoya, bazavuna isivunguzane. Amabele abo kawayikukhahlela, kawayikuba lanhlamvu; uba engaba lazo, zizadliwa ngabezizwe.

⁸UIsrayeli useginyiwe, wanyamalala phakathi kwezizwe usenjengesitsha esingelamsebenzi.

⁹Ngoba njengobabhemi oduhileyo bayile eAsiriya ukudinga usizo. UEfrayimi uqatshile izithandwa ukuthi zimsize.

¹⁰Lanxa beqatsha abasizi phakathi kwezizwe, sengizabaqoqa; khona bezakhawula ukubeka amakhosi lababusi.

¹¹Ngoba uEfrayimi akhile amalathi amanengi, asephenduke aba ngamalathi okona.

¹²Loba bengingambhalela imilayo yami ibe zinkulungwane ezilitshumi, bebezayitshaya into engaziwayo.

¹³Lanxa benikela inyama yemihlatshelo, babuye bayidle, mina Nkosi kangiyikuyemukela. Ngizakhumbula ububi babo, ngibaphindisele ngenxa yezono zabo, babuyele eGibhithe.

¹⁴UIsrayeli umkhohliwe uMenzi wakhe, wazakhela indlu zamakhosi; uJuda wandisile imizi ebiyelwe ngemithangala; kodwa ngizathumela umlilo phezu kwemizi yakhe, ozaqothula inqaba zakhe.