Read Ndebele-IBhayibhili Elingcwele 2006 Ujuweli 3 Bible Online

Ujuweli 3 - Ndebele-IBhayibhili Elingcwele 2006 bible

Ujuweli 3

¹Ngoba khangela, ngalezonsuku langalesosikhathi lapho ngibuyisa impumelelo yamaJuda labeJerusalema,

²ngizabutha zonke izizwe, ngizilethe esihotsheni sikaJehoshafathi, ngizigwebe khona ngenxa yabantu bami lesizwe sami uIsrayeli, ngoba zabachithachitha phakathi kwezizwe, zabelana ilizwe lami,

³zenza inkatho yokuphosa ngabantu bami, zenanisa abafana ngamawule, zathengisa amankazana ngewayini, zalinatha.

⁴Liyini kimi, lina Tire leSidoni, lani lonke zabelo zeFilisti? Liyangiphindisela ngolutho yini? Uba lingiphindisela ngolutho, ngizaphangisa ukulibuyisela ngezenzo zenu.

⁵Ngoba lithethe isiliva sami legolide lami, lathwalela inotho yami eligugu emathempelini enu.

⁶Lathengisa abantu bakoJuda labeJerusalema kumaGriki, labasusela khatshana lelizwe labo.

⁷Khangela, ngizabavusa endaweni elabathengisa kiyo, ngilibuyisele ngezenzo zenu.

⁸Ngizathengisa amadodana lamadodakazi enu ebantwini bakoJuda, bona bazabathengisa ebantwini beShebha esizweni esikhatshana; ngoba i Nkosi ikhulumile.

⁹Memezelani lokhu phakathi kwezizwe lithi: Lungiselani impi, livuse amaqhawe. Kawasondele wonke amadoda empi, azilungisele impi.

¹⁰Khandani amakhuba enu abe yizinkemba, lengqamu zenu zokuthena izihlahla zibe yimikhonto, lobuthakathaka athi: Ngiliqhawe

¹¹Phangisani lize, lina zizwe zonke elizingelezeleyo, libuthane esihotsheni sikaJehoshafathi. Thuma amaqhawe akho, Nkosi.

¹²Kazizivuse izizwe, zizwe esihotsheni sikaJehoshafathi; ngoba kulapho engizahlala khona ukugweba zonke izizwe ezizingelezeleyo.

¹³Fakani isikela, ngoba okuvunwayo sekuvuthiwe. Ngenani linyathele izithelo zevini, ngoba isikhamelo sewayini sesigcwele, lamafatshi asephuphuma, sebubukhulu kangaka ububi bezizwe.

¹⁴Amaxuku ngamaxuku akhona esihotsheni sokugweba. Ngoba usuku lwe Nkosi selusondele esihotsheni sokugweba.

¹⁵Ilanga lenyanga kuzaphenduka kube mnyama, lezinkanyezi kucitshe ukukhanya kwazo.

¹⁶I Nkosi iyavungama iseZiyoni, izwakalisa ilizwi layo iseJerusalema, kunyikinyeke amazulu lomhlaba. Kodwa i Nkosi iyisiphephelo sabantu bayo, lenqaba yabantwana bakoIsrayeli.

¹⁷Ngalokho-ke lizakwazi ukuthi ngiyi Nkosi, uNkulunkulu wenu ohlala eZiyoni, intaba yami engcwele. IJerusalema izakuba ngcwele, abezizwe kabasayikuphinda badlule phakathi kwayo futhi.

¹⁸Kuzakuthi ngalolosuku intaba zigobhoze iwayini elitsha, lamaqaqa ageleze uchago, layo yonke imifula yakoJuda igeleze amanzi, kuzabhoboka umthombo endlini ye Nkosi, uthelele isihotsha seShithimi.

¹⁹IGibhithe lizakuba yinkangala, leEdoma libe yinkangala engelalutho, ngenxa yesihluku esenziwa kwabakoJuda, langenxa yegazi elingelacala abalichitha elizweni labo.

²⁰Kodwa koJuda kuzakwakhiwa kuze kube nininini, leJerusalema kuze kube sezizukulwaneni zonke.

²¹Ngizaphindisela igazi labo, kangiyikumyekela olecala, ngoba i Nkosi ihlala eZiyoni.