Read Ndebele-IBhayibhili Elingcwele 2006 Unumeri 22 Bible Online

Unumeri 22 - Ndebele-IBhayibhili Elingcwele 2006 bible

Unumeri 22

¹Abantwana bakoIsrayeli basebesuka, bamisa inkamba emagcekeni akoMowabi, nganeno kweJordani, eJeriko.

²UBalaki indodana kaZipori wasebona konke uIsrayeli ayekwenze kumaAmori.

³UMowabi wasesesaba kakhulu ubuso babantu, ngoba babebanengi. UMowabi wasetshaywa luvalo ngenxa yabantwana bakoIsrayeli.

⁴UMowabi wasesithi ebadaleni beMidiyani: Khathesi lelibandla lizakhotha konke okusihanqileyo, njengenkabi ikhotha utshani bedlelo. Njalo uBalaki indodana kaZipori wayeyinkosi yakoMowabi ngalesosikhathi.

⁵Wasethuma izithunywa kuBalami indodana kaBeyori ePethori eliseduze lomfula welizwe labantwana babantu bakhe, ukumbiza, esithi: Khangela, abantu baphumile eGibhithe. Khangela, basibekele ubuso bomhlaba, futhi sebehlala maqondana lami.

⁶Khathesi-ke, ake uze, ngiqalekisela lababantu, ngoba balamandla kulami; mhlawumbe ngingaba lamandla okuthi sibatshaye, lokuthi ngibaxotshe elizweni, ngoba ngiyazi ukuthi lowo ombusisayo ubusisiwe, lalowo omqalekisayo uqalekisiwe.

⁷Abadala beMowabi labadala beMidiyani basebehamba belembadalo yokuvumisa esandleni sabo; bafika kuBalami, bakhuluma kuye amazwi kaBalaki.

⁸Wasesithi kubo: Lalani lapha lobubusuku, njalo ngizalilethela ilizwi, njengalokhu i Nkosi ezakutsho kimi. Iziphathamandla zakoMowabi zasezihlala loBalami.

⁹UNkulunkulu wasefika kuBalami, wathi: Ngobani lamadoda alawe?

¹⁰UBalami wasesithi kuNkulunkulu: UBalaki, indodana kaZipori, inkosi yakoMowabi, ungithumele esithi:

¹¹Khangela, abantu baphumile eGibhithe basibekele ubuso bomhlaba; woza khathesi, ungiqalekisele bona; mhlawumbe ngingaba lamandla okulwa labo, ngibaxotshe.

¹²UNkulunkulu wasesithi kuBalami: Ungahambi labo; ungabaqalekisi labobantu, ngoba babusisiwe.

¹³UBalami wasevuka ekuseni, wathi kuziphathamandla zikaBalaki: Yanini elizweni lakini, ngoba i Nkosi iyala ukungivumela ukuhamba lani.

¹⁴Ngakho iziphathamandla zakoMowabi zasukuma, zaya kuBalaki, zathi: UBalami uyala ukuhamba lathi.

¹⁵UBalaki wasebuya wathuma njalo iziphathamandla, ezinengi ezidumileyo kulalezo.

¹⁶Zasezifika kuBalami zathi kuye: Utsho njalo uBalaki indodana kaZipori uthi: Ake ungavinjwa yilutho ukuza kimi.

¹⁷Ngoba ngizakuhlonipha lokukuhlonipha kakhulu, lakho konke ongitshela khona ngizakwenza. Ngakho ake uze, ngiqalekisela lababantu.

¹⁸Kodwa uBalami waphendula wathi encekwini zikaBalaki: Uba uBalaki ebezangipha indlu yakhe igcwele isiliva legolide, bengingayikweqa umlayo we Nkosi uNkulunkulu wami ukwenza okukhulu kumbe okuncinyane.

¹⁹Khathesi-ke, ake lihlale lapha lani lobubusuku, ukuze ngazi ukuthi i Nkosi izakuthini kimi futhi.

²⁰UNkulunkulu wasesiza kuBalami ebusuku wathi kuye: Uba amadoda efika ukukubiza, sukuma uhambe lawo; kodwa kuphela lelolizwi engizalikhuluma kuwe, lona uzalenza.

²¹UBalami wasesukuma ekuseni, wabophela isihlalo kubabhemi wakhe, wahamba leziphathamandla zakoMowabi.

