Read Ndebele-IBhayibhili Elingcwele 2006 Unumeri 11 Bible Online

Unumeri 11 - Ndebele-IBhayibhili Elingcwele 2006 bible

Unumeri 11

¹Kwasekusithi abantu besola kwakukubi endlebeni ze Nkosi. Kwathi i Nkosi isikuzwile, ulaka lwayo lwavutha, lomlilo we Nkosi wavutha phakathi kwabo, waqothula emngceleni wenkamba.

²Abantu basebekhala kuMozisi; uMozisi wasekhuleka e Nkosi ni, lomlilo wadeda.

³Ngakho wabiza ibizo laleyondawo iTabera, ngoba umlilo we Nkosi wavutha phakathi kwabo.

⁴Ududu lwabantu olwaluphakathi kwabo lwaloyisa isiloyiso; ngakho labantwana bakoIsrayeli baphinde bakhala inyembezi, bathi: Ngubani ozasipha inyama ukuthi sidle?

⁵Siyazikhumbula inhlanzi esasizidla ngesihle eGibhithe, amakhomane, lamakhabe, lamaliki, lesandindima, legalikhi.

⁶Kodwa khathesi umphefumulo wethu womile, kakulalutho ngitsho, ngaphandle kwale imana phambi kwamehlo ethu.

⁷Njalo imana yayinjengenhlanyelo yekoriyanderi*, lokukhangeleka kwayo kwakunjengokukhangeleka kwebedola*.

⁸Abantu bahambahamba bayibutha bayichola ematsheni okuchola, loba bayigiga engigeni, bayipheka ezimbizeni, benza amaqebelengwana ngayo; lokunambitheka kwayo kwakunjengokunambitheka komhluzi wamafutha.

⁹Lapho amazolo esehlela phezu kwenkamba ebusuku, imana yehla phezu kwawo.

¹⁰Njalo uMozisi wezwa abantu bekhala inyembezi ngokwensapho zabo, ngulowo lalowo emnyango wethente lakhe. Lolaka lwe Nkosi lwavutha kakhulu; futhi kwaba kubi emehlweni kaMozisi.

¹¹UMozisi wasesithi e Nkosi ni: Wenzeleni okubi encekwini yakho? Njalo kungani ngingatholanga umusa emehlweni akho ukuthi ubeke umthwalo walababantu bonke phezu kwami?

¹²Mina ngakhulelwa yibo bonke lababantu yini? Kumbe mina ngabazala yini, ukuze uthi kimi: Basingathe esifubeni sakho, njengomlizane owesilisa esingatha umntwana omunyayo, kuze kube selizweni owalifungela oyise?

¹³Ngingayithatha ngaphi inyama ukuthi ngibaphe bonke lababantu? Ngoba bayakhala inyembezi kimi besithi: Siphe inyama ukuze sidle.

¹⁴Mina kangilamandla okuthwala bonke lababantu ngedwa, ngoba kunzima kakhulu kimi.

¹⁵Uba-ke usenza njalo kimi, ake ungibulale lokungibulala, uba ngithole umusa emehlweni akho, njalo kangingaboni usizi lwami.

¹⁶I Nkosi yasisithi kuMozisi: Buthela kimi amadoda angamatshumi ayisikhombisa abadala bakoIsrayeli, owaziyo ngawo ukuthi angabadala babantu lenduna zabo, uwalethe ethenteni lenhlangano ukuze eme khona lawe.

¹⁷Njalo ngizakwehla, ngikhulume lawe khona; ngizagodla okomoya ophezu kwakho ngikufake phezu kwabo; njalo bazathwala kanye lawe umthwalo wabantu, ukuze ungawuthwali wedwa.

¹⁸Tshono-ke ebantwini uthi: Zingcweliseleleni ikusasa, lizakudla inyama; ngoba likhalile inyembezi endlebeni ze Nkosi lisithi: Ngubani ozasipha inyama ukuze sidle? Ngoba kwakukuhle kithi eGibhithe. Ngakho i Nkosi izalipha inyama njalo lidle.

