Read Ndebele-IBhayibhili Elingcwele 2006 Ujuweli 1 Bible Online

Ujuweli 1 - Ndebele-IBhayibhili Elingcwele 2006 bible

Ujuweli 1

¹Ilizwi le Nkosi lafika kuJoweli. indodana kaPethuweli, lisithi:

²Zwanini lokhu, lina badala, libeke indlebe lonke abakhileyo elizweni. Kwake kwenzeka okunje ensukwini zenu lensukwini zaboyihlo yini?

³Kutsheleni abantwana benu, labantwana benu bakutshele abantwana babo, labantwana babo bakutshele esinye isizukulwana esibalandelayo.

⁴Okutshiywe yintothoviyane kwadliwa yisikhonyane; okutshiywe yisikhonyane kwadliwa liqhwagi; lokutshiywe liqhwagi kwadliwa yinswabanda.

⁵Phaphamani, lina zidakwa, likhale inyembezi; lilani lonke, lina banathi bewayini, lililele iwayini elitsha, ngoba liqunyiwe lisuke emlonyeni wenu.

⁶Ngoba isizwe sihlasele ilizwe lami, silamandla, kasilakubalwa, Amazinyo aso anjengawesilwane, silamazinyo amakhulu njengesiIwane esisikazi.

⁷Siqedile amavini ami, sakhwixula izihlahla zami zemikhiwa, sazebula amaxolo azo. sawaphosela phansi, ingatsha zaso zaba mhlophe qhwa.

⁸Lilani njengentombi emsulwa egqoke ilembu lesaka, ililela umyeni wobutsha bayo.

⁹Umnikelo wokudla lowokunathwayo uqunyiwe wasuka endlini ye Nkosi. Izikhonzi ze Nkosi, abapristi, ziyakhala.

¹⁰Amasimu aphelile, umhlabathi uyakhala, ngoba amabele aphelile, lewayini elitsha kalisekho, lamafutha ayancipha.

¹¹Danani, lina balimi bomhlabathi, likhale, lina baphathi bezivini, ngenxa yengqoloyi lebhali*; ngoba isivuno semasimini siphelile.

¹²Ivini liyabuna, lomkhiwa wome, ipomegranati*, lesihlahla selala, lomkhuna, zonke izihlahla zeganga sezomile, lentokozo iphelile ebantwini.

¹³Gqokani izembatho zokulila, likhale, lina bapristi, lilani, lina zikhonzi zaselathini. Ngenani, lilale emalenjini amasaka bonke ubusuku, lina zikhonzi zikaNkulunkulu wami. Ngoba umnikelo wokudla lomnikelo wokunathwayo igodliwe ukunikelwa endlini kaNkulunkulu wenu.

¹⁴Zilani ukudla, lenze umhlangano onzulu lina badala, buthanisani bonke abakhileyo elizweni, endlini ye Nkosi uNkulunkulu wenu, likhuleke kuyo.

¹⁵Maye ngalolosuku! Ngoba usuku lwe Nkosi luseduze, luzafika njengokuchitheka okulethwa nguSomandla.

¹⁶Ukudla kakuqunywanga phambi kwamehlo ethu yini? Lokuthaba lentokozo kakuphelanga yini endlini kaNkulunkulu?

¹⁷Inhlanyelo iyabola ngaphansi kwamagade; indlu zamabele kazilalutho, leziphala zidilikile, ngoba amabele kawakho.

¹⁸Yeka ukukhala kwezifuyo! Imihlambi yenkomo ididekile ngoba kayilalo idlelo; lemihlambi yezimvu ihluphekile.

¹⁹Ngiyakhala kuwe, Nkosi, ngoba umlilo utshisile amadlelo, lamalangabi atshisa zonke izihlahla zeganga.

²⁰Lenyamazana zeganga ziyakhala kuwe, ngoba imifula yamanzi itshile, lomlilo utshisile amadlelo eganga.