²²Ulaka lukaNkulunkulu lwavutha ngoba wahamba; ingilosi ye Nkosi yayakuma endleleni ukuba yisitha esimelane laye. Njalo wayegade ubabhemi wakhe, lenceku zakhe ezimbili zilaye.

²³Ubabhemi waseyibona ingilosi ye Nkosi imi endleleni, lenkemba ehwatshiweyo isesandleni sayo; lobabhemi waphambuka endleleni, wangena ensimini. UBalami wasemtshaya ubabhemi ukumphendulela endleleni.

²⁴Ingilosi ye Nkosi yasisima endleleni eminyeneyo yezivini, umduli ngapha lomduli ngapha.

²⁵Lapho ubabhemi ebona ingilosi ye Nkosi wazibandezela emdulini, wabandezela unyawo lukaBalami emdulini; wasemtshaya futhi.

²⁶Ingilosi ye Nkosi yasiqhubeka, yema endaweni eminyeneyo, lapho okwakungelandlela yokuphendukela ngakwesokunene kumbe ngakwesokhohlo.

²⁷Lapho ubabhemi ebona ingilosi ye Nkosi, walala ngaphansi kukaBalami. Ulaka lukaBalami lwaseluvutha, wasemtshaya ubabhemi ngenduku.

²⁸I Nkosi yasivula umlomo kababhemi, wasesithi kuBalami: Ngenzeni kuwe ukuthi ungitshaye okwalezizikhathi ezintathu?

²⁹UBalami wasesithi kubabhemi: Ngoba ungenze inhlekisa. Kungathi ngabe kulenkemba esandleni sami, ngoba bengizakubulala khathesi.

³⁰Ubabhemi wasesithi kuBalami: Angisuye yini ubabhemi wakho omgade kusukela ngi sengowakho kuze kube lamuhla? Ngake ngejwayela ukwenza kanje kuwe yini? Wasesithi: Hatshi.

³¹I Nkosi yasivula amehlo kaBalami, wasebona ingilosi ye Nkosi imi endleleni, lenkemba yayo ihwatshiwe isesandleni sayo; wakhothama wathi mbo ngobuso bakhe phansi.

³²Ingilosi ye Nkosi yasisithi kuye: Umtshayeleni ubabhemi wakho okwalezizikhathi ezintathu? Khangela, mina ngiphumile ukumelana lawe, ngoba indlela yakho iphambukile kimi;

³³njalo ubabhemi wangibona, waphambuka phambi kwami lezizikhathi ezintathu. Ngaphandle kokuthi ephambukile phambi kwami, ngeqiniso khathesi ngabe ngikubulele lawe, ngamgcina yena ephila.

³⁴UBalami wasesithi engilosini ye Nkosi: Ngonile, ngoba bengingazi ukuthi umi endleleni ukumelana lami. Ngakho-ke uba kukubi emehlweni akho, ngizabuyela futhi.

³⁵Ingilosi ye Nkosi yasisithi kuBalami: Hamba lalawomadoda; kodwa kuphela ilizwi engizalikhuluma kuwe, yilo ozalikhuluma. UBalami wasehamba leziphathamandla zikaBalaki.

³⁶UBalaki esezwile ukuthi uBalami uyeza, waphuma ukuyamhlangabeza emzini wakoMowabi, osemngceleni weArinoni, osekucineni komngcele.

³⁷UBalaki wasesithi kuBalami: Kangithumanga yini lokuthuma kuwe ukukubiza? Kungani ungafikanga kimi? Isibili kangilamandla okukunika udumo yini?

³⁸UBalami wasesithi kuBalaki: Khangela, ngifikile kuwe. Khathesi ngilamandla isibili okukhuluma loba yini na? Ilizwi uNkulunkulu alifaka emlonyeni wami, yilo engizalikhuluma.

³⁹UBalami wasehamba loBalaki, basebefika eKiriyathi-Huzothi.

⁴⁰UBalaki wasehlaba izinkabi lezimvu, wathumela kuBalami lakuziphathamandla ezazilaye.

⁴¹Kwasekusithi ekuseni uBalaki wamthatha uBalami, wamenyusela endaweni eziphakemeyo zikaBhali, ukuthi abone elapho ukucina kwabantu.