Read Ndebele-IBhayibhili Elingcwele 2006 Unumeri 13 Bible Online

Unumeri 13 - Ndebele-IBhayibhili Elingcwele 2006 bible

Unumeri 13

¹I Nkosi yasikhuluma kuMozisi isithi:

²Zithumele amadoda ukuthi ahlole ilizwe leKhanani engibapha lona abantwana bakoIsrayeli; uthume indoda eyodwa yaleso lalesosizwe saboyise, yonke eyinduna phakathi kwabo.

³UMozisi wawathuma-ke esuka enkangala yeParani, ngokomlayo we Nkosi; wonke lawomadoda ayezinhloko zabantwana bakoIsrayeli.

⁴Lala ngamabizo awo; owesizwe sakoRubeni, uShamuwa indodana kaZakuri.

⁵Owesizwe sakoSimeyoni, uShafati indodana kaHori.

⁶Owesizwe sakoJuda, uKalebi indodana kaJefune.

⁷Owesizwe sakoIsakari, uIgali indodana kaJosefa.

⁸Owesizwe sakoEfrayimi, uHoseya indodana kaNuni.

⁹Owesizwe sakoBhenjamini, uPaliti indodana kaRafu.

¹⁰Owesizwe sakoZebuluni, uGadiyeli indodana kaSodi.

¹¹Owesizwe sakoJosefa, owesizwe sakoManase, uGadi indodana kaSusi.

¹²Owesizwe sakoDani, uAmiyeli indodana kaGemali.

¹³Owesizwe sakoAsheri, uSethuri indodana kaMikayeli.

¹⁴Owesizwe sakoNafithali, uNabi indodana kaVofisi.

¹⁵Owesizwe sakoGadi, uGewuweli indodana kaMaki.

¹⁶La ngamabizo amadoda uMozisi awathumayo ukuhlola ilizwe. UMozisi wasembiza uHoseya indodana kaNuni ngokuthi nguJoshuwa.

¹⁷UMozisi wasewathuma ukuhlola ilizwe leKhanani, wathi kuwo: Yenyukani lapha liye eningizimu, lenyukele entabeni,

¹⁸libone ilizwe ukuthi linjani, labantu abakhileyo kulo ukuthi balamandla kumbe babuthakathaka, balutshwana kumbe banengi yini,

¹⁹lokuthi linjani ilizwe abahlala kulo, loba lihle loba libi, lokuthi injani imizi abahlala kiyo, loba izinkamba loba izinqaba,

²⁰lokuthi ilizwe linjani, loba livundile loba lilugwadule, lokuthi lilezihlahla loba hayi. Manini isibindi, lithathe okwesithelo selizwe. Lalesisikhathi kwakuyisikhathi sezithelo zokuqala zevini.

²¹Basebesenyuka, balihlola ilizwe kusukela enkangala yeZini kuze kube seRehobi, ekungeneni eHamathi.

²²Benyuka-ke ngeningizimu bafika eHebroni, lapho kwakulaboAhimani, uSheshayi, loTalimayi, abantwana bakaAnaki. IHebroni lakhiwa-ke iminyaka eyisikhombisa kungakabi leZowani eGibhithe.

²³Basebefika esihotsheni seEshikoli; baquma khona ugatsha olulehlukuzo elilodwa lezithelo zevini, baluthwalisana ngesigodo ngababili, lokwamapomegranati* lokwemikhiwa.

²⁴Leyondawo kwathiwa yisihotsha seEshikoli, ngenxa yehlukuzo abantwana bakoIsrayeli abaliqumayo lapho.

²⁵Basebebuya bevela ekuhloleni ilizwe ekupheleni kwensuku ezingamatshumi amane.

²⁶Basebehamba bafika kuMozisi lakuAroni lakunhlangano yonke yabantwana bakoIsrayeli enkangala yeParani, eKadeshi; basebebuyisela umbiko kubo lakunhlangano yonke, basebebatshengisa isithelo selizwe.

²⁷Basebembikela bathi: Safika elizweni owasithuma kulo; njalo ngeqiniso, ligeleza uchago loluju; lalesi yisithelo salo.

²⁸Kodwa-ke abantu abahlala elizweni balamandla, lemizi ibiyelwe ngemithangala, mikhulu kakhulu; njalo-ke sibone khona inzalo kaAnaki.

²⁹AmaAmaleki akhile elizweni leningizimu; lamaHethi lamaJebusi lamaAmori akhile entabeni; lamaKhanani akhile elwandle leceleni kweJordani.

³⁰UKalebi wasethulisa abantu phambi kukaMozisi, wathi: Asenyukeni lokwenyuka, sidle ilifa lalo, ngoba silamandla okulinqoba.

³¹Kodwa amadoda ayenyuke laye athi: Kasilamandla okwenyukela kulabobantu, ngoba balamandla kulathi.

³²Basebeveza umbiko omubi ngelizwe ababelihlolile ebantwaneni bakoIsrayeli besithi: Ilizwe esidabule kulo ukulihlola yilizwe elidla abantu abahlala kulo; labantu bonke esababona phakathi kwalo bangamadoda amade kakhulu.

³³Lalapho sibone iziqhwaga, amadodana kaAnaki, avela eziqhwageni. Lemehlweni ethu sasinjengentethe, sasinjalo lemehlweni azo.