¹⁹Kaliyikudla usuku olulodwa, loba insuku ezimbili, loba insuku ezinhlanu, loba insuku ezilitshumi, kumbe insuku ezingamatshumi amabili,

²⁰kuze kube yinyanga yonke, ize iphume emakhaleni enu, ilitshiphele, ngenxa yokuthi liyalile i Nkosi ephakathi kwenu, lakhala inyembezi phambi kwayo lisithi: Kanti saphumelani eGibhithe?

²¹Kodwa uMozisi wathi: Abantu abahamba ngenyawo engiphakathi kwabo bazinkulungwane ezingamakhulu ayisithupha; wena-ke uthe: Ngizabanika inyama ukuze badle inyanga yonke.

²²Bazahlatshelwa izimvu lezinkomo yini ukuze zibanele? Loba bazabuthelwa yini inhlanzi zonke zolwandle ukuze zibanele?

²³I Nkosi yasisithi kuMozisi: Isandla se Nkosi sifinyeziwe yini? Khathesi uzabona ukuthi ilizwi lami lizakwenzeka kuwe kumbe hatshi.

²⁴UMozisi wasephuma, wabatshela abantu amazwi e Nkosi; wabutha amadoda angamatshumi ayisikhombisa ebadaleni babantu, wawamisa ehanqe ithente.

²⁵I Nkosi yasisehla ngeyezi, yakhuluma kuye, yagodla okomoya ophezu kwakhe, yakubeka phezu kwamadoda angamatshumi ayisikhombisa, abadala. Kwasekusithi lapho uMoya ehlala phezu kwabo, baprofetha, kodwa kabakuphindanga.

²⁶Njalo kwakusele amadoda amabili enkambeni, ibizo lenye lalinguElidadi lebizo lenye linguMedadi; loMoya wahlala phezu kwawo. Njalo ayephakathi kwalabo ababhaliweyo, kodwa kawaphumanga ukuya ethenteni, njalo aprofetha enkambeni.

²⁷Kwagijima ijaha labika kuMozisi lathi: UElidadi loMedadi bayaprofetha enkambeni.

²⁸UJoshuwa indodana kaNuni, inceku kaMozisi, omunye wabatsha bakhe, wasephendula wathi: Nkosi yami, Mozisi, benqabele.

²⁹Kodwa uMozisi wathi kuye: Ulobukhwele ngenxa yami yini? Kungathi bonke abantu be Nkosi bangaba ngabaprofethi, ukuze i Nkosi ifake uMoya wayo phezu kwabo !

³⁰UMozisi wasezibuthela enkambeni, yena labadala bakoIsrayeli.

³¹Kwasekusuka umoya ovela e Nkosi ni, waletha izagwaca zivela elwandle, wazehlisela phezu kwenkamba, phose uhambo losuku ngapha, njalo phose uhambo losuku ngapha, zizingelezele inkamba, njalo okungaba zingalo ezimbili phezu komhlabathi.

³²Abantu basebesukuma lolosuku lonke, lobusuku bonke, losuku lonke olulandelayo, bebutha izagwaca. Lowo owayelezinlutshwana wayebuthe amahomeri* alitshumi; bazichayela zona inhlangothi zonke zenkamba.

³³Inyama isesephakathi kwamazinyo abo ingakahlafunwa, intukuthelo ye Nkosi yabavuthela abantu, njalo i Nkosi yabatshaya abantu ngenhlupheko enkulu kakhulu.

³⁴Ngakho ibizo laleyondawo lathiwa yiKibirothi-Hathava, ngoba lapho bangcwaba abantu abakhanukayo.

³⁵Abantu basuka eKibirothi-Hathava baya eHazerothi; bahlala eHazerothi.