Read Ndebele-IBhayibhili Elingcwele 2006 Unumeri 16 Bible Online

Unumeri 16 - Ndebele-IBhayibhili Elingcwele 2006 bible

Unumeri 16

¹UKora indodana kaIzihari indodana kaKohathi indodana kaLevi, loDathani loAbiramu amadodana kaEliyabi, loOni indodana kaPelethi, amadodana kaRubeni, basebethatha amadoda.

²Basukuma phambi kukaMozisi, lamadoda abantwana bakoIsrayeli, abangamakhulu amabili lamatshumi amahlanu, abangabakhokheli benhlangano, abakhethiweyo bomhlangano, amadoda alebizo.

³Bahlangana bamelana loMozisi bamelana loAroni, bathi kubo: Seledlulise amalawulo! Ngoba inhlangano yonke, bonke bangcwele, le Nkosi iphakathi kwabo. Pho, liziphakamiselani phezu kwebandla le Nkosi?

⁴Kwathi uMozisi esekuzwile, wathi mbo ngobuso bakhe phansi.

⁵Wasekhuluma kuKora lakuqembu lakhe lonke esithi: Kusisa, khona i Nkosi izatshengisa ukuthi ngubani ongowayo lokuthi ngubani ongcwele, izamsondeza kuyo, lalowo emkhethileyo izamsondeza kuyo.

⁶Yenzani lokhu: zithatheleni imiganu yokutshisela impepha, uKora, leqembu lakhe lonke,

⁷lifake kiyo umlilo, libeke kiyo impepha phambi kwe Nkosi kusasa. Kuzakuthi indoda i Nkosi eyikhethayo, yiyo engcwele. Seledlulise amalawulo, madodana kaLevi!

⁸UMozisi wasesithi kuKora: Ake lizwe, madodana kaLevi;

⁹kuyinto encinyane kini yini ukuthi uNkulunkulu kaIsrayeli ulehlukanisile lenhlangano yakoIsrayeli ukuze alisondeze kuye ukuthi lenze inkonzo yethabhanekele le Nkosi, lokuthi lime phambi kwenhlangano ukubakhonza?

¹⁰Ukusondezile, labafowenu bonke, amadodana kaLevi, kanye lawe; selifuna lobupristi yini?

¹¹Ngalokho wena leqembu lakho lonke selihlangene ukumelana le Nkosi. Ngoba uAroni uyini ukuthi limngungunele?

¹²UMozisi wasethuma ukubiza uDathani loAbiramu, amadodana kaEliyabi. Kodwa bathi: Kasiyikwenyuka;

¹³kuyinto encinyane yini ukuthi wasenyusa sivela elizweni eligeleza uchago loluju ukusibulala enkangala, kanti lawe usuzenza umbusi phezu kwethu?

¹⁴Futhi kawusingenisanga elizweni eligeleza uchago loluju, loba ukusinika ilifa lamasimu lezivini. Amehlo ala amadoda ungawakopola yini? Asiyikwenyuka.

¹⁵UMozisi wasethukuthela kakhulu, wathi e Nkosi ni: Unganaki umnikelo wabo. Kangithathanga ubabhemi oyedwa wabo, futhi kangenzanga okubi komunye wabo.

¹⁶UMozisi wasesithi kuKora: Wena leqembu lakho lonke banini phambi kwe Nkosi, wena, labo, loAroni, kusasa;

¹⁷Thathani, omunye lomunye umganu wakhe wokutshisela impepha, lifake kuyo impepha, liyisondeze phambi kwe Nkosi, kube ngulowo lalowo umganu wakhe wokutshisela impepha, imiganu yokutshisela impepha engamakhulu amabili lamatshumi amahlanu; lawe loAroni, ngulowo lalowo umganu wakhe wokutshisela impepha.

¹⁸Basebethatha, ngulowo lalowo umganu wakhe wokutshisela impepha, bafaka umlilo kuyo, babeka impepha kuyo, bema emnyango wethente lenhlangano, loMozisi loAroni.

¹⁹UKora wasebuthanisa inhlangano yonke ukumelana labo emnyango wethente lenhlangano. Inkazimulo ye Nkosi yasibonakala ebandleni lonke.

²⁰I Nkosi yasikhuluma kuMozisi lakuAroni isithi:

²¹Zehlukaniseni liphume phakathi kwalinhlangano ukuze ngibaqede ngokucwayiza kwelihlo.

²²Basebesithi mbo ngobuso babo phansi bathi: Nkulunkulu, Nkulunkulu wemimoya yayo yonke inyama, kona umuntu oyedwa, ubusuthukuthelela inhlangano yonke yini?

²³I Nkosi yasikhuluma kuMozisi isithi:

²⁴Tshono enhlanganweni uthi: Yenyukani lisuke kunhlangothi zonke zomuzi kaKora, uDathani, loAbiramu.

²⁵UMozisi wasesukuma, waya kuDathani loAbiramu, labadala bakoIsrayeli bamlandela.

