Read Ndebele-IBhayibhili Elingcwele 2006 U-Obadiya 1 Bible Online

U-Obadiya 1 - Ndebele-IBhayibhili Elingcwele 2006 bible

U-Obadiya 1

¹Lo ngumbono kaObadiya. INkosi uJehova ithi ngoEdoma: Sizwile imibiko evela e Nkosi ni, kuthunywe isithunywa phakathi kwezizwe ukuze sithi: Vukani, simvukele silwe laye!

²Khangela, ngizakwenza ube mncinyane phakathi kwezizwe, udeleleke kakhulu.

³Ukuziqhenya kwenhliziyo yakho kukukhohlisile, wena ohlala ezimbalwini zamawa, olendawo ephakemeyo yokuhlala, othi enhliziyweni yakho: Ngubani ozangehlisela phansi?

⁴Loba uqonga njengokhozi, loba isidleke sakho sakhiwe phakathi kwezinkanyezi, ngizakwethula khona, kutsho i Nkosi.

⁵Uba amasela efika kuwe labaphangi ebusuku, kungakanani ukulahlekelwa kwakho, bebengayikuthatha yini lokho abakufunayo? Uba abavuna izithelo zevini befika kuwe, bebengayikutshiya ingcosana yini?

⁶Yeka ukuphangwa kukaEsawu! Yeka ukudingisiswa kwamagugu akhe!

⁷Bonke abangane bakho besivumelwano bakukhohlisile, bakuxotshela emngceleni; ababehlalisene lawe ngokuthula bakwehlule, labangane bakho abathembekileyo bakuthiyile; kakho okuqedisisayo lokhu.

⁸I Nkosi ithi: Ngalolosuku ngizachitha abahlakaniphileyo eEdoma, ngiqede lokuhlakanipha entabeni yakoEsawu.

⁹Amaqhawe akho, Themani, azatshaywa luvalo, ukuze lowo lalowo abulawe entabeni kaEsawu.

¹⁰Ngenxa yesihluku esenziwa kumfowenu uJakobe uzabanjwa zinhloni, uchithwe uphele du.

¹¹Ngosuku owema ngalo khatshana, ngosuku abezizweni abathumba ngalo impahla yakhe, bangena emasangweni akhe, benza inkatho yokuphosa ngeJerusalema lawe wawunjengomunye wabo.

¹²Kodwa wawungafanelanga intokozo ngomfowenu esukwini lokuhlupheka kwakhe; wawungafanelanga intokozo ngabantu bakoJuda esukwini lokuchitheka kwabo; wawungafanelanga ukukloloda esukwini losizi lwakhe.

¹³Ngabe kawungenanga ngesango labantu bami esukwini lokuhlupheka kwabo; ngabe kawuthokozanga ngezinhlupheko zabo esukwini lokuhlupheka kwabo; ngabe kawuphanganga impahla yabo esukwini lokuhlupheka kwabo.

¹⁴Wawungafanelanga ukuma emehlukanweni endlela ukumvimbela ekubalekeni kwakhe; wawungafanelanga ukunikela abaphunyukileyo bakhe esukwini losizi lwakhe.

¹⁵Ngoba usuku lwe Nkosi lusondele ezizweni zonke. Njengokwenza kwakho kuzakwenziwa njalo lakuwe, Edoma, izenzo zakho zizakwehliselwa ekhanda lakho.

¹⁶Njengoba lina linathile inkezo yolaka entabeni yami engcwele, zonke izizwe ezikhona inhlangothi zonke zizanatha kuyo kakhulu zinyamalale.

¹⁷Kodwa entabeni yeZiyoni kuzakuba khona abaphunyukileyo, izakuba ngcwele; lendlu kaJakobe izakudla ilifa layo.

¹⁸Indlu kaJakobe izakuba ngumlilo, lendlu kaJosefa ibe lilangabi, indlu kaEsawu ibe ngamabibi; bazawatshisa bawaqede; kakuyikuba khona oseleyo endlini kaEsawu; ngoba i Nkosi isikhulumile.

¹⁹Abeningizimu bazathumba intaba kaEsawu, abeShefela bathumbe ilizwe lamaFilisti, kanye lelizwe lakoEfrayimi lelizwe iSamariya, loBhenjamini athumbe iGileyadi.

²⁰Abathunjiweyo bebutho lakoIsrayeli bazabuya bathumbe ilizwe lamaKhanani, kuze kufike eZarefathi; labathunjiweyo beJerusalema abaSerafadi bazabuya bathumbe imizi yeningizimu.

²¹Abasilileyo bakhwele entabeni yeZiyoni ukubusa intaba kaEsawu; i Nkosi yiyo ezabusa.