Read Ndebele-IBhayibhili Elingcwele 2006 Ujuweli 2 Bible Online

Ujuweli 2 - Ndebele-IBhayibhili Elingcwele 2006 bible

Ujuweli 2

¹Vuthelani uphondo eZiyoni, lihlabe umkhosi entabeni yami engcwele. Kabathuthumele bonke abakhileyo elizweni, ngoba usuku lwe Nkosi luyeza, seluseduze,

²usuku lomnyama losizi, usuku lwamayezi lomnyama onzima. Njengobumnyama obembese izintaba, abantu abalamandla abangelakubalwa. Kakuzanga kube khona abanje ngabo kusukela endulo, futhi kabayikuba khona emva kwabo kuyo yonke iminyaka ezayo.

³Umlilo uyatshisa phambi kwabo, langemva kwabo kuvutha ilangabi. Phambi kwabo ilizwe lifanana lensimu yeEdeni, kodwa ngemva kwabo liyinkangala elugwadule; kakukho okungabaleka kubo.

⁴Bafanana lamabhiza, bagijima njengamabhiza.

⁵Umsindo wokweqa kwabo ezingqongeni zezintaba unjengomsindo wezinqola zempi, unjengokufahlaza kwelangabi lomlilo otshisa amabibi, banjengabantu abalamandla abahlelelwe impi.

⁶Phambi kwabo abantu bayathuthumela, bethuke bonke.

⁷Bayahlasela njengamaqhawe, bakhwele imiduli njengamadoda empi, baqhubekele phambili bonke bengaphambuki endleleni zabo.

⁸Kabasunduzani, ngulowo lalowo uhamba ngomgwaqo wakhe omkhulu; bafohla phakathi kwezikhali, bengavinjelwa.

⁹Bayatheleka emzini, bagijime phezu kwemiduli, bangene ezindlini, bengena ngamawindi njengesela.

¹⁰Nxa besiza, umhlaba uyanyikinyeka phambi kwabo, lamazulu athuthumele. Ilanga lenyanga kuphenduka kube mnyama, lezinkanyezi kucitshe ukukhanya kwazo.

¹¹I Nkosi izwakalisa ilizwi layo phambi kwebutho layo, ngoba ibutho layo likhulu kakhulu; logcina ilizwi layo ulamandla. Ngoba usuku lwe Nkosi lukhulu, luyesabeka kakhulu; ngubani ongalumela?

¹²Kanti lakhathesinje, itsho i Nkosi, phendukelani kimi ngenhliziyo yenu yonke, langokuzila ukudla, langokukhala, langokulila,

¹³lidabule inhliziyo yenu, hatshi izembatho zenu. Phendukelani e Nkosi ni, uNkulunkulu wenu, ngoba ilesisa lesihawu, iphuza ukuthukuthela, ilobubele obukhulu, izisola ngobubi.

¹⁴Mhlawumbe izaphenduka isihawukele, isitshiyele isibusiso, isibusiso somnikelo wokudla lomnikelo wokunathwayo we Nkosi, uNkulunkulu wenu.

¹⁵Vuthelani uphondo eZiyoni, lizile ukudla, lenze umhlangano onzulu;

¹⁶buthanisani abantu, libize ibandla, lihlanganise abadala labantwana lensane ezimunyayo. Umyeni kaphume endlini yakhe, lomakoti exhibeni lakhe.

¹⁷Abapristi, izikhonzi ze Nkosi, kabakhale inyembezi phakathi komkoto lelathi, bathi: Bahawukele abantu bakho, Nkosi. ungabenzi babe yinhlamba, lesiga phakathi kwezizwe. Bazatsholoni phakathi kwezizwe ukuthi: Ungaphi uNkulunkulu wabo?

¹⁸I Nkosi yaliphisekela ilizwe layo, yaba lesihawu ebantwini bayo.

¹⁹I Nkosi yabaphendula abantu bayo yathi: Khangelani, sengizalinika amabele lewayini elitsha lamafutha, lisuthe; kangisayikuphinda ngilenze inhlamba phakathi kwezizwe.

²⁰Ngizasusela khatshana lani ibutho elivela enyakatho, ngilixotshele elizweni elomileyo leliyinkangala, uphondo lwalo ngiluxotshele elwandle lwempumalanga, lomsila walo elwandle lwentshonalanga; kwenyuke ivumba lalo kwenyuke umnuko walo, ngoba lenzile izinto ezinkulu.

²¹Ungesabi, lizwe, kodwa jabula uthokoze, ngoba i Nkosi yenzile izinto ezinkulu.

²²Lingesabi, zinyamazana zeganga, ngoba amadlelo enkangala asehlumile; izihlahla zithela izithelo zazo, umkhiwa levini kuthelile kakhulu.

²³Thabani, lina beZiyoni, lithokoze nge Nkosi, uNkulunkulu wenu; ngoba ilinikile izulu lensewula ukuze ilibusise, yalinisela izulu elinengi, lensewula lelamuva njengakuqala.

²⁴Amabala okubhulela azagcwala amabele, lezikhamelo zewayini ziphuphume ngewayini elitsha lamafutha.

²⁵Ngizabuyisela kini okwadliwa eminyakeni yesikhonyane leqhwagi lenswabanda lentothoviyane, ibutho lami elikhulu engalithumela kini.

²⁶Lizakudla okunengi, lisuthe, lidumise ibizo le Nkosi, uNkulunkulu wenu, oliphethe ngokumangalisayo. Abantu bami kabasayikuphinda bayangiswe futhi

²⁷Lizakwazi ukuthi ngikhona phakathi kukaIsrayeli, lokuthi mina Nkosi nginguNkulunkulu wenu, kakho omunye. Abantu bami kabasayikuphinda bayangiswe futhi.

²⁸Kuzakuthi emva kwalokho ngithele umoya wami phezu kwayo yonke inyama; amadodana enu lamadodakazi enu azaprofetha, labadala benu baphuphe amaphupho, lamajaha enu abone imibono.

²⁹Laphezu kwenceku lencekukazi ngizathela umoya wami ngalezonsuku.

³⁰Ngizaveza izimangaliso emazulwini lemhlabeni, igazi, lomlilo, lentuthu ethunqayo.

³¹Ilanga lizaphenduka umnyama, lenyanga ibe ligazi, lungakafiki usuku lwe Nkosi olukhulu lolwesabekayo.

³²Kuzakuthi bonke abakhuleka ebizweni le Nkosi bakhululwe; ngoba entabeni yeZiyoni kuzakuba khona labo abaphunyukileyo, njengokutsho kwe Nkosi, leJerusalema kube khona abaseleyo ababizwe yi Nkosi.