Read Ndebele-IBhayibhili Elingcwele 2006 Unumeri 10 Bible Online

Unumeri 10 - Ndebele-IBhayibhili Elingcwele 2006 bible

Unumeri 10

¹I Nkosi yasikhuluma kuMozisi isithi:

²Zenzele impondo ezimbili zesiliva, uzenze zibe ngumsebenzi okhandiweyo; njalo zizakuba ngezakho ekubizeni inhlangano lekusukeni kwezinkamba.

³Uba bezivuthela inhlangano yonke izabuthana kuwe emnyango wethente lenhlangano.

⁴Kodwa uba bevuthela olulodwa, iziphathamandla, inhloko zezinkulungwane zakoIsrayeli zizabuthana kuwe.

⁵Lapho lihlaba umkhosi, izinkamba ezimise ngempumalanga zizasuka.

⁶Lalapho lihlaba umkhosi ngokwesibili, izinkamba ezimise ngeningizimu zizasuka. Bazahlaba umkhosi ukuze zisuke.

⁷Kodwa ekubuthaniseni ibandla lizavuthela impondo, kodwa lingahlabi umkhosi.

⁸Njalo amadodana kaAroni, abapristi, azavuthela izimpondo. Zizakuba kini yisimiso esilaphakade ezizukulwaneni zenu.

⁹Njalo lapho liphuma impi elizweni lakini ukuyakulwa lesitha esilicindezelayo, lihlabe umkhosi ngezimpondo, njalo likhunjulwe phambi kwe Nkosi uNkulunkulu wenu, lisindiswe ezitheni zenu.

¹⁰Langosuku lwentokozo yenu, lemikhosini yenu emisiweyo, lekuthwaseni kwenyanga zenu, lizavuthela izimpondo phezu kweminikelo yenu yokutshiswa laphezu kwemihlatshelo yeminikelo yenu yokuthula, ukuze ibe kini yisikhumbuzo phambi kukaNkulunkulu wenu. Ngiyi Nkosi uNkulunkulu wenu.

¹¹Kwasekusithi ngomnyaka wesibili, ngenyanga yesibili, ngolwamatshumi amabili lwenyanga, iyezi laphakanyiswa lisuka phezu kwethabhanekele lobufakazi.

¹²Abantwana bakoIsrayeli basebesuka enkangala yeSinayi ngokwenhambo zabo; leyezi lema enkangala yeParani.

¹³Basebesuka okokuqala ngokomlayo we Nkosi ngesandla sikaMozisi.

¹⁴Kwasekusuka uphawu lwenkamba yabantwana bakoJuda kuqala ngamabutho abo; laphezu kwebutho lakhe kwakunguNashoni indodana kaAminadaba.

¹⁵Laphezu kwebutho lesizwe sabantwana bakoIsakari kwakunguNethaneli indodana kaZuwari.

¹⁶Laphezu kwebutho lesizwe sabantwana bakoZebuluni kwakunguEliyabi indodana kaHeloni.

¹⁷Ithabhanekele laselidilizwa; amadodana kaGerishoni lamadodana kaMerari asesuka, ethwele ithabhanekele.

¹⁸Kwasekusuka uphawu lwenkamba yakoRubeni ngamabutho abo; laphezu kwebutho lakhe kwakunguElizuri indodana kaShedewuri.

¹⁹Laphezu kwebutho lesizwe sabantwana bakoSimeyoni kwakunguShelumiyeli indodana kaZurishadayi.

²⁰Laphezu kwebutho lesizwe sabantwana bakoGadi kwakunguEliyasafi indodana kaDehuweli.

²¹Kwasekusuka amaKohathi ethwele indlu engcwele, l abanye bamisa ithabhanekele, engakafiki.

²²Kwasekusuka uphawu lwenkamba yabantwana bakoEfrayimi ngamabutho abo; laphezu kwebutho lakhe kwakunguElishama indodana kaAmihudi.

²³Laphezu kwebutho lesizwe sabantwana bakoManase kwakunguGamaliyeli indodana kaPedazuri.

²⁴Laphezu kwebutho lesizwe sabantwana bakoBhenjamini kwakunguAbidani indodana kaGideyoni.

²⁵Kwasekusuka uphawu lwenkamba yabantwana bakoDani ngamabutho abo; babengabokucina ezinkambeni zonke; laphezu kwebutho lakhe kwakunguAhiyezeri indodana kaAmishadayi.

²⁶Laphezu kwebutho lesizwe sabantwana bakoAsheri kwakunguPagiyeli indodana kaOkirani.

²⁷Laphezu kwebutho lesizwe sabantwana bakoNafithali kwakunguAhira indodana kaEnani.

²⁸Lokhu yikusuka kwabantwana bakoIsrayeli ngamabutho abo, ekusukeni kwabo.

²⁹UMozisi wasesithi kuHobabi indodana kaRehuweli umMidiyani, uyisezala kaMozisi: Thina siyasuka siya endaweni i Nkosi eyathi ngayo: Ngizalipha yona. Hamba lathi; sizakwenzela okuhle, ngoba i Nkosi ikhulume okuhle ngoIsrayeli.

³⁰Wasesithi kuye: Kangiyikuhamba, kodwa-ke ngizakuya elizweni lakithi lezihlotsheni zami.

³¹Wasesithi: Ake ungasitshiyi, ngoba uyazi lapho esingamisa khona inkamba enkangala, uzakuba ngamehlo ethu.

³²Kuzakuthi-ke, uba uhamba lathi, yebo, kuzakwenzeka lokho okuhle okungakho i Nkosi ezasenzela okuhle, sizakwenzela okuhle.

³³Basuka-ke entabeni ye Nkosi, uhambo lwensuku ezintathu; lomtshokotsho wesivumelwano se Nkosi wahamba phambi kwabo uhambo lwensuku ezintathu, ukuze ubadingele indawo yokuphumula.

³⁴Leyezi le Nkosi laliphezu kwabo emini, ekusukeni kwabo enkambeni.

³⁵Kwasekusithi ekusukeni komtshokotsho, uMozisi wathi: Vuka, Nkosi, kazichitheke-ke izitha zakho, lalabo abakuzondayo kababaleke phambi kwakho.

³⁶Ekumisweni kwawo wathi: Buyela, Nkosi, kuzinkulungwane ezilitshumi zezinkulungwane zakoIsrayeli.