²⁶Wasekhuluma enhlanganweni esithi: Ake lisuke emathenteni alamadoda amabi, lingathinti lutho olungolwabo, hlezi liphetshulwe ezonweni zabo zonke.

²⁷Basebesenyuka besuka emzini yaboKora, uDathani loAbiramu enhlangothini zonke; oDathani loAbiramu basebephuma, bema emnyango wamathente abo labomkabo lamadodana abo labantwanyana babo.

²⁸UMozisi wasesithi: Ngalokhu lizakwazi ukuthi i Nkosi ingithumile ukwenza yonke limisebenzi, lokuthi kakusikho okwengqondo yami.

²⁹Uba laba besifa njengokufa kwabantu bonke, kumbe behlelwe njengokwehlelwa kwabantu bonke, i Nkosi kayingithumanga.

³⁰Kodwa uba i Nkosi idala into entsha, ukuthi umhlaba uvule umlomo wawo, ubaginye lakho konke okwabo, behlele esihogweni bephila, lizaqedisisa ukuthi lamadoda ayidelele i Nkosi.

³¹Kwasekusithi eseqedile ukukhuluma wonke lamazwi, umhlaba owawungaphansi kwabo waqhekezeka,

³²lomhlaba wavula umlomo wawo, wabaginya lezindlu zabo, labo bonke abantu ababengabakaKora, lempahla yabo yonke.

³³Basebetshona esihogweni bephila bona lakho konke okwabo; umhlaba wabagqibela, babhubha besuka phakathi kwebandla.

³⁴UIsrayeli wonke owayebazingelezele wasebaleka ekukhaleni kwabo, ngoba bathi: Hlezi umhlaba usiginye.

³⁵Kwasekuphuma umlilo e Nkosi ni, waqothula amadoda angamakhulu amabili lamatshumi amahlanu ayenikele impepha.

³⁶I Nkosi yasikhuluma kuMozisi isithi:

³⁷Tshono kuEleyazare, indodana kaAroni umpristi, ukuthi athathe imiganu yokutshisela impepha phakathi kokutsha; uwuchithachithele umlilo laphayana, ngoba ingcwele.

³⁸Imiganu yokutshisela impepha yalezizoni imelene lemiphefumulo yazo, kabayenze ibe yizicecedu ezibanzi zibe yisisibekelo selathi; ngoba bayinikele phambi kwe Nkosi, ngakho ingcwele; njalo izakuba yisibonakaliso ebantwaneni bakoIsrayeli.

³⁹UEleyazare umpristi wasethatha imiganu yethusi yokutshisela impepha ababenikele ngayo abatshisiweyo, basebeyikhanda yaba yizicecedu zokusibekela ilathi,

⁴⁰kube yisikhumbuzo ebantwaneni bakoIsrayeli ukuze kungabi lowemzini, ongesuye owenzalo kaAroni, osondela ukutshisa impepha phambi kwe Nkosi, ukuze angabi njengoKora lanjengexuku lakhe, njengoba i Nkosi yakhuluma kuye ngesandla sikaMozisi.

⁴¹Kodwa kusisa inhlangano yonke yabantwana bakoIsrayeli yabasola oMozisi loAroni, isithi: Lina libabulele abantu be Nkosi.

⁴²Kwasekusithi inhlangano isihlangene imelene loMozisi njalo imelene loAroni, bakhangela ethenteni lenhlangano, khangela-ke iyezi lalilisibekele lenkazimulo ye Nkosi yabonakala.

⁴³UMozisi loAroni basebesiza ngaphambi kwethente lenhlangano.

⁴⁴I Nkosi yasikhuluma kuMozisi isithi:

⁴⁵Yenyukani lisuke phakathi kwalinhlangano, ukuze ngibaqede njengokucwayiza kwelihlo. Basebesithi mbo ngobuso babo phansi.

⁴⁶UMozisi wasesithi kuAroni: Thatha umganu wokutshisela impepha, ufake kuwo umlilo ovela elathini, ubeke kuwo impepha, uye ngokuphangisa enhlanganweni, ubenzele inhlawulo yokuthula; ngoba ulaka seluphumile lusuka phambi kwe Nkosi, inhlupheko i si qalisile.

⁴⁷UAroni wasekuthatha njengokutsho kukaMozisi, wagijimela phakathi kwebandla, khangela-ke, inhlupheko yayisiqalisile phakathi kwabantu. Wafaka impepha, wabenzela abantu inhlawulo yokuthula.

⁴⁸Wasesima phakathi kwabafileyo labaphilayo. Inhlupheko yasimiswa.

⁴⁹Labafayo enhluphekweni babeyizinkulungwane ezilitshumi lane lamakhulu ayisikhombisa, ngaphandle kwalabo abafa ngendaba kaKora.

⁵⁰UAroni wasebuyela kuMozisi emnyango wethente lenhlangano; lenhlupheko yayisimisiwe.